Al-Insan

¹Hakika kilimpitia binaadamu kipindi katika zama ambacho kwamba hakuwa kitu kinachotajwa.

²Hakika Sisi tumemuumba mtu kutokana na mbegu ya uhai iliyochanganyika, tumfanyie mtihani. Kwa hivyo tukamfanya mwenye kusikia, mwenye kuona.

³Hakika Sisi tumembainishia Njia. Ama ni mwenye kushukuru, au mwenye kukufuru.

⁴Hakika Sisi tumewaandalia makafiri minyororo na pingu na Moto mkali.

⁵Hakika watu wema watakunywa katika vinywaji vilivyochanganyika na kafuri

⁶Ni chemchemi watakayoinywa waja wa Mwenyezi Mungu, wakiifanya imiminike kwa wingi.

⁷Wanatimiza nadhiri, na wanaiogopa siku ambayo shari yake inaenea sana.

⁸Na huwalisha chakula, juu ya kukipenda kwake, masikini, na yatima, na wafungwa.

⁹Hakika sisi tunakulisheni kwa wajihi wa Mwenyezi Mungu. Hatutaki kwenu malipo wala shukrani.

¹⁰Hakika sisi tunaiogopa kwa Mola wetu Mlezi hiyo siku yenye shida na taabu.

¹¹Basi Mwenyezi Mungu atawalinda kutokana na shari ya siku hiyo, na atawakutanisha na raha na furaha.

¹²Na atawalipa Bustani za mbinguni na maguo ya hariri kwa vile walivyosubiri.

¹³Humo wataegemea juu ya viti vya enzi, hawataona humo jua kali wala baridi kali.

¹⁴Na vivuli vyake vitakuwa karibu yao, na mashada ya matunda yataning'inia mpaka chini.

¹⁵Na watapitishiwa vyombo vya fedha na vikombe vya vigae.

¹⁶Vya fedha safi kama kiyoo, wamevipima kwa vipimo.

¹⁷Na humo watanyweshwa kinywaji kilichochanganyika na tangawizi.

¹⁸Hiyo ni chemchemi iliyo humo inaitwa Salsabil.

¹⁹Na watawazungukia kuwatumikia wavulana wasiopevuka, ukiwaona utawafikiri ni lulu zilizotawanywa.

²⁰Na utakapoyaona, utakuwa umeona neema na ufalme mkubwa.

²¹Juu yao zipo nguo za hariri laini za kijani kibichi, na hariri nzito ya atilasi. Na watavishwa vikuku vya fedha, na Mola wao Mlezi atawanywesha kinywaji safi kabisa.

²²Hakika haya ni malipo yenu; na juhudi zenu zimekubaliwa.

²³Hakika Sisi tumekuteremshia Qur-ani kidogo kidogo.

²⁴Basi ngojea hukumu ya Mola wako Mlezi wala usimtii miongoni mwao mwenye dhambi au mwenye kufuru.

²⁵Na likumbuke jina la Mola wako Mlezi asubuhi na jioni.

²⁶Na usiku msujudie Yeye, na umtakase usiku, wakati mrefu.

²⁷Kwa hakika watu hawa wanapenda maisha ya kidunia, na wanaiacha nyuma yao siku nzito.

²⁸Sisi tumewaumba, na tukavitia nguvu viungo vyao. Na tukitaka tutawabadilisha mfano wao wawe badala yao.

²⁹Hakika haya ni mawaidha; basi anayetaka, atashika Njia ya kwenda kwa Mola wake Mlezi.

³⁰Wala hamwezi kutaka ila atakapo Mwenyezi Mungu. Hakika Mwenyezi Mungu ni Mwenye elimu, Mwenye hekima.

³¹Humuingiza amtakaye katika rehema yake. Na wenye kudhulumu amewawekea adhabu iliyo chungu.