Al-Mu'minun

¹Hakika wamefaulu Waumini.

²Ambao ni wanyenyekevu katika Swala zao.

³Na ambao hujiepusha na mambo ya upuuzi.

⁴Na ambao wanatoa Zaka.

⁵Na ambao wanazilinda tupu zao.

⁶Isipokuwa kwa wake zao au kwa wale iliyowamiliki mikono yao ya kulia. Kwani hao si wenye kulaumiwa.

⁷Lakini anayetaka kinyume cha haya, basi hao ndio wavukao mipaka.

⁸Na ambao wanazitunza amana zao na maagano yao.

⁹Na ambao Swala zao wanazihifadhi.

¹⁰Hao ndio warithi.

¹¹Ambao watairithi Bustani ya Firdausi, nao watadumu humo.

¹²Na kwa yakini tumemuumba mtu kutokana na asili ya udongo.

¹³Kisha tukamfanya kuwa tone la mbegu ya uzazi katika mahali patulivu palipo madhubuti.

¹⁴Kisha tukaliumba tone hilo kuwa damu iliyoganda, na tukaiumba damu hiyo kuwa pande la nyama, kisha tukaliumba pande hilo la nyama kuwa mifupa, na mifupa hiyo tukaivisha nyama. Kisha tukamfanya kuwa kiumbe mwingine. Basi Mwenyezi Mungu ni Mwingi wa baraka, Mbora zaidi wa waumbaji.

¹⁵Kisha hakika nyinyi baada ya hayo mtakufa.

¹⁶Kisha hakika nyinyi Siku ya Kiyama mtafufuliwa.

¹⁷Na kwa yakini tumeziumba juu yenu njia saba. Nasi hatukuwa wenye kughafilika na viumbe.

¹⁸Na tumeteremsha kutoka mbinguni maji kwa kiasi na tukayatuliza katika ardhi. Na hakika Sisi tunaweza kuyaondoa.

¹⁹Kwa maji hayo tukawafanyia bustani za mitende na mizabibu, mnapata humo matunda mengi, na katika hayo mnakula.

²⁰Na mti utokao katika mlima wa Sinai, unaotoa mafuta na kuwa kitoweo kwa walao.

²¹Na hakika mnayo mazingatio makubwa katika wanyama wa kufugwa waliwao. Tunawanywesha nyinyi katika vile vilivyo matumboni mwao, na nyinyi mnapata katika hao manufaa mengi, na pia mnawala.

²²Na juu yao na juu ya marikebu mnabebwa.

²³Na hakika tulimtuma Nuhu kwa kaumu yake, akasema, "Enyi kaumu yangu! Muabuduni Mwenyezi Mungu. Nyinyi hamna mungu yeyote asiyekuwa Yeye. Basi je, hamwogopi?"

²⁴Wakasema wale wakuu waliokufuru katika kaumu yake, "Huyu si chochote isipokuwa ni mtu tu kama nyinyi. Anataka kujipa ubora juu yenu. Na lau kuwa Mwenyezi Mungu angetaka, basi kwa yakini angeliteremsha Malaika. Hatukusikia haya kwa baba zetu wa mwanzoni.

²⁵Huyu si lolote isipokuwa ni mwanamume mwenye wazimu. Basi mngojeeni tu kwa muda."

²⁶Akasema (Nuhu), "Mola wangu Mlezi! Ninusuru kwa kuwa wamenikanusha."

²⁷Tukamfunulia wahyi kwamba, "Unda jahazi mbele ya macho yetu na ufunuo wetu! Na itakapofika amri yetu na ikafurika tanuri, hapo waingize ndani yake kutoka kwa kila jozi, dume na jike, na ahali zako, isipokuwa yule ambaye katika wao juu yake imekwisha tangulia kauli. Wala usiniongeleshe kuhusu hao waliodhulumu. Kwani hao bila ya shaka watazamishwa.

²⁸Basi utakapotulia sawasawa wewe na wale walio pamoja nawe humo merikebuni, sema: Alhamdulillahi (Sifa zote njema ni za Mwenyezi Mungu), aliyetuokoa kutoka kwa kaumu madhalimu!

²⁹Na sema: Mola wangu Mlezi! Niteremshe mteremsho wenye baraka, na Wewe ndiye Mbora wa wateremshaji."

³⁰Hakika katika hayo zipo ishara. Na kwa yakini Sisi ni wenye kuwajaribu.

³¹Kisha baada yao tukaanzisha kizazi kingine.

³²Kisha tukawatumia Mtume miongoni mwao, kuwaambia: Muabuduni Mwenyezi Mungu! Hamna mungu yeyote asiyekuwa Yeye. Je, hamumchi?

³³Na wakubwa katika kaumu yake, wale waliokufuru na wakakadhibisha mkutano wa Akhera, na tukawastarehesha katika uhai wa dunia hii, walisema: Huyu si chochote isipokuwa ni mtu kama nyinyi. Anakula katika mnavyokula, na anakunywa katika mnavyokunywa.

³⁴Kwa hivyo, nyinyi mkimtii mtu kama nyinyi, basi hakika mtakuwa hasarani.

³⁵Hivi anawaahidi ati mtakapokufa na mkawa udongo na mifupa, kuwa hakika mtatolewa?

³⁶Hayawi! Hayawi hayo mnayoahidiwa.

³⁷Hapana isipokuwa uhai wetu wa duniani tu, tunakufa na kuishi tu. Wala sisi hatutafufuliwa.

³⁸Huyu si lolote isipokuwa ni mwanamume anayemzulia Mwenyezi Mungu uongo, wala sisi sio wa kumuamini.

³⁹Akasema: Mola wangu Mlezi! Ninusuru kwa sababu wananikanusha.

⁴⁰(Mwenyezi Mungu) akasema: Baada ya muda mchache watakuwa wenye kujuta.

⁴¹Basi ukawanyakua ukelele kwa haki, na tukawafanya kama takataka zinazoelea juu ya maji. Ikapotelea mbali kaumu ya madhalimu!

⁴²Kisha tukaleta baada yao vizazi vingine.

⁴³Hapana umma uwezao kutanguliza muda wake wala kuuchelewesha.

⁴⁴Kisha tukawatuma Mitume wetu, mmoja baada ya mmoja. Kila umma alipowafikia Mtume wao, walimkadhibisha. Tukawafuatanisha hawa baada ya hawa, na tukawafanya kuwa hadithi za kusimuliwa. Basi wakapotelea mbali kaumu wasioamini.

⁴⁵Kisha tukamtuma Musa na kakaye, Harun, pamoja na ishara zetu na hoja zilizo wazi.

⁴⁶Kumwendea Firauni na wakuu wake. Lakini wakatakabari, nao walikuwa kaumu majeuri.

⁴⁷Wakasema, "Je, tuwaamini watu wawili hawa kama sisi, na ambao kaumu yao ni watumwa wetu?"

⁴⁸Basi wakawakadhibisha, na wakawa miongoni mwa walioangamizwa.

⁴⁹Na hakika tulimpa Musa Kitabu ili wapate kuongoka.

⁵⁰Na tukamfanya mwana wa Mariamu na mama yake kuwa ni Ishara, na tukawapa makimbilio kwenda mahali palipoinuka penye utulivu na chemchemi za maji.

⁵¹Enyi Mitume! Kuleni vyakula vizuri na tendeni mema. Hakika Mimi ninajua vyema mnayoyatenda.

⁵²Na kwa yakini huu Umma wenu ni Umma mmoja, na Mimi ni Mola wenu Mlezi, basi nicheni Mimi.

⁵³Lakini walikatiana jambo lao mapande mbalimbali. Kila kundi likifurahia kwa waliyo nayo.

⁵⁴Basi waache katika ghafla yao kwa muda.

⁵⁵Je, wanadhani ya kuwa kwa vile tunavyowapa mali na watoto.

⁵⁶Ndiyo tunawaharakishia heri? Lakini wenyewe hawatambui.

⁵⁷Kwa hakika hao ambao kwa kumwogopa Mola wao Mlezi wananyenyekea.

⁵⁸Na wale ambao Ishara za Mola wao Mlezi wanaziamini.

⁵⁹Na wale ambao Mola wao Mlezi hawamshirikishi.

⁶⁰Na wale ambao wanatoa kile walichopewa, na hali nyoyo zao zinaogopa kwa kuwa watarejea kwa Mola wao Mlezi.

⁶¹Basi wote hao ndio wanaokimbilia mambo ya heri, na ndio watakaotangulia kuyafikia.

⁶²Na hatuitwiki nafsi isipokuwa kwa kiasi cha uwezo wake. Na tunacho kitabu kisemacho kweli. Nao hawatadhulumiwa.

⁶³Lakini nyoyo zao zimefunikwa hazitambui hayo, na wanavyo vitendo vinginevyo wanavyovifanya.

⁶⁴Hata tutakapowatia katika adhabu wale waliodekezwa kwa starehe kati yao, hapo ndipo watakapoyayatika.

⁶⁵Msiyayatike leo! Hakika nyinyi hamtanusurika kutokana nasi.

⁶⁶Hakika zilikuwa Aya zangu mkisomewa, nanyi mkirudi nyuma juu ya visigino vyenu.

⁶⁷Na huku mkiitakabari na usiku mkiizungumzia (Qur-ani) kwa dharau.

⁶⁸Je, hawakuifikiri kauli, au yamewajia ambayo hayakuwafikia baba zao wa zamani?

⁶⁹Au hawakumjua Mtume wao, ndiyo maana wanamkataa?

⁷⁰Au wanasema: Ana wazimu? Bali amewajia kwa Haki, na wengi wao wanaichukia Haki.

⁷¹Na lau kuwa Haki ingelifuata matamanio yao, basi zingeliharibika mbingu na ardhi na waliomo ndani yake. Bali tumewaletea ukumbusho wao, nao wanajitenga mbali na ukumbusho wao.

⁷²Au unawaomba ujira? Lakini ujira wa Mola wako Mlezi ni bora, na Yeye ndiye Mbora wa wanaoruzuku.

⁷³Na kwa yakini, wewe unawaita kwenye njia iliyonyooka.

⁷⁴Na hakika wale wasioiamini Akhera wanajitenga mbali na njia hiyo.

⁷⁵Na lau tungeliwarehemu na tukawaondolea shida waliyo nayo, bila ya shaka wangeliendelea katika upotovu wao, vile vile wakitangatanga.

⁷⁶Na hakika tuliwatia adhabu kali; lakini hawakuelekea kwa Mola wao Mlezi wala hawakunyenyekea.

⁷⁷Mpaka tulipowafungulia mlango wa adhabu, hapo ndipo wakawa wenye kukata tamaa.

⁷⁸Na Yeye ndiye aliyewaumbia kusikia na kuona na nyoyo za kufahamu. Ni kuchache mno kushukuru kwenu.

⁷⁹Na Yeye ndiye aliyewaeneza katika ardhi, na kwake Yeye mtakusanywa.

⁸⁰Na Yeye ndiye anayehuisha na kufisha, na ni yake Yeye mabadiliko ya usiku na mchana. Basi je, hamfahamu?

⁸¹Bali wanasema kama walivyosema watu wa kwanza.

⁸²Walisema: Je, tukishakufa tukawa udongo na mifupa, ndio tutafufuliwa?

⁸³Tuliahidiwa haya sisi na baba zetu wa zamani. Hayakuwa haya ila ni visa vya uongo vya watu wa zamani.

⁸⁴Sema: Ni ya nani ardhi na vilivyo ndani yake, kama nyinyi mnajua?

⁸⁵Watasema: Ni vya Mwenyezi Mungu! Sema: Basi, je, hamkumbuki?

⁸⁶Sema: Ni nani Mola Mlezi wa mbingu saba na Mola Mlezi wa Kiti Kikuu cha Enzi.

⁸⁷Watasema: Ni vya Mwenyezi Mungu. Sema, Basi, je, hamwogopi?

⁸⁸Sema: Ni nani mkononi mwake umo Ufalme wa kila kitu, naye ndiye anayelinda, wala hakilindwi asichotaka, kama mnajua?

⁸⁹Watasema, "Ufalme huo ni wa Mwenyezi Mungu." Sema: Basi vipi mnadanganyika?

⁹⁰Bali tumewaletea Haki, na kwa yakini hao ni waongo.

⁹¹Mwenyezi Mungu hana mwana yeyote, wala hanaye mungu mwingine. Ingekuwa hivyo basi kila mungu angelichukua alivyoumba, na baadhi yao wangeliwashinda wengine. Mwenyezi Mungu ameepukana na sifa wanazomsifu.

⁹²Yeye ndiye ajuaye siri na dhahiri, na ametukuka juu ya hayo wanayomshirikisha nayo.

⁹³Sema: Mola wangu Mlezi! Ukinionyesha adhabu waliyoahidiwa.

⁹⁴Mola wangu Mlezi! Usinifanye katika hao watu madhalimu.

⁹⁵Na hakika Sisi ni waweza wa kukuonyesha tuliyowaahidi.

⁹⁶Kinga maovu kwa kutenda yaliyo mema zaidi. Sisi tunayajua vyema wayasemayo.

⁹⁷Na sema: Mola wangu Mlezi! Ninajikinga kwako kutokana na wasiwasi wa mashetani.

⁹⁸Na ninajikinga kwako, Mola wangu Mlezi, wasinikaribie.

⁹⁹Mpaka yanapomfikia mmoja wao mauti, husema: "Mola wangu Mlezi! Nirudishe.

¹⁰⁰Ili nitende mema sasa badala ya yale niliyoyaacha." Wapi! Hii ni kauli aisemayo yeye tu. Na nyuma yao kipo kizuizi mpaka siku watakapofufuliwa.

¹⁰¹Basi litakapopulizwa baragumu, hapo hautakuwapo ujamaa baina yao siku hiyo, wala hawataulizana.

¹⁰²Ama wale ambao mizani zao zitakuwa nzito, hao ndio wenye kufanikiwa.

¹⁰³Na wale ambao mizani zao zitakuwa nyepesi, hao ndio waliozitia hasarani nafsi zao, na katika Jahannamu watadumu.

¹⁰⁴Moto utababua nyuso zao, nao watakuwa na nyuso zilizo kunjana.

¹⁰⁵Je, hazikuwa Aya zangu mkisomewa, na nyinyi mkizikanusha?

¹⁰⁶Watasema: Mola wetu Mlezi! Tulizidiwa na uovu wetu na tukawa watu tuliopotea.

¹⁰⁷Mola wetu Mlezi! Tutoe humu Motoni. Na tukirudia tena (ya zamani), basi kweli sisi ni wenye kudhulumu.

¹⁰⁸Atasema Mwenyezi Mungu: Tokomeeni humo, wala msinisemeshe.

¹⁰⁹Bila ya shaka lilikuwapo kundi katika waja wangu likisema: Mola wetu Mlezi! Tumeamini; basi tusamehe na uturehemu, nawe ndiwe Mbora wa wanaorehemu.

¹¹⁰Lakini nyinyi mliwakejeli hata wakakusahaulisheni kunikumbuka, na mlikuwa mkiwacheka.

¹¹¹Hakika Mimi leo nimewalipa kwa vile walivyosubiri. Bila ya shaka hao ndio wenye kufuzu.

¹¹²Atasema: Mlikaa muda gani katika ardhi kwa hisabu ya miaka?

¹¹³Watasema: Tulikaa siku moja au sehemu ya siku. Basi waulize wanaoweka hisabu.

¹¹⁴Atasema: Nyinyi hamkukaa huko duniani ila kidogo, laiti ingelikuwa mnajua.

¹¹⁵Je, mlidhani ya kwamba tuliwaumba bure, na ya kwamba nyinyi kwetu hamtarudishwa?

¹¹⁶Ametukuka Mwenyezi Mungu, Mfalme wa Haki. Hakuna mungu yeyote isipokuwa Yeye, Mola Mlezi wa Kiti cha Enzi Kitukufu.

¹¹⁷Na anayemuomba - pamoja na Mwenyezi Mungu - mungu mwenginewe, hana ushahidi wa hili; basi bila ya shaka hisabu yake iko kwa Mola wake Mlezi. Kwa hakika makafiri hawafanikiwi.

¹¹⁸Nawe sema, "Mola wangu Mlezi, samehe na urehemu nawe ni Mbora wa wanaorehemu."