Ar-Rahman

¹Arrah'man (Mwingi wa Rehema).

²Amefundisha Qur-ani.

³Amemuumba mwanadamu.

⁴Akamfundisha kubaini.

⁵Jua na mwezi huenda kwa hesabu.

⁶Na mimea yenye kutambaa, na miti, inanyenyekea.

⁷Na mbingu ameziinua, na ameweka mizani.

⁸Ili msidhulumu katika mizani.

⁹Na wekeni mizani kwa haki, wala msipunje katika mizani.

¹⁰Na ardhi ameiweka kwa ajili ya viumbe.

¹¹Humo yamo matunda na mitende yenye mafumba.

¹²Na nafaka zenye makapi, na rehani.

¹³Basi ni ipi katika neema za Mola wenu Mlezi mnayoikanusha.

¹⁴Amemuumba mtu kwa udongo wa kinamo.

¹⁵Na akawaumba majini kwa ulimi wa moto.

¹⁶Basi ni ipi katika neema za Mola wenu Mlezi mnayoikanusha

¹⁷Mola Mlezi wa mashariki mbili na wa magharibi mbili.

¹⁸Basi ni ipi katika neema za Mola wenu Mlezi mnayoikanusha?

¹⁹Anaziendesha bahari mbili zikutane.

²⁰Baina yake kipo kizuizi, zisiingiliane.

²¹Basi ni ipi katika neema za Mola wenu Mlezi mnayoikanusha?

²²Katika hizo bahari mbili zinatoka lulu na marijani.

²³Basi ni ipi katika neema za Mola wenu Mlezi mnayoikanusha?

²⁴Na ni vyake Yeye hivi viendavyo baharini vilivyoundwa kama milima.

²⁵Basi ni ipi katika neema za Mola wenu Mlezi mnayoikanusha?

²⁶Kila kilichoko juu yake kitatoweka.

²⁷Na utabakia uso wa Mola wako Mlezi, wenye utukufu na ukarimu.

²⁸Basi ni ipi katika neema za Mola wenu Mlezi mnayoikanusha?

²⁹Vinamwomba Yeye vilivyo katika mbingu na ardhi. Kila siku Yeye yumo katika mambo.

³⁰Basi ni ipi katika neema za Mola wenu Mlezi mnayoikanusha?

³¹Tutakufanyieni hesabu enyi makundi mawili.

³²Basi ni ipi katika neema za Mola wenu Mlezi mnayoikanusha?

³³Enyi makundi ya majini na watu! Mkiweza kupenya kwenye mbingu na ardhi, basi penyeni! Hamtapenya ila kwa kupewa mamlaka.

³⁴Basi ni ipi katika neema za Mola wenu Mlezi mnayoikanusha?

³⁵Mtatumiwa muwako wa moto na shaba; wala hamtashinda.

³⁶Basi ni ipi katika neema za Mola wenu Mlezi mnayoikanusha?

³⁷Itakapopasuka mbingu ikawa nyekundu kama mafuta.

³⁸Basi ni ipi katika neema za Mola wenu Mlezi mnayoikanusha?

³⁹Basi Siku hiyo hataulizwa dhambi zake mtu wala jini.

⁴⁰Basi ni ipi katika neema za Mola wenu Mlezi mnayoikanusha?

⁴¹Watajuulikana wahalifu kwa alama zao, basi watashikwa kwa nywele zao za utosini na kwa miguu.

⁴²Basi ni ipi katika neema za Mola wenu Mlezi mnayoikanusha?

⁴³Hii ndiyo Jahannamu ambayo wahalifu walikuwa wakiikanusha.

⁴⁴Watakuwa wakizunguka baina ya hiyo na maji ya moto yanayochemka.

⁴⁵Basi ni ipi katika neema za Mola wenu Mlezi mnayoikanusha?

⁴⁶Na mwenye kuogopa kusimamishwa mbele ya Mola wake Mlezi atapata Bustani mbili.

⁴⁷Basi ni ipi katika neema za Mola wenu Mlezi mnayoikanusha?

⁴⁸Bustani zenye matawi yaliyotanda.

⁴⁹Basi ni ipi katika neema za Mola wenu Mlezi mnayoikanusha?

⁵⁰Ndani yake zimo chemichemi mbili zinazopita.

⁵¹Basi ni ipi katika neema za Mola wenu Mlezi mnayoikanusha?

⁵²Humo katika kila matunda zimo namna mbili.

⁵³Basi ni ipi katika neema za Mola wenu Mlezi mnayoikanusha?

⁵⁴Wawe wameegemea matandiko yenye bitana ya hariri nzito; na matunda ya Bustani hizo yapo karibu.

⁵⁵Basi ni ipi katika neema za Mola wenu Mlezi mnayoikanusha?

⁵⁶Humo watakuwamo wanawake watulizao macho yao; hajawagusa mtu kabla yao wala jini.

⁵⁷Basi ni ipi katika neema za Mola wenu Mlezi mnayoikanusha?

⁵⁸Kama kwamba wao ni yakuti na marijani.

⁵⁹Basi ni ipi katika neema za Mola wenu Mlezi mnayoikanusha.

⁶⁰Ati yaweza kuwa malipo ya ihsani ila ihsani?

⁶¹Basi ni ipi katika neema za Mola wenu Mlezi mnayoikanusha?

⁶²Na zaidi ya hizo zipo Bustani nyingine mbili.

⁶³Basi ni ipi katika neema za Mola wenu Mlezi mnayoikanusha?

⁶⁴Za kijani kibivu.

⁶⁵Basi ni ipi katika neema za Mola wenu Mlezi mnayoikanusha?

⁶⁶Na chemichemi mbili zinazofurika.

⁶⁷Basi ni ipi katika neema za Mola wenu Mlezi mnayoikanusha?

⁶⁸Imo humo miti ya matunda, na mitende na mikomamanga.

⁶⁹Basi ni ipi katika neema za Mola wenu Mlezi mnayoikanusha?

⁷⁰Humo wamo wanawake wema wazuri.

⁷¹Basi ni ipi katika neema za Mola wenu Mlezi mnayoikanusha?

⁷²Wanawake wazuri wanaotawishwa katika mahema.

⁷³Basi ni ipi katika neema za Mola wenu Mlezi mnayoikanusha?

⁷⁴Hajawagusa mtu wala jini kabla yao.

⁷⁵Basi ni ipi katika neema za Mola wenu Mlezi mnayoikanusha?

⁷⁶Wameegemea juu ya matakia ya kijani na mazulia mazuri.

⁷⁷Basi ni ipi katika neema za Mola wenu Mlezi mnayoikanusha?

⁷⁸Limetukuka jina la Mola wako Mlezi Mwenye utukufu na ukarimu.