An-Nazi'at

¹Ninaapa kwa wanaokomoa kwa nguvu.

²Na kwa wanaotoa kwa upole.

³Na wanaoogelea sawasawa.

⁴Wakishindana mbio kweli kweli.

⁵Wakidabiri mambo.

⁶Siku kitakapotetemeka cha kutetemeka.

⁷Kifuate cha kufuatia.

⁸Siku hiyo nyoyo zitapigapiga.

⁹Macho yatainama chini.

¹⁰Sasa wanasema: Ati kweli tutarudishwa kwenye hali ya kwanza?

¹¹Hata tukiwa mifupa iliyobunguliwa?

¹²Wanasema: Basi marejeo hayo ni yenye hasara!

¹³Kwa hakika hayo ni ukelele mmoja tu.

¹⁴Mara watakuwa kwenye Uwanda wa mkutano!

¹⁵Je! Imekufikia hadithi ya Musa?

¹⁶Mola wake Mlezi alipomwita katika bonde takatifu la Tuwaa, akamwambia:

¹⁷Nenda kwa Firauni. Hakika yeye amezidi jeuri.

¹⁸Umwambie: Je! Unapenda kujitakasa?

¹⁹Nami nitakuongoza ufike kwa Mola wako Mlezi, upate kumcha.

²⁰Basi alimwonyesha Ishara kubwa.

²¹Lakini alikadhibisha na akaasi.

²²Kisha alirudi nyuma, akaingia kufanya juhudi.

²³Akakusanya watu akanadi.

²⁴Akasema: Mimi ndiye Mola wenu Mlezi mkuu kabisa.

²⁵Basi hapo Mwenyezi Mungu akamshika kumuadhibu kwa la mwisho na la mwanzo.

²⁶Kwa hakika katika haya yapo mazingatio kwa wanaoogopa Mwenyezi Mungu.

²⁷Je, ni vigumu zaidi kukuumbeni nyinyi au mbingu? Yeye ndiye aliyeijenga!

²⁸Akainua paa lake, na akaitengeneza vizuri.

²⁹Na akautia giza usiku wake, na akautokeza mchana wake.

³⁰Na juu ya hivyo ameitandaza ardhi.

³¹Akatoa ndani yake maji yake na malisho yake.

³²Na milima akaisimamisha imara.

³³Kwa manufaa yenu na mifugo yenu.

³⁴Basi itakapofika hiyo Balaa kubwa,

³⁵Siku ambayo mtu atakumbuka aliyoyafanya,

³⁶Na Jahannamu itadhihirishwa kwa mwenye kuona,

³⁷Basi ama yule aliyezidi ujeuri,

³⁸Na akakhiari maisha ya dunia,

³⁹Kwa hakika Jahannamu ndiyo makazi yake!

⁴⁰Na ama yule anayeogopa kusimamishwa mbele ya Mola wake Mlezi, na akajizuilia nafsi yake na matamanio,

⁴¹Basi huyo, Bustani ya mbinguni itakuwa ndiyo makazi yake!

⁴²Wanakuuliza Saa (ya Kiyama) itakuwa lini?

⁴³Una nini wewe hata uitaje?

⁴⁴Kwa Mola wako Mlezi ndio mwisho wake.

⁴⁵Kwa hakika wewe ni mwonyaji tu kwa mwenye kuihofu.

⁴⁶Ni kama kwamba wao siku watakapoiona (hiyo Saa) hawakukaa ila jioni moja tu, au mchana wake.