At-Takwir

¹Kur Dielli të mblidhet e të humbë shkëlqimin;

²kur yjet të rrëzohen

³dhe malet të lëvizin tutje;

⁴kur devetë barrse të braktisen

⁵dhe egërsirat të tubohen;

⁶kur detet të vlojnë

⁷dhe shpirtrat të bashkohen (me trupat);

⁸kur foshnja e varrosur për së gjalli të pyetet

⁹për çfarë faji ishte vrarë;

¹⁰kur fletët të shpërndahen[395]

¹¹dhe qielli të zhvishet;

¹²kur Xhehenemi të flakërojë

¹³dhe Xheneti të afrohet:

¹⁴atëherë çdokush do të marrë vesh çfarë kishte përgatitur (për këtë Ditë).

¹⁵Betohem për ata (planetë) që tërhiqen,

¹⁶që lindin e perëndojnë,

¹⁷për natën kur bie terri

¹⁸e për agimin kur nis të zbardhë,

¹⁹se ky (Kuran) është Fjalë e (kumtuar prej) një të Dërguari fisnik,[396]

²⁰që zotëron fuqi dhe pozitë të lartë te Zoti i Fronit

²¹e që është i respektuar atje dhe besnik.

²²Shoku juaj[397] nuk është i marrë.

²³Ai e ka parë atë[398] në horizontin e qartë

²⁴dhe nuk mbulon asnjë të fshehtë prej së Padukshmes.

²⁵As ky (Kuran) nuk është fjalë e djallit të mallkuar.

²⁶Prandaj, nga po ia mbani?

²⁷Ai është veçse këshillë për botët:

²⁸për secilin nga ju që dëshiron të ndjekë rrugën e drejtë.

²⁹Por ju nuk mund të dëshironi, përveçse me vullnetin e Allahut, Zotit të botëve!