Al-Qalam

¹Nuun. Ninaapa kwa kalamu na yale wayaandikayo.[1]

²Kwa neema ya Mola wako Mlezi wewe si mwendawazimu.

³Na kwa hakika wewe una malipo yasiyokatika.

⁴Na hakika wewe una tabia tukufu.

⁵Karibu utaona, na wao wataona.

⁶Ni nani kati yenu aliyepandwa na wazimu.

⁷Hakika Mola wako Mlezi ndiye ajuaye zaidi ni nani aliyeipotea njia yake, na Yeye ndiye anayewajua zaidi walioongoka.

⁸Basi usiwatii wanaokadhibisha.

⁹Walitamani lau ungelainisha ili nao wakulainishie.

¹⁰Wala usimtii kila mwingi wa kuapa, anayedharauliwa.

¹¹Mwenye kukejeli mno, anayetangatanga akieneza maneno ya kufitini.

¹²Mwenye kuzuia mno heri, dhalimu, mwingi wa madhambi.

¹³Mkatili, na juu ya hayo, ni mshari aliyejipachika tu.

¹⁴Ati kwa kuwa ana mali na watoto!

¹⁵Anaposomewa Aya zetu, husema: "(Hizi ni) simulizi za uongo za watu wa zamani!"

¹⁶Tutamtia alama kwenye pua yake.

¹⁷Hakika tuliwajaribu hawa kama tulivyowajaribu wale wenye shamba, walipoapa kwamba lazima watayavuna mazao yake itakapokuwa asubuhi.

¹⁸Wala hawakusema: "Mwenyezi Mungu akipenda!"

¹⁹Basi lilitokea tukio juu yake kutoka kwa Mola wako Mlezi, nao wamelala!

²⁰Likawa kama usiku wa giza.

²¹Kisha asubuhi wakaitana.

²²Ya kwamba: "Nendeni mapema kondeni mwenu ikiwa mnataka kuvuna."

²³Basi walikwenda huku wananong'onezana.

²⁴Ya kuwa: "Leo kamwe masikini mmoja asikuingilieni."

²⁵Na walikwenda asubuhi, nao wameshikilia azimio hilo.

²⁶Basi walipoliona, wakasema: Hakika tumepotea!

²⁷Bali tumenyimwa!

²⁸Mbora wao akasema: Sikukwambieni, kwa nini hamumtakasi Mwenyezi Mungu?

²⁹Wakasema: Ametakasika Mola wetu Mlezi! Hakika sisi tulikuwa wenye kudhulumu.

³⁰Basi wakaelekeana kulaumiana wao kwa wao.

³¹Wakasema: Ole wetu! Hakika sisi tulikuwa tumeikiuka mipaka!

³²Asaa Mola wetu Mlezi akatubadilishia lililo bora kuliko hili. Hakika sisi ni wenye kurejea kwa Mola wetu Mlezi.

³³Namna hivi yanakuwa mateso, na bila ya shaka mateso ya Akhera ni makubwa zaidi, laiti wangelijua!

³⁴Hakika wacha Mungu watakuwa na Bustani za neema kwa Mola wao Mlezi.

³⁵Kwani tutawafanya Waislamu kama wahalifu?

³⁶Mna nini? Mnahukumu vipi?

³⁷Au mnacho kitabu ambacho ndani yake mnasoma?

³⁸Kuwa mtapata humo mnayoyapenda?

³⁹Au mnazo ahadi za viapo juu yetu za kufika Siku ya Kiyama ya kuwa hakika mtapata kila mnayojihukumia?

⁴⁰Waulize: Ni nani miongoni mwao mdhamini wa haya?

⁴¹Au wanao washirika? Basi wawalete washirika wao wakiwa wanasema kweli.

⁴²Siku utakapowekwa wazi muundi, na wataitwa kusujudu, lakini hawataweza

⁴³Macho yao yatainama chini, fedheha itawafunika. Na hakika walikuwa wakiitwa wasujudu walipokuwa wazima.

⁴⁴Basi niache na wanaokadhibisha maneno haya! Tutawavutia kidogo kidogo kutokea mahali wasipopajua.

⁴⁵Na ninawapururia muhula; hakika hila zangu ni imara.

⁴⁶Au unawaomba ujira, na wao wanaemewa na gharama hiyo?

⁴⁷Au iko kwao siri, basi wao wanaiandika?

⁴⁸Basi ingojee hukumu ya Mola wako Mlezi, wala usiwe kama mmezwa na samaki, aliponadi naye kazongwa.

⁴⁹Kama isingelimfikia neema kutoka kwa Mola wake Mlezi, bila ya shaka angelitupwa ufukweni naye ni mwenye kulaumiwa.

⁵⁰Lakini Mola wake Mlezi alimteua na akamfanya miongoni mwa watu wema.

⁵¹Na waliokufuru hukaribia kukutelezesha kwa macho yao, wanaposikia mawaidha, na wanasema: Hakika yeye ni mwendawazimu.

⁵²Na hayakuwa haya, ila ni ukumbusho kwa walimwengu wote.