Al-Inshiqaq

¹Kapag ang langit ay nabiyak

²at duminig ito sa Panginoon nito at nagindapat ito,

³kapag ang lupa ay binanat,

⁴at nagtapon ito ng nasa loob nito at nagtatwa ito,

⁵at duminig ito sa Panginoon nito at nagindapat ito;

⁶O tao, tunay na ikaw ay nagpapakapagod tungo sa Panginoon mo sa isang pagpapakapagod kaya makikipagkita [ka] rito.[1]

⁷Kaya hinggil sa sinumang bibigyan ng talaan niya sa kanang kamay niya,

⁸tutuusin siya sa isang pagtutuos na magaan

⁹at uuwi siya sa mag-anak niya na pinagagalak.

¹⁰Hinggil naman sa sinumang bibigyan ng talaan niya sa bandang likod niya,

¹¹mananawagan siya ng pagkagupo

¹²at masusunog siya sa isang liyab.

¹³Tunay na siya dati sa piling ng mga kapwa niya ay pinagagalak.

¹⁴Tunay na siya ay nagpalagay na hindi siya manunumbalik [kay Allāh].

¹⁵Bagkus, tunay na ang Panginoon niya ay laging sa kanya nakakikita.

¹⁶Kaya talagang sumusumpa Ako sa pamumula ng takipsilim,

¹⁷at sa gabi at sa iniipon nito,

¹⁸at sa buwan kapag namilog ito;

¹⁹talagang lululan nga kayo sa isang antas buhat sa isang antas.

²⁰Kaya ano ang mayroon sa kanila na hindi sila sumasampalataya?

²¹Kapag binigkas sa kanila ang Qur’ān ay hindi sila nagpapatirapa.

²²Bagkus ang mga tumangging sumampalataya ay nagpapasinungaling.

²³Si Allāh ay higit na maalam sa anumang iniimbak nila [sa mga dibdib nila].

²⁴Kaya magbalita ka sa kanila hinggil sa isang pagdurusang masakit,

²⁵maliban ang mga sumampalataya at gumawa ng mga maayos; ukol sa kanila ay isang pabuyang hindi matitigil.