Ya-Sin

¹Ya Sin.[1]

²(Ninaapa) kwa Qur-ani yenye hekima!

³Hakika wewe ni miongoni mwa waliotumwa.

⁴Juu ya njia iliyonyooka.

⁵Uteremsho wa Mwenye nguvu, Mwingi wa kurehemu.

⁶Ili uwaonye watu ambao baba zao hawakuonywa, basi wao wamekuwa wenye kughafilika.

⁷Bila ya shaka kauli imekwisha thibiti juu ya wengi katika wao, kwa hivyo hawaamini.

⁸Tumeweka makongwa shingoni mwao, yakawafika videvuni. Kwa hivyo vichwa vyao viko juu tu.

⁹Tumeweka kizuizi mbele yao, na kizuizi nyuma yao. Na tumewafunika macho yao, kwa hivyo hawaoni.

¹⁰Ni sawa sawa kwao ukiwaonya au usiwaonye, hawataamini.

¹¹Hakika wewe unamwonya mwenye kufuata ukumbusho, na akamcha Arrahman (Mwingi wa rehema), kwa ghaibu. Basi mbashirie huyo msamaha na ujira mwema.

¹²Hakika Sisi tunawafufua wafu na tunayaandika wanayoyatanguliza, na wanayoyaacha nyuma. Na kila kitu tumekihifadhi katika daftari la asili lenye kubainisha.

¹³Na wapigie mfano wa wakazi wa mji walipojiwa na Mitume.

¹⁴Tulipowatumia wawili, wakawakanusha. Basi tukawazidishia nguvu kwa mwingine wa tatu. Wakasema: "Hakika sisi tumetumwa kwenu."

¹⁵Wakasema: "Nyinyi si chochote ila ni watu kama sisi. Na Mwingi wa Rehema hakuteremsha kitu. Nyinyi mnasema uongo tu."

¹⁶Wakasema: "Mola wetu Mlezi anajua kwamba hakika sisi tumetumwa kwenu."

¹⁷Wala si juu yetu ila kufikisha ujumbe ulio wazi."

¹⁸Wakasema: "Sisi hakika sisi tunaona mkosi kwenu. Ikiwa hamtaacha basi kwa yakini tutakupigeni mawe, na mtapata adhabu chungu kutoka kwetu."

¹⁹Wakasema: "Mkosi wenu mnao wenyewe! Je! Ni kwa kuwa mnakumbushwa? Ama nyinyi ni watu waliopindukia mipaka."

²⁰Na akaja mtu mbio kutokea upande wa mbali wa mjini, akasema: "Enyi watu wangu! Wafuateni hawa waliotumwa.

²¹Wafuateni ambao hawakutakini ujira, hali ya kuwa wenyewe wameongoka.

²²Na kwa nini nisimuabudu yule aliyeniumba na kwake nitarejeshwa?

²³Je, niishike miungu mingine badala yake? Arrahmani (Mwingi wa Rehema) akinitakia madhara uombezi wa hao hautanifaa kitu, wala hawataniokoa.

²⁴Basi hakika mimi hapo nitakuwa katika upotovu ulio dhahiri.

²⁵Hakika mimi nimemuamini Mola wenu Mlezi, basi nisikilizeni!"

²⁶Akaambiwa: "Ingia Peponi!" Akasema: "Laiti kuwa watu wangu wangelijua.

²⁷Jinsi Mola wangu Mlezi alivyonisamehe, na akanifanya miongoni mwa walioheshimiwa."

²⁸Na hatukuwateremshia kaumu yake baada yake jeshi kutoka mbinguni, wala si wenye kuteremsha.

²⁹Haukuwa ila ukelele mmoja tu, na mara walizimwa!

³⁰Nawasikitikia waja wangu. Hawajii Mtume ila wao humkejeli.

³¹Je, hawaoni umma ngapi tulizoziangamiza kabla yao? Hakika hao hawarejei tena kwao.

³²Na hapana mmoja ila wote watakusanywa waletwe mbele yetu.

³³Na Ishara hiyo kwao ni ardhi iliyokufa, nasi tukaifufua, na tukatoa ndani yake nafaka, wakawa wanakula katika hizo!

³⁴Na tukafanya ndani yake mabustani ya mitende na mizabibu, na tukatimbua chemichemi ndani yake.

³⁵Ili wale katika matunda yake, na hayo hayakufanywa na mikono yao! Basi je, hawashukuru?

³⁶Ametakasika yule aliyeumba dume na jike vyote katika vinavyomea katika ardhi na katika nafsi zao, na katika wasivyovijua.

³⁷Na usiku ni Ishara kwao. Tunauvua humo mchana, mara wao wanakuwa gizani.

³⁸Na jua linakwenda kwa kiwango chake. Hayo ni makadirio ya Mwenye nguvu, Mwenye kujua vyema.

³⁹Na mwezi tumeupimia vituo, mpaka unakuwa kama karara kongwe.

⁴⁰Haliwi jua kuufikia mwezi, wala usiku kuupita mchana. Na vyote vinaogelea katika njia zao.

⁴¹Na ni Ishara kwao kwamba Sisi tuliwapakia dhuria zao katika jahazi lililosheheni.

⁴²Na tukawaumbia kutoka mfano wake wanavyovipanda.

⁴³Na tukitaka, tunawazamisha, wala hapana wa kuwasaidia, wala hawaokolewi.

⁴⁴Isipokuwa kwa rehema zitokazo kwetu na starehe kwa muda.

⁴⁵Na wanapoambiwa: Jilindeni kutokana na yaliyoko mbele yenu na yaliyoko nyuma yenu, ili mpate kurehemewa...

⁴⁶Na haiwafikii Ishara yoyote katika Ishara za Mola wao Mlezi isipokuwa wao huwa ni wenye kuipa mgongo.

⁴⁷Na wanapoambiwa: "Toeni katika aliyokupeni Mwenyezi Mungu", wale waliokufuru huwaambia wale walioamini: Je, tuwalishe wale ambao Mwenyezi Mungu angependa angeliwalisha mwenyewe? Nyinyi hammo isipokuwa katika upotovu ulio dhahiri.

⁴⁸Na wanasema: Ahadi hii itatokea lini, ikiwa nyinyi ni wakweli?

⁴⁹Hawangojei isipokuwa ukelele mmoja tu utakaowachukua nao wamo kuzozana.

⁵⁰Basi hawataweza kuusia, wala kwa watu wao hawarejei.

⁵¹Na litapulizwa baragumu, mara watatoka makaburini wakikimbilia kwa Mola wao Mlezi.

⁵²Watasema: Ole wetu! Ni nani aliyetufufua kwenye malazi yetu? Haya ndiyo aliyoyaahidi Mwingi wa Rehema na wakasema kweli Mitume.

⁵³Haitakuwa isipokuwa ukelele mmoja tu, mara wote watahudhurishwa mbele yetu.

⁵⁴Basi leo nafsi yoyote haitadhulumiwa kitu, wala hamtalipwa isipokuwa yale mliyokuwa mkiyatenda.

⁵⁵Hakika watu wa Bustani ya mbinguni leo wamo shughulini, wamefurahi.

⁵⁶Wao na wake zao wamo katika vivuli wameegemea juu ya viti vya kifahari.

⁵⁷Watapata humo kila namna ya matunda na watapata kila watakachokitaka.

⁵⁸"Salama!" Hiyo ndiyo kauli itokayo kwa Mola Mlezi Mwenye kurehemu.

⁵⁹Na enyi wakosefu! Jitengeni leo!

⁶⁰Je, sikuagana nanyi, enyi wanadamu, kuwa msimuabudu Shetani? Hakika yeye ni adui dhahiri kwenu.

⁶¹Na ya kwamba mniabudu Mimi? Hii ndiyo Njia iliyonyooka.

⁶²Na bila ya shaka yeye amekwisha lipoteza kundi kubwa miongoni mwenu. Je, hamkuwa mkifikiri?

⁶³Hii basi ndiyo Jahannamu mliyokuwa mkiahidiwa.

⁶⁴Ingieni humo leo kwa vile mlivyokuwa mkikufuru.

⁶⁵Leo tunaviziba vinywa vyao, na iseme nasi mikono yao, na itoe ushahidi miguu yao kwa waliyokuwa wakiyachuma.

⁶⁶Na tungelipenda, tungeliyafutilia mbali macho yao, wakawa wanaiwania njia. Lakini wangeionaje?

⁶⁷Na tungelitaka, tungewageuza sura hapo hapo walipo, basi wasingeweza kwenda wala kurudi.

⁶⁸Na tunayemzeesha, tunamrudisha nyuma katika umbo. Basi je, hawazingatii?

⁶⁹Wala hatukumfundisha (Muhammad) mashairi, wala hayatakikani kwake hayo. Haukuwa huu isipokuwa ni ukumbusho na Qur-ani inayobainisha.

⁷⁰Ili imwonye aliye hai, na neno litimie juu ya makafiri.

⁷¹Je, hawaoni kwamba tumewaumbia kutokana na iliyofanya mikono yetu wanyama wa mifugo, na wao wakawa wenye kuwamiliki.

⁷²Na Sisi tukawadhalilishia. Basi baadhi yao wako wanaowapanda, na baadhi yao wanawala.

⁷³Na wao wanapata kwao manufaa na vinywaji. Basi je, hawashukuru?

⁷⁴Na wameishika miungu mingine badala ya Mwenyezi Mungu ili ati wapate kusaidiwa!

⁷⁵Hawataweza kuwasaidia. Bali hao ndio askari wao, watahudhurishwa.

⁷⁶Basi maneno yao yasikuhuzunishe. Hakika Sisi tunayajua wanayoyaweka siri na wanayoyadhihirisha.

⁷⁷Kwani mwanadamu haoni ya kwamba Sisi tumemuumba yeye kutokana na tone la manii? Kisha sasa yeye ndiyo amekuwa ndiye mgomvi wa dhahiri!

⁷⁸Na akatupigia mfano, na akasahau kuumbwa kwake, akasema: Ni nani huyo atakayeihuisha mifupa nayo imekwisha mung'unyika?

⁷⁹Sema: Ataihuisha huyo huyo aliyeiumba hapo mara ya mwanzo. Na Yeye ni Mjuzi wa kila kuumba.

⁸⁰Aliyekujaalieni kupata moto kutokana na mti wa kijani nanyi mkawa kwa huo mnawasha.

⁸¹Kwani aliyeziumba mbingu na ardhi hawezi kuwaumba mfano wao? Kwani! Naye ndiye Muumbaji Mkuu, Mjuzi mno.

⁸²Hakika amri yake anapotaka kitu ni kukiambia tu: Kuwa! Na kikawa.

⁸³Basi ametakasika yule ambaye mkononi mwake umo Ufalme wa kila kitu; na kwake Yeye mtarejeshwa.