At-Tur

¹Ninaapa kwa mlima wa T'ur.

²Na Kitabu kilichoandikwa.

³Katika ngozi iliyokunjuliwa.

⁴Na kwa Nyumba iliyojengwa.

⁵Na kwa dari iliyonyanyuliwa.

⁶Na kwa bahari iliyojazwa.

⁷Hakika adhabu ya Mola wako Mlezi hapana shaka itatokea.

⁸Hapana wa kuizuia.

⁹Siku zitakapotikisika mbingu kwa mtikiso.

¹⁰Na milima iwe inakwenda kwa mwendo mkubwa.

¹¹Basi ole wao siku hiyo hao wanaokadhibisha.

¹²Ambao wanacheza katika mambo ya upuuzi.

¹³Siku watakaposukumwa kwenye Moto kwa msukumo wa nguvu.

¹⁴(Waambiwe): Huu ndio ule Moto mliokuwa mkiukadhibisha!

¹⁵Je, huu ni uchawi, au hamwoni tu?

¹⁶Uingieni, mkistahamili au msistahamili - ni mamoja kwenu. Hakika mnalipwa kwa mliyokuwa mkiyatenda.

¹⁷Hakika wacha Mungu watakuwa katika Mabustani na neema.

¹⁸Wakifurahi kwa yale aliyowapa Mola wao Mlezi. Na Mola wao Mlezi atawalinda kutokana na adhabu ya Motoni.

¹⁹Kuleni na kunyweni kwa raha kabisa kwa sababu ya mliyokuwa mkiyatenda.

²⁰Watakuwa wameegemea juu ya viti vya enzi vilivyopangwa kwa safu. Na tutawaoza mahurulaini.

²¹Na wale walioamini na dhuriya zao wakawafuata kwa Imani, tutawakutanisha nao dhuriya zao, na wala hatutawapunja hata kidogo katika vitendo vyao. Kila mtu lazima atapata alichokichuma.

²²Na tutawapa matunda, na nyama kama watakavyopenda.

²³Watapeana humo bilauri zisizo na vinywaji vya kuleta maneno ya upuuzi wala dhambi.

²⁴Iwe wanawapitia watumishi wao kama kwamba ni lulu zilizomo katika chaza.

²⁵Wataelekeana wakiulizana.

²⁶Waseme: Hakika tulikuwa zamani pamoja na ahali zetu tukiogopa mno.

²⁷Basi Mwenyezi Mungu akatufanyia hisani na akatulinda mbali adhabu ya upepo wa Moto.

²⁸Hakika sisi zamani tulikuwa tukimwomba Yeye tu. Hakika Yeye ndiye Mwema Mwingi wa kurehemu.

²⁹Basi kumbusha! Kwani wewe, kwa neema ya Mola wako Mlezi, si kuhani wala mwendawazimu.

³⁰Au wanasema: Huyu ni mtunga mashairi, tunamtarajia kupatilizwa na dahari.

³¹Sema: Tarajieni, na mimi pia ni pamoja nanyi katika kutarajia.

³²Au hizo akili zao ndio zinawaamrisha haya, au wao basi ni watu majeuri tu?

³³Au ndiyo wanasema: 'Ameitunga hii!' Bali basi tu hawaamini!

³⁴Basi nawalete masimulizi kama haya ikiwa wao wanasema kweli.

³⁵Au wao wameumbwa pasipo kutokana na kitu chochote, au ni wao ndio waumbaji?

³⁶Au wao wameziumba mbingu na ardhi? Bali hawana yakini.

³⁷Au wanazo hazina za Mola wako Mlezi au wao ndio wenye madaraka?

³⁸Au wanazo ngazi za kusikilizia? Basi huyo msikilizaji wao na alete hoja iliyo wazi!

³⁹Au Yeye Mwenyezi Mungu ana wasichana, na nyinyi ndio mna wavulana?

⁴⁰Au wewe unawaomba ujira, na kwa hivyo ndio wanaelemewa na uzito wa gharama?

⁴¹Au wanayo elimu ya ghaibu, nao wameandika?

⁴²Au wanataka kufanya vitimbi tu? Lakini hao waliokufuru ndio watakaotegeka.

⁴³Au wanaye mungu asiyekuwa Mwenyezi Mungu? Ametakasika Mwenyezi Mungu mbali na hao wanaowashirikisha naye.

⁴⁴Na hata wangeona pande linatoka mbinguni linaanguka wangesema: Ni mawingu yaliyobebana.

⁴⁵Basi waache mpaka wakutane na siku yao watakapohilikishwa.

⁴⁶Siku ambayo hila zao hazitawafaa hata kidogo, wala wao hawatanusuriwa.

⁴⁷Na hakika wale waliodhulumu watapata adhabu nyingine isiyokuwa hii, lakini wengi wao hawajui.

⁴⁸Na ingojee hukumu ya Mola wako Mlezi. Kwani wewe hakika uko mbele ya macho yetu.

⁴⁹Na usiku pia mtakase, na zinapokuchwa nyota.