At-Takwir

¹Günəş büküləcəyi zaman;

²ulduzlar (sönüb yerə) töküləcəyi zaman;

³dağlar hərəkətə gətiriləcəyi zaman;

⁴boğaz dəvələr başlı-başına qalacaqları zaman;

⁵vəhşi heyvanlar bir yerə toplanacağı zaman;

⁶dənizlər alovlanacağı zaman;

⁷nəfislər (öz tayına) qovuşdurulacağı zaman;

⁸diri-diri (torpağa) basdırılmış qız (uşağı) soruşulacağı zaman –

⁹hansı günaha görə öldürülmüşdür;

¹⁰səhifələr (əməl dəftərləri) açılacağı zaman;

¹¹göy (yerindən) qopardılacağı zaman;

¹²Cəhənnəm alovlandırılacağı zaman

¹³Cənnət (möminlərə) yaxınlaşdırılacağı zaman;

¹⁴hər kəs (bu gün üçün özünə) nə tədarük etdiyini biləcəkdir.

¹⁵And içirəm (gecə çıxıb gündüz) batan ulduzlara,

¹⁶seyr edib gizlənən səyyarələrə,

¹⁷qaralmaqda olan gecəyə,

¹⁸açılmaqda olan səhərə!

¹⁹Bu (Quran) möhtərəm bir elçinin (Cəbrailin) sözüdür.

²⁰(O elçi ki,) qüvvətlidir, Ərşin sahibi yanında (böyük) hörmət sahibidir.

²¹Orada (mələklər arasında) itaət ediləndir, (vəhyi çatdırmaqda) etibarlıdır.

²²Sizin yoldaşınız (Muhamməd) dəli deyildir.

²³O, (Cəbraili) aydın üfüqdə gördü.

²⁴O, qeyb barəsində paxıl deyildir (qeybi xəbərləri sizdən əsirgəməz).

²⁵Bu (Quran) daşqalaq olunmuş şeytanın sözü də deyildir.

²⁶Elə isə (ondan üz döndərib) hara gedirsiniz?

²⁷Bu (Quran), aləmlərə yalnız bir öyüd-nəsihətdir.

²⁸Sizlərdən doğru yolda olmaq istəyənlər üçün.

²⁹Aləmlərin Rəbbi olan Allah (doğru yolda olmağınızı) istəməyincə, siz istəyə bilməzsiniz!