'Abasa

¹Alikunja kipaji na akageuka mbali.

²Kwa sababu alimjia kipofu!

³Na nini kitakachokujulisha pengine yeye atatakasika?

⁴Au atawaidhika, na mawaidha yamfae?

⁵Ama ajionaye hana haja,

⁶Wewe ndiyo unamshughulikia?

⁷Na si juu yako kama hakutakasika.

⁸Ama anayekujia kwa juhudi.

⁹Naye anaogopa,

¹⁰Ndiyo wewe unampuuza?

¹¹Sivyo hivyo! Huku ni kukumbushana.

¹²Basi anayependa akumbuke.

¹³Yamo katika kurasa zilizoheshimiwa.

¹⁴Zilizoinuliwa, zilizotakaswa.

¹⁵Zimo mikononi mwa Malaika waandishi,

¹⁶Watukufu, wema.

¹⁷Ameangamia mwanadamu! Nini kinachomkufurisha?

¹⁸Kwa kitu gani amemuumba?

¹⁹Kwa tone la manii, amemuumba na akamkadiria.

²⁰Kisha akamsahilishia njia.

²¹Kisha akamfisha, akamtia kaburini.

²²Kisha apendapo atamfufua.

²³La! Hajamaliza aliyomuamuru.

²⁴Hebu mtu na atazame chakula chake.

²⁵Hakika Sisi tumemimina maji kwa nguvu.

²⁶Tena tukaipasua pasua ardhi kwa nguvu.

²⁷Kisha tukaotesha humo nafaka.

²⁸Na zabibu, na mimea ya majani.

²⁹Na mizaituni, na mitende.

³⁰Na bustani zenye miti iliyosongana barabara.

³¹Na matunda, na malisho ya wanyama.

³²Kwa manufaa yenu na mifugo yenu.

³³Basi utakapokuja Ukelele.

³⁴Siku ambayo mtu atamkimbia nduguye.

³⁵Na mamaye na babaye.

³⁶Na mkewe na wanawe.

³⁷Kila mtu miongoni mwao siku hiyo atakuwa na lake la kumtosha.

³⁸Siku hiyo ziko nyuso zitakazonawiri.

³⁹Zitacheka, zitachangamka.

⁴⁰Na nyuso siku hiyo zitakuwa na mavumbi.

⁴¹Giza totoro litazifunika.

⁴²Hao ndio makafiri watenda maovu.