Al-Qamar

¹Saa imekaribia, na mwezi umepasuka!

²Na wakiona Ishara, hugeuka upande na husema: 'Huu uchawi tu unazidi kuendelea.'

³Na wamekanusha na wamefuata matamanio yao. Na kila jambo ni lenye kuthibiti.

⁴Na bila ya shaka zimewajia habari zenye makaripio.

⁵Hekima kamili; lakini maonyo hayafai kitu!

⁶Basi jiepushe nao. Siku atakapoita mwitaji kuliendea jambo linalochusha.

⁷Macho yao yatainama; watatoka makaburini kama nzige waliotawanyika.

⁸Wanamkimbilia mwitaji, na makafiri wanasema: 'Hii ni siku ngumu.'

⁹Kabla yao kaumu ya Nuhu walikanusha; wakamkanusha mja wetu, na wakasema ni mwendawazimu, na akakaripiwa.

¹⁰Basi akamwomba Mola wake Mlezi akasema: 'Kwa hakika mimi nimeshindwa, basi ninusuru!'

¹¹Basi tukaifungua milango ya mbingu kwa maji yanayomiminika.

¹²Na tukazipasua ardhi kwa chemichemi, yakakutana maji kwa jambo lililokwisha pangwa.

¹³Na tukambeba kwenye safina ya mbao na kamba.

¹⁴Ikawa inakwenda kwa macho yetu, kuwa ni malipo kwa aliyekuwa amekanushwa.

¹⁵Na bila ya shaka tuliiacha iwe ni Ishara. Lakini je, yupo anayekumbuka?

¹⁶Basi ilikuwaje adhabu yangu, na maonyo yangu.

¹⁷Na bila ya shaka Sisi tumeifanya Qur-ani iwe nyepesi kufahamika. Lakini yupo anayekumbuka?

¹⁸Kina 'Adi walikanusha. Basi ilikuwaje adhabu yangu na maonyo yangu?

¹⁹Hakika Sisi tuliwatumia upepo wa kimbunga katika siku korofi mfululizo.

²⁰Ukiwang'oa watu kama vigogo vya mitende vilivyong'olewa.

²¹Basi ilikuwaje adhabu yangu na maonyo yangu?

²²Na bila ya shaka Sisi tumeifanya Qur-ani nyepesi kufahamika; lakini yupo anayekumbuka?

²³Thamudi waliwakanusha Waonyaji.

²⁴Wakasema: 'Ati tumfuate binadamu mmoja katika sisi? Basi hivyo sisi tutakuwa katika upotovu na kichaa!

²⁵Ni yeye tu aliyeteremshiwa huo ukumbusho kati yetu sote? Bali huyu ni mwongo mno, mshari mkubwa!

²⁶Kesho watajua ni nani huyo mwongo mno, mshari mkubwa.

²⁷Hakika Sisi tutawatumia ngamia jike ili kuwajaribu, basi watazame vyema tu na ustahamili.

²⁸Na waambie kwamba hakika maji yatagawanywa baina yao; kila sehemu ya maji itahudhuriwa na aliyehusika.

²⁹Basi wakamwita mtu wao akaja akamchinja.

³⁰Basi ilikuwaje adhabu yangu na maonyo yangu!

³¹Hakika Sisi tuliwatumia ukelele mmoja tu, wakawa kama mabuwa ya kujengea ua.

³²Na bila ya shaka Sisi tumeifanya Qur-ani iwe nyepesi kwa kukumbuka, lakini yupo akumbukaye?

³³Kaumu Lut'i nao waliwakadhibisha Waonyaji.

³⁴Hakika Sisi tukawatumia kimbunga cha vijiwe, isipokuwa wafuasi wa Lut'i. Hao tuliwaokoa karibu na alfajiri.

³⁵Kwa neema inayotoka kwetu. Hivyo ndivyo tumlipavyo anayeshukuru.

³⁶Na hakika yeye aliwaonya adhabu yetu; lakini wao waliyatilia shaka hayo maonyo.

³⁷Na walimtaka awape wageni wake. Tukayapofua macho yao, na tukawaambia: 'Onjeni basi adhabu na maonyo yangu!'

³⁸Na iliwafikia wakati wa asubuhi adhabu yangu ya kuendelea.

³⁹Basi onjeni adhabu na maonyo yangu!

⁴⁰Na hakika tumeisahilisha Qur-ani kuikumbuka. Lakini yupo anayekumbuka?

⁴¹Na Waonyaji waliwajia watu wa Firauni.

⁴²Walizikadhibisha Ishara zetu zote, nasi tukawashika mshiko wa Mwenye nguvu, Mwenye uwezo.

⁴³Je, makafiri wenu ni bora kuliko hao, au yameandikwa vitabuni kuwa nyinyi hamtiwi makosani?

⁴⁴Au ndiyo wanasema: 'Sisi ni wengi tutashinda tu.'

⁴⁵Wingi wao huu utashindwa, na wao watasukumwa nyuma.

⁴⁶Bali Saa ya Kiyama ndiyo miadi yao, na Saa hiyo ni nzito zaidi na chungu zaidi.

⁴⁷Hakika wakosefu wamo katika upotovu na wazimu.

⁴⁸Siku watakapokokotwa Motoni kifudifudi waambiwe: 'Onjeni mguso wa Saqar!'

⁴⁹Kwa hakika Sisi tumekiumba kila kitu kwa kipimo.

⁵⁰Na amri yetu haikuwa ila ni moja tu, kama kupepesa jicho.

⁵¹Na bila ya shaka tumekwisha waangamiza wenzenu. Lakini yupo anayekumbuka?

⁵²Na kila jambo walilolifanya limo vitabuni.

⁵³Na kila kidogo na kikubwa kimeandikwa.

⁵⁴Hakika wacha Mungu watakuwa katika Mabustani na mito.

⁵⁵Katika mahali pa kukalia pa haki kwa Mfalme Mwenye uweza.