An-Najm

¹Ninaapa kwa nyota inapotua.

²Mwenzenu huyu hakupotea, wala hakukosea.

³Wala hatamki kwa matamanio.

⁴Hayakuwa haya ila ni ufunuo uliofunuliwa.

⁵Amemfundisha aliye Mwingi wa nguvu.

⁶Mwenye kutua, akatulia.

⁷Naye yuko juu kabisa upeo wa macho.

⁸Kisha akakaribia na akateremka.

⁹Akawa ni kama baina ya mipinde miwili, au karibu zaidi.

¹⁰Akamfunulia mja wake (Mwenyezi Mungu) alichomfunulia.

¹¹Ufahamu wa moyo wake haukukanusha uliyoyaona.

¹²Je, mnabishana naye kwa aliyoyaona?

¹³Na akamwona mara nyingine.

¹⁴Penye Mkunazi wa mwisho.

¹⁵Karibu yake ndiyo ipo Bustani ya mbinguni inayokaliwa.

¹⁶Kilipoufunika huo Mkunazi hicho kilichoufunika.

¹⁷Jicho halikuhangaika wala halikuruka mpaka.

¹⁸Kwa yakini aliona katika Ishara kubwa kabisa za Mola wake Mlezi.

¹⁹Je, mmemuona Lata na Uzza?

²⁰Na Manaat, mwingine wa tatu?

²¹Je, nyinyi mnao wana wanaume na Yeye ndio awe na wanawake?

²²Huo ni mgawanyo wa dhuluma!

²³Hayo hayakuwa ila ni majina mliyowapa nyinyi na baba zenu. Mwenyezi Mungu hakuleta uthibitisho wowote juu ya hayo. Hawafuati ila dhana tu na kipendacho nafsi. Na kwa yakini uongofu ulikwisha wafikia kutoka kwa Mola wao Mlezi.

²⁴Ati mtu anakipata kila anachokitamani?

²⁵Mwenyezi Mungu tu ndiye Mwenye Akhera na dunia.

²⁶Na wako Malaika wangapi mbinguni, ambao uombezi wao hautafaa chochote isipokuwa baada ya Mwenyezi Mungu kutoa idhini kwa amtakaye na kumridhia.

²⁷Hakika wale wasioamini Akhera bila ya shaka wao ndio wanawaita Malaika kwa majina ya kike.

²⁸Nao hawana elimu yoyote kwa hayo isipokuwa wanafuata dhana tu. Na dhana haisaidii chochote mbele ya haki.

²⁹Basi mwachilie mbali anayeupa kisogo ukumbusho wetu, na wala hataki ila maisha ya dunia.

³⁰Huo ndio mwisho wao wa elimu. Hakika Mola wako Mlezi ndiye anayemjua zaidi mwenye kuipotea njia yake, na Yeye ndiye anayemjua zaidi mwenye kuongoka.

³¹Ni vya Mwenyezi Mungu vyote vilivyo mbinguni na vilivyo katika ardhi, ili awalipe wale waliotenda ubaya kwa waliyoyatenda, na wale waliotenda mema awalipe mema.

³²Ambao wanajiweka mbali na madhambi makuu na vitendo vichafu, isipokuwa makosa hafifu. Hakika Mola wako Mlezi ni Mkunjufu wa maghfira, naye anakujueni sana tangu alipokuumbeni kutoka kwenye ardhi, na mlipokuwa mimba matumboni mwa mama zenu. Basi msijione watakatifu. Yeye anamjua sana mwenye kujikinga akawa mbali na maovu.

³³Je, umemwona yule aliyegeuka akaenda zake?

³⁴Na akapeana kidogo, kisha akajizuia?

³⁵Je, anayo huyo elimu ya ghaibu, basi ndiyo anaona?

³⁶Au hakuambiwa yaliyomo katika Vitabu vya Musa?

³⁷Na vya Ibrahimu aliyetimiza ahadi?

³⁸Ya kwamba hakika nafsi iliyobeba madhambi haibebi madhambi ya mwengine?

³⁹Na ya kwamba hatapata mtu ila aliyoyafanya mwenyewe?

⁴⁰Na kwamba vitendo vyake vitaonekana?

⁴¹Kisha ndio atalipwa malipo yake kwa hayo kwa ukamilifu.

⁴²Na kwamba kwa Mola wako Mlezi ndiyo mwisho.

⁴³Na kwamba Yeye ndiye anayeleta kicheko na kilio.

⁴⁴Na kwamba Yeye ndiye anayefisha na kuhuisha.

⁴⁵Na kwamba Yeye ndiye aliyeumba jozi, dume na jike.

⁴⁶Kutokana na mbegu ya uzazi inapomiminwa.

⁴⁷Na kwamba ni juu yake ufufuo mwengine.

⁴⁸Na kwamba ni Yeye ndiye anayetosheleza na kukinaisha.

⁴⁹Na kwamba hakika Yeye ndiye Mola Mlezi wa nyota ya Shii'ra.

⁵⁰Na kwamba Yeye ndiye aliyewaangamiza 'Adi wa kwanza.

⁵¹Na Thamudi hakuwabakisha.

⁵²Na kabla yao kaumu ya Nuhu. Na hao hakika walikuwa ni madhalimu zaidi, na waovu zaidi.

⁵³Na miji iliyopinduliwa, ni Yeye aliyeipindua.

⁵⁴Vikaifunika vilivyofunika.

⁵⁵Basi neema gani ya Mola wako Mlezi unayoifanyia shaka?

⁵⁶Hili ni onyo katika maonyo yale yale ya zamani.

⁵⁷Kiyama kimekaribia!

⁵⁸Hapana wa kukifichua isipokuwa Mwenyezi Mungu.

⁵⁹Je, mnayastaajabia maneno haya?

⁶⁰Na mnacheka, wala hamlii?

⁶¹Nanyi mmeghafilika?

⁶²Basi msujudieni Mwenyezi Mungu, na mumuabudu.