Al-Muzzammil

¹Ewe uliyejifunika!

²Kesha usiku kucha, ila kidogo tu!

³Nusu yake, au ipunguze kidogo.

⁴Au izidishe - na soma Qur-ani kwa utaratibu na utungo.

⁵Hakika Sisi tutakuteremshia kauli nzito.

⁶Hakika kuamka usiku kunawafikiana zaidi na moyo, na maneno yake yanatua zaidi.

⁷Kwani hakika mchana una shughuli nyingi.

⁸Na lidhukuru jina la Mola wako Mlezi, na ujitolee kwake kwa ukamilifu.

⁹Mola Mlezi wa mashariki na magharibi, hapana mungu isipokuwa Yeye, basi mfanye kuwa Mtegemewa wako.

¹⁰Na vumilia hayo wayasemayo, na jitenge nao kwa vizuri.

¹¹Na niache Mimi na hao wanaokanusha, walioneemeka; na wape muhula kidogo!

¹²Hakika Sisi tunazo pingu nzito na Moto unaowaka kwa ukali kabisa!

¹³Na chakula kinachokwama kooni, na adhabu inayoumiza.

¹⁴Siku ambayo ardhi itatikiswa na milima pia, na milima itakuwa kama tifutifu la mchanga!

¹⁵Hakika Sisi tumemtuma kwenu Mtume aliye shahidi juu yenu, kama tulivyomtuma Mtume kwa Firauni.

¹⁶Lakini Firauni alimuasi huyo Mtume, basi tukamshika mshiko wa mateso.

¹⁷Basi nyinyi mkikufuru, mtawezaje kujikinga na Siku ambayo itawafanya watoto wadogo waote mvi?

¹⁸Hapo mbingu zitapasuka kwa sababu yake! Ahadi yake itakuwa imetekelezwa.

¹⁹Kwa hakika hili ni kumbusho. Mwenye kutaka atashika Njia ya kwendea kwa Mola wake Mlezi.

²⁰Hakika Mola wako Mlezi anajua ya kuwa hakika wewe unakesha karibu na thuluthi mbili za usiku, na nusu yake, na thuluthi yake. Na baadhi ya watu walio pamoja nawe kadhalika. Na Mwenyezi Mungu ndiye anayeukadiria usiku na mchana. Anajua kuwa hamwezi kuweka hisabu, basi amekusameheni. Basi someni kilicho chepesi katika Qur-ani. Anajua ya kuwa baadhi yenu watakuwa wagonjwa, na wengine wanasafiri katika ardhi wakitafuta fadhila ya Mwenyezi Mungu, na wengine wanapigana katika Njia ya Mwenyezi Mungu. Kwa hivyo someni kilicho chepesi humo, na mshike Sala, na toeni Zaka, na mkopesheni Mwenyezi Mungu mkopo mwema. Na kheri yoyote mnayoitanguliza kwa ajili ya nafsi zenu mtaikuta kwa Mwenyezi Mungu, imekuwa bora zaidi, na ina thawabu kubwa sana. Na mtakeni msamaha Mwenyezi Mungu. Hakika Mwenyezi Mungu ni Mwenye kusamehe, Mwenye kurehemu.