Al-Waqi'ah

¹Litakapotokea hilo Tukio.

²Hapana cha kukanusha kutokea kwake.

³Literemshalo linyanyualo.

⁴Itakapotikiswa ardhi kwa mtikiso.

⁵Na milima itakaposagwasagwa.

⁶Basi iwe mavumbi yanayopeperushwa.

⁷Na nyinyi mtakuwa namna tatu.

⁸Basi watakuwepo wa kuliani; je, ni wepi wa kuliani?

⁹Na wa kushotoni; je, ni wepi wa kushotoni?

¹⁰Na wa mbele watakuwa mbele.

¹¹Hao ndio watakaowekwa karibu (na Mwenyezi Mungu).

¹²Katika Bustani zenye neema.

¹³Fungu kubwa katika wa mwanzo.

¹⁴Na wachache katika wa mwisho.

¹⁵Watakuwa juu ya viti vya fakhari vilivyotonewa.

¹⁶Wakiviegemea wakielekeana.

¹⁷Wakitumikiwa na wavulana wa ujana wa milele.

¹⁸Kwa vikombe na mabirika na bilauri za vinywaji kutoka chemchemi safi.

¹⁹Hawataumwa kichwa kwa vinywaji hivyo wala hawatoleweshwa.

²⁰Na matunda wayapendayo.

²¹Na nyama za ndege kama wanavyotamani.

²²Na Mahurulaini.

²³Walio kama mfano wa lulu zilizohifadhiwa.

²⁴Ni malipo kwa waliyokuwa wakiyatenda.

²⁵Humo hawatasikia porojo wala maneno ya dhambi.

²⁶Isipokuwa maneno ya Salama, Salama.

²⁷Na wale wa mkono wa kulia, ni yepi yatakuwa ya wa kuliani?

²⁸Katika mikunazi isiyo na miba.

²⁹Na migomba iliyopangiliwa.

³⁰Na kivuli kilichotanda.

³¹Na maji yanayomiminika.

³²Na matunda mengi.

³³Hayatindikii wala hayakatazwi.

³⁴Na matandiko yaliyonyanyuliwa.

³⁵Hakika Sisi tutawaumba (Mahurulaini) upya.

³⁶Na tutawafanya vijana.

³⁷Wanapendana na waume zao, hirimu moja.

³⁸Kwa ajili ya watu wa kuliani.

³⁹Fungu kubwa katika wa mwanzo.

⁴⁰Na fungu kubwa katika wa mwisho.

⁴¹Na watu wa kushotoni; je ni yepi ya wa kushotoni?

⁴²Katika upepo wa moto, na maji yanayochemka.

⁴³Na kivuli cha moshi mweusi.

⁴⁴Si baridi wala cha kustarehesha.

⁴⁵Hakika hao walikuwa kabla ya haya wakiishi maisha ya anasa.

⁴⁶Na walikuwa wakiendelea tu kufanya madhambi makubwa.

⁴⁷Na walikuwa wakisema: 'Tutakapokufa na tukawa udongo na mafupa, ati ndiyo tutafufuliwa?

⁴⁸Au baba zetu wa zamani?'

⁴⁹Sema: 'Hakika wa zamani na wa mwisho.'

⁵⁰Bila ya shaka watakusanywa kwa wakati wa siku maalumu.

⁵¹Kisha nyinyi, mliopotea, mnaokanusha.

⁵²Kwa yakini mtakula mti wa Zaqqumu.

⁵³Na kwa mti huo mtajaza matumbo.

⁵⁴Na juu yake mtakunywa maji yanayochemka.

⁵⁵Tena mtakunywa kama wanavyokunywa ngamia wenye kiu.

⁵⁶Hiyo ndiyo karamu yao ya kuwakaribisha Siku ya Malipo.

⁵⁷Sisi tumekuumbeni; basi hamsadiki?

⁵⁸Je, mnaiona mbegu ya uzazi mnayoidondokesha?

⁵⁹Je, mnaiumba nyinyi, au ni Sisi ndio Waumbaji?

⁶⁰Sisi tumekuwekeeni mauti; na wala Sisi hatushindwi.

⁶¹Kuwaleta wengine badala yenu na kukuumbeni nyinyi kwa umbo msilolijua.

⁶²Na bila ya shaka mlikwisha jua umbo la kwanza, basi kwa nini hamkumbuki?

⁶³Je, mnaona hivyo mnavyovipanda?

⁶⁴Je, ni nyinyi mnayoyaotesha au ni Sisi ndio wenye kuotesha?

⁶⁵Tungelitaka, tungeliyafanya yakawa mapepe, mkabaki mnastaajabu.

⁶⁶Mkisema: 'Hakika sisi tumegharimika.'

⁶⁷Bali sisi tumenyimwa.

⁶⁸Je, mnayaona maji mnayoyanywa?

⁶⁹Je, ni nyinyi mnaoyateremsha kutoka mawinguni au ni Sisi ndio wenye kuyateremsha?

⁷⁰Tungelipenda, tungeliyafanya ya chumvi. Basi mbona hamshukuru?

⁷¹Je, mnauona moto mnaouwasha?

⁷²Ni nyinyi mliouumba mti wake au Sisi ndio Waumbaji?

⁷³Sisi tumeufanya uwe ni ukumbusho na manufaa kwa walioko nyikani.

⁷⁴Basi litakase jina la Mola wako Mlezi aliye Mkuu.

⁷⁵Basi ninaapa kwa maanguko ya nyota.

⁷⁶Na hakika bila ya shaka hiki ni kiapo kikubwa, laiti mngelijua!

⁷⁷Hakika hii bila ya shaka ni Qur-ani Tukufu.

⁷⁸Katika Kitabu kilichohifadhiwa.

⁷⁹Hapana akigusaye ila waliotakaswa.

⁸⁰Ni uteremsho unaotoka kwa Mola Mlezi wa walimwengu wote.

⁸¹Ni maneno haya ndiyo nyinyi mnayapuuza?

⁸²Na badala ya kushukuru kwa riziki yenu mnafanya kuwa mnakadhibisha?

⁸³Yawaje basi itakapofika roho kwenye koo.

⁸⁴Na nyinyi wakati huo mnatazama!

⁸⁵Na Sisi tuko karibu zaidi naye kuliko nyinyi, lakini hamuoni.

⁸⁶Na lau kuwa nyinyi hamtalipwa.

⁸⁷Kwa nini hamuirudishi hiyo roho, ikiwa nyinyi mnasema kweli?

⁸⁸Kwa hivyo, akiwa miongoni mwa wale walio karibu na Mwenyezi Mungu.

⁸⁹Basi ni raha, na manukato, na Bustani zenye neema.

⁹⁰Na akiwa katika wale wa upande wa kulia.

⁹¹Basi ni Salamu kwako uliye miongoni mwa wale wa upande wa kulia.

⁹²Na ama akiwa katika wale waliokadhibisha, wapotovu.

⁹³Basi karamu ya makaribisho yake ni maji yanayochemka.

⁹⁴Na kutiwa Motoni.

⁹⁵Hakika hii ndiyo haki yenye yakini.

⁹⁶Basi litakase jina la Mola wako Mlezi aliye Mkuu.