Al-Hijr

¹Alif Lam Ra.[1] Hizi ni Aya za Kitabu na Qur-ani inayobainisha.

²Huenda ikawa wale waliokufuru wakatamani kwamba wangekuwa Waislamu.

³Waache wale, na wastarehe, na yawazuge matumaini. Basi watakujajua.

⁴Na hatukuuangamiza mji wowote ule isipokuwa ulikuwa na muda wake maalumu ulioandikiwa.

⁵Hawawezi umma wowote kuutangulia muda wao, wala kuchelewa.

⁶Na walisema, "Ewe uliyeteremshiwa Ukumbusho! Hakika wewe ni mwendawazimu.

⁷Mbona hutuletei Malaika ikiwa wewe ni miongoni mwa wakweli?"

⁸Sisi hatuwateremshi Malaika isipokuwa kwa sababu ya haki, na hapo hawatapewa muhula.

⁹Hakika Sisi ndio tuliouteremsha Ukumbusho huu, na hakika Sisi ndio tutakaoulinda.

¹⁰Na hakika tulikwishatuma Mitume kabla yako kwa mataifa ya mwanzo.

¹¹Na hakuwajia Mtume yeyote isipokuwa walikuwa wakimfanyia stihizai.

¹²Na kama hivi ndivyo tunavyoyaingiza katika nyoyo za wahalifu.

¹³Hawayaamini haya, na ilhali imekwishawapitia desturi ya wa mwanzo.

¹⁴Na lau tungeliwafungulia mlango huko mbinguni, wakawa wanapanda kupitia humo,

¹⁵Basi wangelisema: Hakika macho yetu yameleweshwa tu. Bali sisi wenyewe ni kaumu tuliofanyiwa uchawi.

¹⁶Na hakika tumeweka katika mbingu vituo vya sayari, na tumezipamba kwa wenye kuangalia.

¹⁷Na tumezilinda kutokana na kila shetani aliyelaaniwa.

¹⁸Isipokuwa mwenye kusikiliza kwa kuibia, naye hufuatwa na kijinga cha moto kilicho dhahiri.

¹⁹Na ardhi tumeitandaza, na humo tumeweka milima madhubuti, na tumeotesha ndani yake katika kila kitu kwa kiasi chake.

²⁰Na tumewafanyia humo vitu vya maisha yenu, na ya hao ambao nyinyi sio wenye kuwaruzuku.

²¹Na hakuna chochote ila asili yake inatokana na Sisi; wala hatukiteremshi isipokuwa kwa kipimo maalumu.

²²Na tunazipeleka pepo za kupandishia, na tunateremsha kutoka mbinguni maji, kisha tukakunywesheni maji hayo. Wala si nyinyi mnayoyaweka.

²³Na hakika Sisi ndio tunaohuisha na tunaofisha. Na Sisi ndio Warithi.

²⁴Na hakika tunawajua waliotangulia katika nyinyi, na tunawajua waliobaki nyuma.

²⁵Na hakika Mola wako Mlezi ndiye atakayewakusanya. Hakika Yeye ni Mwenye hekima, Mwenye kujua mno.

²⁶Na hakika tulimuumba Mtu kwa udongo unaotoa sauti, unaotokana na matope yaliyotiwa sura.

²⁷Naye Jini tulimuumba hapo kabla kutokana na moto wa upepo umoto.

²⁸Na Mola wako Mlezi alipowaambia Malaika: Hakika Mimi nitamuumba mtu kwa udongo unaotoa sauti, unaotokana na matope yaliyotiwa sura.

²⁹Basi nitakapomtengeneza sawasawa, na nikampulizia katika roho yangu, basi angukeni kumsujudia.

³⁰Basi Malaika wote pamoja walimsujudia.

³¹Isipokuwa Iblisi. Yeye alikataa kuwa pamoja na waliosujudu.

³²(Mwenyezi Mungu) akasema: Ewe Iblisi! Una nini hata hukuwa pamoja na waliosujudu?

³³Akasema: Haiwi mimi nimsujudie mtu uliyemuumba kutokana na udongo unaotoa sauti, unaotokana na matope yaliyotiwa sura.

³⁴(Mwenyezi Mungu) akasema: Basi toka humo, kwani hakika wewe umefukuziliwa mbali!

³⁵Na hakika juu yako ipo laana mpaka Siku ya Malipo.

³⁶Akasema (Iblisi): Mola wangu Mlezi! Nipe muhula mpaka siku watakapofufuliwa.

³⁷(Mwenyezi Mungu) akasema: Hakika wewe ni katika waliopewa muhula.

³⁸Mpaka siku ya wakati maalumu.

³⁹Akasema: Mola wangu Mlezi! Ilivyokuwa umenipoteza, basi hakika nitawapambia katika dunia na hakika nitawapoteza wote.

⁴⁰Isipokuwa waja wako walioteuliwa miongoni mwao.

⁴¹Akasema: Hii ni njia ya kujia kwangu iliyonyooka.

⁴²Hakika waja wangu, wewe hutakuwa na mamlaka juu yao, isipokuwa wale watakaokufuata miongoni mwa wapotovu.

⁴³Na hakika Jahannamu ndipo mahali pao walipoahidiwa wote.

⁴⁴Ina milango saba; kila mlango ulitengewa sehemu miongoni mwao.

⁴⁵Hakika wacha Mungu watakuwa katika Mabustani na chemchemi.

⁴⁶(Wataambiwa:) Ingieni humo kwa salama na amani.

⁴⁷Na tutaondoa chuki iliyokuwa vifuani mwao, wawe ndugu, juu ya viti vya kifahari huku wameelekeana.

⁴⁸Humo hayatawagusa machovu, wala hawatatolewa humo.

⁴⁹Wape habari waja wangu ya kwamba Mimi ndiye Mwenye kusamehe zaidi, Mwingi wa kurehemu.

⁵⁰Na kwamba adhabu yangu ndiyo adhabu iliyo chungu!

⁵¹Na wape habari za wageni wa Ibrahim.

⁵²Walipoingia kwake na wakasema: Salama! Yeye akasema: Hakika sisi tunawaogopa.

⁵³Wakasema: Usiogope. Hakika, Sisi tunakubashiria kijana mwenye elimu mno.

⁵⁴Akasema: Mnanibashiria nami uzee umenishika! Basi ni kwa njia gani mnanibashiria?

⁵⁵Wakasema: Tunakubashiria kwa haki, basi usiwe miongoni mwa wanaokata tamaa.

⁵⁶Akasema: Na ni nani anayekata tamaa na rehema ya Mola wake Mlezi isipokuwa wapotovu?

⁵⁷Akasema: Hebu mna jambo gani, enyi wajumbe?

⁵⁸Wakasema: Hakika sisi tumetumwa kwa kaumu ya wahalifu!

⁵⁹Isipokuwa watu wa familia ya Lut'. Bila ya shaka sisi tutawaokoa hao wote.

⁶⁰Isipokuwa mkewe. Tumekwishapitisha kwamba huyo hakika atakuwa miongoni mwa watakaosalia nyuma.

⁶¹Basi wajumbe hao walipowajia watu wa familia ya Lut'.

⁶²(Lut') Alisema: Hakika nyinyi ni kaumu msiojulikana.

⁶³Wakasema: Bali sisi tumekuletea yale waliyokuwa wakiyafanyia shaka.

⁶⁴Na tumekujia kwa Haki, na hakika sisi ni wakweli.

⁶⁵Basi ondoka na ahali zako usiku ungalipo, nawe ufuate nyuma yao, wala yeyote kati yenu asigeuke nyuma. Na mwende huko mnakoamrishwa.

⁶⁶Na tukamfunulia hukumu hiyo, ya kwamba hata wa mwisho wao hao ikifika asubuhi atakuwa amekwishakatiliwa mbali.

⁶⁷Na wakaja watu wa mji huo huku wamefurahi mno.

⁶⁸Akasema: Hakika hawa ni wageni wangu. Basi msinifedheheshe.

⁶⁹Na mcheni Mwenyezi Mungu, wala msinihizi.

⁷⁰Wakasema: Kwani hatukukukataza (kuwakaribisha) walimwengu hawa?

⁷¹Akasema, "Hawa binti zangu (waoeni)[1], ikiwa nyinyi ni watendaji."

⁷²Ninaapa kwa uhai wako! Hakika hao walikuwa katika ulevi wao, wakihangaika ovyo.

⁷³Basi ukelele ukawatwaa wakipambaukiwa.

⁷⁴Kwa hivyo, tukaugeuza mji huo juu chini, na tukawanyeshea mvua ya mawe ya udongo wa kutoka Motoni.

⁷⁵Hakika katika hayo zipo ishara kwa wanaotafakari na kuzingatia.

⁷⁶Na hakika miji hii ipo kwenye njia wazi inayopitiwa.

⁷⁷Hakika katika hayo ipo ishara kwa Waumini.

⁷⁸Na hakika watu wa Kichakani walikuwa madhalimu.

⁷⁹Kwa hivyo tukawaadhibu. Na hakika miji miwili hii iko kwenye njia iliyo wazi.

⁸⁰Na bila ya shaka wakazi wa Hijr waliwakadhibisha Mitume.

⁸¹Na tuliwaletea ishara zetu, nao wakawa wanazipa migongo.

⁸²Nao walikuwa wakichonga majumba katika milima kwa amani.

⁸³Basi ukelele ukawatwaa asubuhi.

⁸⁴Na hayakuwafaa yale waliyokuwa wakiyachuma.

⁸⁵Na hatukuziumba mbingu na ardhi na vilivyo kati yake isipokuwa kwa haki. Na hakika Saa ya Kiyama itafika. Basi samehe msamaha mzuri.

⁸⁶Hakika Mola wako Mlezi ndiye Muumbaji, Mwenye kujua zaidi.

⁸⁷Na hakika tumekupa (aya) saba zinazosomwa mara kwa mara, na Qur-ani Tukufu.

⁸⁸Kamwe usivinyoshee macho yako vitu tulivyowastarehesha kwavyo makundi fulani kati yao, wala usiwahuzunikie. Na wainamishie bawa lako (la huruma) Waumini.

⁸⁹Na sema: Hakika mimi ndiye mwonyaji mwenye kubainisha.

⁹⁰Kama hivyo tuliwateremshia waliogawa.

⁹¹Ambao waliifanya Qur-ani vipande vipande.

⁹²Basi ninaapa kwa Mola wako Mlezi! Lazima tutawauliza wote.

⁹³Kuhusu yale waliyokuwa wakiyatenda.

⁹⁴Basi wewe yadhihirishe yale uliyoamrishwa, na jitenge mbali na washirikina.

⁹⁵Hakika Sisi tunatosha kukukinga kutokana na wanaofanya stihizai.

⁹⁶Ambao wanafanya mungu mwingine kuwa pamoja na Mwenyezi Mungu. Basi watakujajua!

⁹⁷Na Sisi tunajua kwa hakika kuwa wewe kifua chako kinaona dhiki kwa hayo wayasemayo.

⁹⁸Basi mtakase Mola wako Mlezi kwa kumsifu, na uwe miongoni mwa wanaomsujudia.

⁹⁹Na muabudu Mola wako Mlezi mpaka ikufikie Yakini.