الحاقة
The Inevitable • 52 ayahs • Meccan
بِسْمِ ٱللَّهِ ٱلرَّحْمَٰنِ ٱلرَّحِيمِ
1Tukio la haki.
2Nini hilo Tukio la haki?
3Na nini kitakachokujulisha nini hilo Tukio la haki?
4Thamudi na A'di waliukadhibisha Msiba unaoshtusha.
5Basi Thamudi waliangamizwa kwa balaa kubwa mno.
6Na ama A'di waliangamizwa kwa upepo mkali usiozuilika.
7Aliowapelekea usiku saba, na michana minane, mfululizo bila ya kusita. Utaona watu wamepinduka kama kwamba ni magongo ya mitende yaliyo wazi ndani.
8Basi je! Unamwona mmoja wao aliyebaki?
9Na Firauni na waliomtangulia, na miji iliyopinduliwa chini juu, walileta dhambi kubwa.
10Akamuasi Mtume wa Mola wao Mlezi, ndipo Yeye Mola akawakamata kwa mkamato uliozidi nguvu.
11Maji yalipofurika Sisi tulikupandisheni katika safina.
12Ili tuyafanye hayo kuwa ni waadhi kwenu na kila sikio linalosikia liyahifadhi.
13Na litapopulizwa baragumu mpulizo mmoja tu.
14Na ardhi na milima ikaondolewa, na ikavunjwa kwa mvunjo mmoja.
15Siku hiyo ndio Tukio litatokea.
16Na mbingu zitapasuka, kwani siku hiyo zitakuwa dhaifu kabisa.
17Na Malaika watakuwa pembezoni mwa mbingu; na wanane juu ya hawa watakuwa wamebeba Kiti cha Enzi cha Mola wako Mlezi.
18Siku hiyo mtahudhurishwa - haitafichika siri yoyote yenu.
19Basi ama atakayepewa kitabu chake kwa mkono wake wa kulia, atasema: Haya someni kitabu changu!
20Hakika nilijua ya kuwa nitapokea hisabu yangu.
21Basi yeye atakuwa katika maisha ya kupendeza.
22Katika Bustani ya juu.
23Matunda yake ya karibu.
24Waambiwe: Kuleni na mnywe kwa furaha kwa sababu ya mlivyotanguliza katika siku zilizopita.
25Na ama atakayepewa kitabu chake katika mkono wake wa kushoto, basi yeye atasema: "Laiti nisingelipewa kitabu changu!
26Wala nisingelijua nini hisabu yangu.
27Laiti mauti ndiyo yangelikuwa ya kunimaliza kabisa.
28Mali yangu hayakunifaa kitu.
29Madaraka yangu yamenipotea."
30(Pasemwe): Mshikeni! Mtieni pingu!
31Kisha mtupeni Motoni!
32Tena mtatizeni katika mnyororo wenye urefu wa dhiraa sabini!
33Kwani huyo hakika alikuwa hamuamini Mwenyezi Mungu Mtukufu.
34Wala hahimizi kulisha masikini.
35Basi leo hapa hana jamaa wa kumwonea uchungu.
36Wala hana chakula ila usaha wa watu wa Motoni.
37Chakula hicho hawakili ila wakosefu.
38Basi ninaapa kwa mnavyoviona.
39Na msivyoviona.
40Kwa hakika hii ni kauli iliyoletwa na Mjumbe mwenye heshima.
41Wala si kauli ya mtunga mashairi. Ni machache sana mnayoyaamini.
42Wala si kauli ya kuhani. Ni machache mnayoyakumbuka.
43Ni uteremsho utokao kwa Mola Mlezi wa walimwengu wote.
44Na lau kama angelituzulia baadhi ya maneno tu.
45Bila ya shaka tungelimshika kwa mkono wa kulia.
46Kisha kwa hakika tungelimkata mshipa mkubwa wa moyo!
47Na hapana yeyote katika nyinyi ambaye angeliweza kutuzuia kumfikia.
48Kwa hakika hii ni mawaidha kwa wacha Mungu.
49Na hakika Sisi bila ya shaka tunajua kwamba miongoni mwenu wapo wanaokadhibisha.
50Na hakika bila ya shaka itakuwa ni majuto kwa wanaokataa.
51Na hakika hii bila ya shaka ni haki ya yakini.
52Basi litakase jina la Mola wako Mlezi Mtukufu.