Nuh

¹Hakika Sisi tulimtuma Nuhu kwa watu wake: Kwamba waonye kaumu yako kabla ya kuwafikia adhabu chungu.

²Akasema: Enyi watu wangu! Kwa hakika mimi ni mwonyaji wa dhahiri kwenu.

³Ya kwamba mumuabudu Mwenyezi Mungu, na mumche Yeye, na mumtii.

⁴Atakughufirieni madhambi yenu, na atakuakhirisheni mpaka muda uliowekwa. Hakika muda wa Mwenyezi Mungu utapofika haucheleweshwi. Laiti mngejua!

⁵Akasema: Ee Mola wangu Mlezi! Hakika mimi nimewaita watu wangu usiku na mchana.

⁶Lakini wito wangu haukuwazidisha ila kukimbia.

⁷Na hakika mimi kila nilipowaita ili upate kuwaghufiria, walijiziba masikio yao kwa vidole vyao, na wakajigubika nguo zao, na wakakamia, na wakatakabari vikubwa mno!

⁸Tena niliwaita kwa uwazi.

⁹Kisha nikawatangazia hadharani, tena nikasema nao kwa siri.

¹⁰Nikasema: Ombeni msamaha kwa Mola wenu Mlezi; hakika Yeye ni Mwingi wa kusamehe.

¹¹Atakuleteeni mvua inyeshe mfululizo.

¹²Na atakupeni mali na wana, na atakupeni mabustani na atakufanyieni mito.

¹³Mna nini hamweki heshima ya Mwenyezi Mungu?

¹⁴Na hali Yeye kakuumbeni daraja baada ya daraja?

¹⁵Kwani hamwoni jinsi Mwenyezi Mungu alivyoziumba mbingu saba kwa matabaka?

¹⁶Na akaufanya mwezi ndani yake uwe nuru, na akalifanya jua kuwa taa?

¹⁷Na Mwenyezi Mungu amekuotesheni katika ardhi kama mimea.

¹⁸Kisha atakurudisheni humo na atakutoeni tena.

¹⁹Na Mwenyezi Mungu amekukunjulieni ardhi kama busati.

²⁰Ili mtembee humo katika njia zilizo pana.

²¹Nuhu akasema: Mola wangu Mlezi! Hakika hao wameniasi, na wamemfuata yule ambaye mali yake na wanawe hawakumzidishia ila hasara.

²²Na wakapanga vitimbi vikubwa.

²³Na wakasema: Kamwe msiiache miungu yenu, wala msimwache Wadda wala Suwaa' wala Yaghutha, wala Yau'qa, wala Nasra.

²⁴Na hao walikwisha wapoteza wengi, wala usiwazidishie waliodhulumu ila kupotea.

²⁵Basi kwa ajili ya makosa yao waligharikishwa wakaingizwa Motoni, wala hawakuwapata wa kuwanusuru badala ya Mwenyezi Mungu.

²⁶Na Nuhu akasema: Mola wangu Mlezi! Usimwache juu ya ardhi mkazi wake yeyote katika makafiri!

²⁷Hakika ukiwaacha watawapoteza waja wako, wala wao hawatazaa ila waovu makafiri.

²⁸Mola wangu Mlezi! Nighufirie mimi na wazazi wangu, na kila aliyeingia nyumbani mwangu kuwa ni mwenye kuamini, na Waumini wote wanaume, na Waumini wanawake. Na wala usiwazidishie waliodhulumu ila kupotea.