Al-Ma'arij

¹Muulizaji aliuliza juu ya adhabu itakayotokea.

²Kwa makafiri - ambayo hapana awezaye kuizuia.

³Kutoka kwa Mwenyezi Mungu Mwenye mbingu za daraja.

⁴Malaika na Roho hupanda kwenda kwake katika siku ambayo kiasi chake ni miaka hamsini elfu!

⁵Basi subiri kwa subira njema.

⁶Hakika wao wanaiona iko mbali.

⁷Na Sisi tunaiona iko karibu.

⁸Siku ambayo mbingu zitakapokuwa kama madini iliyoyeyushwa.

⁹Na milima itakuwa kama sufi.

¹⁰Wala jamaa hatamuuliza jamaa yake.

¹¹Ijapokuwa wataonyeshwa waonane. Atatamani mkosefu lau ajikomboe na adhabu ya siku hiyo kwa kuwatoa fidia wanawe.

¹²Na mkewe, na nduguye.

¹³Na jamaa zake waliokuwa wakimkimu,

¹⁴Na wote waliomo duniani, kisha aokoke yeye.

¹⁵La, hasha! Kwa hakika huo ni Moto mkali kabisa,

¹⁶Unaobambua ngozi ya kichwa!

¹⁷Utamwita kila aliyegeuza mgongo na akageuka.

¹⁸Na akakusanya mali, kisha akayahifadhi.

¹⁹Hakika mtu ameumbwa na papara.

²⁰Inapomgusa shari hupapatika.

²¹Na inapomgusa kheri huizuilia.

²²Isipokuwa wanaosali.

²³Ambao wanadumisha Sala zao.

²⁴Na ambao katika mali yao iko haki maalumu.

²⁵Kwa mwenye kuomba na anayejizuilia kuomba;

²⁶Na ambao wanaisadiki Siku ya Malipo.

²⁷Na ambao wanaiogopa adhabu itokayo kwa Mola wao Mlezi.

²⁸Hakika adhabu ya Mola wao Mlezi si ya kuwa na amani nayo.

²⁹Na ambao wanahifadhi tupu zao.

³⁰Isipokuwa kwa wake zao, au iliyowamiliki mikono yao ya kuume, basi hao hawalaumiwi.

³¹Lakini wanaotaka kinyume cha haya, basi hao ndio wanaoruka mipaka.

³²Na ambao wanazichunga amana zao na ahadi zao,

³³Na ambao wanasimama imara katika ushahidi wao,

³⁴Na ambao wanazihifadhi Sala zao.

³⁵Hao ndio watakaoheshimiwa katika Bustani ya mbinguni.

³⁶Wana nini wale waliokufuru wanakutumbulia macho tu?

³⁷Makundi kwa makundi upande wa kulia na upande wa kushoto!

³⁸Kwani kila mmoja wao anatumai kuingizwa katika Bustani ya mbinguni ya neema?

³⁹La, hasha! Hakika Sisi tumewaumba kutokana na wanachokijua.

⁴⁰Basi naapa kwa Mola Mlezi wa mashariki zote na magharibi zote kwamba Sisi tunaweza.

⁴¹Kuwabadili kwa walio bora kuliko wao; na Sisi hatushindwi.

⁴²Basi waache wapige porojo na wacheze, mpaka wakutane na siku yao wanayoahidiwa.

⁴³Siku watakapotoka makaburini kwa upesi kama kwamba wanakimbilia mfundo.

⁴⁴Macho yao yatainama, fedheha itawafunika. Hiyo ndiyo Siku waliyokuwa wakiahidiwa.