الانفطار
The Cleaving • 19 ayahs • Meccan
بِسْمِ ٱللَّهِ ٱلرَّحْمَٰنِ ٱلرَّحِيمِ
1Kapag ang langit ay nabitak,
2kapag ang mga tala ay kumalat,
3kapag ang mga dagat ay isinambulat,
4at kapag ang mga libingan ay hinalukay;
5malalaman ng isang kaluluwa ang ipinauna niya at ipinaantala niya [na mga gawa].
6O tao, ano ang luminlang sa iyo hinggil sa Panginoon mo, ang Mapagbigay?
7[Siya] ang lumikha sa iyo, saka humubog sa iyo, saka nagpaangkop sa iyo.
8Sa alinmang anyo na niloob Niya ay bumuo Siya sa iyo.
9Aba’y hindi! Bagkus nagpapasinungaling kayo sa pagtutumbas [sa mga gawa].
10Tunay na sa inyo ay talagang may mga tagapag-ingat,
11na mararangal na mga tagasulat.
12Nakaaalam sila sa anumang ginagawa ninyo.
13Tunay na ang mga mabuting-loob ay talagang nasa isang kaginhawahan.
14Tunay na ang mga masamang-loob ay talagang nasa isang impiyerno.
15Masusunog sila roon sa Araw ng Pagtutumbas.
16Sila palayo roon ay hindi mga makaliliban.
17Ano ang nagpabatid sa iyo kung ano ang Araw ng Pagtutumbas?
18Pagkatapos ano ang nagpabatid sa iyo kung ano ang Araw ng Pagtutumbas?
19[Iyon ay] sa Araw na hindi makapagdudulot ang isang kaluluwa sa isang kaluluwa ng anuman at ang pag-uutos sa Araw na iyon ay ukol kay Allāh.