Al-Mutaffifin

¹Kapighatian ay ukol sa mga tagapag-umit-umit,

²na kapag nagpatakal sila sa mga tao ay nagpapalubus-lubos sila,

³at kapag tumakal sila sa mga ito o tumimbang sila sa mga ito ay nanlulugi sila.

⁴Hindi ba nakatitiyak ang mga iyon na sila ay mga bubuhayin

⁵para sa isang araw na sukdulan,

⁶sa araw na tatayo ang mga tao sa [harap ng] Panginoon ng mga nilalang?

⁷Aba’y hindi! Tunay na ang talaan ng mga masamang-loob ay talagang nasa Sijjīn.

⁸Ano ang nagpabatid sa iyo kung ano ang Sijjīn?

⁹Isang talaan na sinulatan.

¹⁰Kapighatian sa Araw na iyon ay ukol sa mga tagapagpasinungaling,

¹¹na mga nagpapasinungaling sa Araw ng Pagtutumbas.

¹²Walang nagpapasinungaling doon kundi ang bawat tagalabag na makasalanan.

¹³Kapag binibigkas sa kanya ang mga talata Namin [sa Qur’ān] ay nagsasabi siya: “Mga alamat ng mga sinauna!”

¹⁴Aba’y hindi! Bagkus, nagmantsa sa mga puso nila ang [pagkakasalang] dati nilang nakakamit.

¹⁵Aba’y hindi! Tunay na sila, sa [pagkakita sa] Panginoon nila sa araw na iyon, ay talagang mga lalambungan.

¹⁶Pagkatapos tunay na sila ay talagang masusunog sa Impiyerno.

¹⁷Pagkatapos sasabihin sa kanila: “Ito ay ang dati ninyong pinasisinungalingan.”

¹⁸Aba’y hindi! Tunay na ang talaan ng mga mabuting-loob ay talagang nasa `Illīyūn.

¹⁹Ano ang nagpabatid sa iyo kung ano ang `Illīyūn?

²⁰Isang talaan na sinulatan,

²¹Sasaksi rito ang mga [anghel na] inilapit [kay Allāh].

²²Tunay na ang mga mabuting-loob ay talagang nasa isang kaginhawahan,

²³habang nasa mga supa ay nakatingin [sa nagpapagalak sa kanila].

²⁴Makakikilala ka sa mga mukha nila ng ningning ng Kaginhawahan.

²⁵Paiinumin sila mula sa isang dalisay na alak na ipininid.

²⁶Ang pampinid nito ay musk, at alang-alang doon ay magtagisan ang mga magtatagisan.

²⁷Ang lahok nito ay mula sa Tasnīm,[1]

²⁸isang bukal na iinom mula roon ang mga inilapit.

²⁹Tunay na ang mga nagpakasalarin ay dati sa mga sumampalataya tumatawa.

³⁰Kapag naparaan sila sa mga ito ay nagkikindatan sila [bilang panunuya].

³¹Kapag umuwi sila sa mga kapwa nila ay umuuwi sila na mga nagbibiro.

³²Kapag nakakita sila sa mga ito ay nagsasabi sila: “Tunay na ang mga ito ay talagang mga ligaw.”

³³Hindi sila isinugo sa mga ito bilang mga tagapag-ingat.

³⁴Kaya sa Araw na iyon ang mga sumampalataya ay sa mga tagatangging sumampalataya tatawa

³⁵habang nasa mga supa ay nakatingin.[2]

³⁶Gagantimpalaan kaya ang mga tagatangging sumampalataya sa anumang dati nilang ginagawa?[3]