Al-Mutaffifin

¹Ole wao hao wapunjao!

²Ambao wanapojipimia kwa watu hudai watimiziwe.

³Na wao wanapowapimia watu kwa kipimo au mizani hupunguza.

⁴Kwani hawadhani hao kwamba watafufuliwa.

⁵Katika Siku iliyo kuu.

⁶Siku watakapomsimamia watu Mola Mlezi wa walimwengu wote?

⁷Hasha! Hakika maandiko ya wakosefu bila ya shaka yamo katika Sijjin.

⁸Unajua nini Sijjin?

⁹Kitabu kilichoandikwa.

¹⁰Ole wao siku hiyo kwa wanaokadhibisha!

¹¹Ambao wanaikadhibisha Siku ya Malipo.

¹²Wala haikadhibishi ila kila mwenye kuruka mipaka, mwenye dhambi.

¹³Anaposomewa Aya zetu husema: "Ni visa vya watu wa kale!"

¹⁴Hasha! Bali yametia kutu juu ya nyoyo zao hao waliokuwa wakiyachuma.

¹⁵Hasha! Hakika hao siku hiyo bila ya shaka watazuiliwa mbali na neema za Mola wao Mlezi.

¹⁶Kisha wataingia Motoni!

¹⁷Kisha waambiwe: Haya ndiyo mliyokuwa mkiyakadhibisha.

¹⁸Hasha! Hakika maandiko ya watu wema bila ya shaka yamo katika Illiyyin.

¹⁹Na nini kitakachokujuvya nini Iliyyin?

²⁰Kitabu kilichoandikwa.

²¹Wanakishuhudia waliokaribishwa.

²²Hakika watu wema bila ya shaka watakuwa katika neema.

²³Wakae juu ya viti vya enzi wakiangalia.

²⁴Utatambua katika nyuso zao mng'aro wa neema,

²⁵Watanyweshwa kinywaji safi kilichozibwa vyema.

²⁶Kizibo chake ni miski. Na katika hayo na washindanie wenye kushindana.

²⁷Na mchanganyiko wake ni Tasniim.

²⁸Chemchemi watakayoinywa waliokurubishwa.

²⁹Kwa hakika wale waliokuwa wahalifu walikuwa wakiwacheka walioamini.

³⁰Na wanapopita karibu yao wakikonyezana.

³¹Na wanaporudi kwa watu wao hurudi nao wamefurahi.

³²Na wanapowaona husema: Hakika hawa ndio hasa waliopotea.

³³Na wao hawakutumwa wawe walinzi juu yao.

³⁴Basi leo walioamini ndio watawacheka makafiri.

³⁵Nao wako juu ya viti vya enzi wakiangalia.

³⁶Je, makafiri wamelipwa malipo ya yale waliyokuwa wakiyatenda?