At-Takwir

¹Jua litakapokunjwa,

²Na nyota zikazimwa,

³Na milima ikaondolewa,

⁴Na ngamia wenye mimba pevu watakapoachwa wasishughulikiwe,

⁵Na wanyama wa mwituni wakakusanywa,

⁶Na bahari zikawaka moto,

⁷Na nafsi zikaunganishwa,

⁸Na msichana aliyezikwa hai atakapoulizwa,

⁹Kwa kosa gani aliuliwa?

¹⁰Na madaftari yatakapoenezwa,

¹¹Na mbingu itakapotanduliwa,

¹²Na Jahannamu itakapochochewa,

¹³Na Bustani ya mbinguni ikasongezwa karibu,

¹⁴Kila nafsi itajua ilichokihudhurisha.

¹⁵Ninaapa kwa nyota zinaporejea nyuma.

¹⁶Zinazokwenda, kisha zikajificha.

¹⁷Na kwa usiku unapopungua.

¹⁸Na kwa asubuhi inapopambazuka.

¹⁹Kwamba hakika bila ya shaka hii ni kauli ya Mjumbe mtukufu.

²⁰Mwenye nguvu na mwenye cheo kwa huyo Mwenye Kiti cha Enzi.

²¹Anayetiiwa, tena muaminifu.

²²Na wala huyu mwenzenu hana wazimu.

²³Na hakika yeye alimwona kwenye upeo wa macho ulio safi.

²⁴Wala yeye si bahili kwa mambo ya ghaibu.

²⁵Wala hii si kauli ya Shetani aliyelaaniwa.

²⁶Basi mnakwenda wapi?

²⁷Haikuwa hii ila ni ukumbusho kwa walimwengu wote.

²⁸Kwa yule miongoni mwenu anayetaka kwenda sawa.

²⁹Wala nyinyi hamtataka isipokuwa atake Mwenyezi Mungu Mola Mlezi wa walimwengu wote.