At-Takwir

¹Kapag ang araw ay ipinulupot,

²kapag ang mga bituin ay pumanglaw,

³kapag ang mga bundok ay iuusad,

⁴kapag ang mga buntis na kamelyo[1] ay pinabayaan,

⁵kapag ang mga mailap na hayop ay kinalap,

⁶kapag ang mga dagat ay pinagliyab,

⁷kapag ang mga kaluluwa ay ipinagpares,[2]

⁸kapag ang [batang] babaing inilibing nang buhay ay tatanungin

⁹dahil sa aling pagkakasala siya pinatay,

¹⁰kapag ang mga pahina [ng tala ng gawa ng tao] ay inilatag,

¹¹kapag ang langit ay tinuklap,

¹²kapag ang Impiyerno ay pinagliyab,

¹³at kapag ang Paraiso ay pinalapit [sa mga mananampalataya];

¹⁴malalaman ng isang kaluluwa ang ilalahad nito [na maganda at masagwa].

¹⁵Kaya talagang sumusumpa Ako sa mga bituing umuurong,

¹⁶na umiinog na nagtatago,

¹⁷at sa gabi kapag umurong-sulong ito,

¹⁸at sa madaling-araw kapag huminga ito;

¹⁹tunay na [ang Qur’ān na] ito ay talagang sinabi [ni Allāh] sa isang sugong marangal,

²⁰[si Anghel Gabriel] na may lakas sa ganang May-ari ng Trono, na mataas sa kalagayan,

²¹na tinatalima [ng mga anghel], pagkatapos mapagkakatiwalaan.

²²[O mga tao,] ang kasamahan ninyo [na si Propeta Muḥammad] ay hindi isang baliw.

²³Talaga ngang nakakita siya rıto [kay Anghel Gabriel] sa abot-tanaw na malinaw.

²⁴Siya, [sa pagpapaabot ng kaalaman] sa nakalingid, ay hindi isang sakim.

²⁵[Ang Qur’ān na] ito ay hindi sinabi ng isang demonyong kasumpa-sumpa.

²⁶Kaya saan kayo pupunta?

²⁷Walang iba ito kundi isang paalaala para sa mga nilalang,

²⁸para sa sinumang lumoob kabilang sa inyo na magpakatuwid,

²⁹at hindi kayo magloloob maliban na lumuob si Allāh, ang Panginoon ng mga nilalang.