Al-A'la

¹Lavdëro emrin e Zotit tënd, më të Lartit,

²që ka krijuar gjithçka dhe e ka përpjesëtuar drejt;

³që ka caktuar fatin e çdo gjëje dhe ia ka rrëfyer rrugën;

⁴që bën të rriten kullotat

⁵dhe pastaj të shndërrohen, të thahen e të vyshken.

⁶Ne do të të bëjmë ty (Muhamed) të lexosh (Shpalljet Tona), kështu që nuk ke për të harruar,

⁷përveç asaj që do Allahu. Vërtet, Ai e di të dukshmen dhe çka është e fshehtë.

⁸Do të ta lehtësojmë ty rrugën e drejtë,

⁹prandaj këshillo, nëse këshilla do të jetë e dobishme!

¹⁰Asaj do t’ia vërë veshin ai që (i) frikësohet (Allahut),

¹¹e do t’i shmanget vetëm më i keqi,

¹²i cili do të digjet në zjarrin e madh,

¹³ku as nuk do të vdesë, as nuk do të jetojë.

¹⁴I shpëtuar është ai që pastrohet,

¹⁵që e përmend emrin e Zotit të vet dhe që fal namaz!

¹⁶Por ju, përkundrazi, më shumë po e parapëlqeni jetën e kësaj bote,

¹⁷ndonëse jeta tjetër është më e mirë dhe e amshuar.

¹⁸Kjo, me të vërtetë, ndodhet në Fletët e lashta,

¹⁹në Fletët e Ibrahimit dhe Musait.