'Abasa

¹Ai[393] u vrenjt dhe ktheu kurrizin,

²kur i erdhi pranë i verbri.

³E ku e di ti, ndoshta ai dëshironte të pastrohej (nga gjynahet)

⁴ose të merrte këshillë, e këshilla t’i sillte dobi atij?!

⁵Sa për atë që është i pasur,

⁶ti atij po i kushton vëmendje,

⁷megjithëse nuk ke përgjegjësi, nëse ai nuk dëshiron të pastrohet.

⁸Sa për atë që të vjen duke nxituar

⁹dhe ndien frikë (nga Allahu),

¹⁰ti atij nuk po ia vë veshin.

¹¹Mos vepro ashtu! Në të vërtetë, ky (Kuran) është këshillë,

¹²pra, kush të dojë, le të marrë këshillë!

¹³Ai ndodhet në Faqe të nderuara,[394]

¹⁴të lartësuara, të pastra,

¹⁵në duart e shkruesve (engjëj)

¹⁶të ndershëm dhe të drejtë.

¹⁷Mallkuar qoftë njeriu! Sa mosmirënjohës që është ai!

¹⁸Prej çfarë gjëje e krijon Allahu atë?

¹⁹Prej pikës së farës e krijon dhe i jep përmasa të rregullta.

²⁰Më pas ia lehtëson rrugën (e lindjes)

²¹e pastaj e vdes dhe i cakton një varr,

²²dhe, kur të dojë, Ai e ringjall.

²³E megjithatë, njeriu ende nuk i ka plotësuar ato që i ka urdhëruar Ai!

²⁴Le të mendojë njeriu për ushqimin e vet:

²⁵Jemi Ne që lëshojmë ujë me bollëk,

²⁶pastaj e çajmë tokën në thellësi

²⁷dhe nxjerrim prej saj drithërat,

²⁸rrushin e perimet,

²⁹ullirin e palmat,

³⁰kopshtet e dendura,

³¹pemët dhe gjithë barërat,

³²që t’i gëzoni ju dhe bagëtitë tuaja.

³³Por, kur të vijë Ushtima,

³⁴atë Ditë njeriu do të ikë nga i vëllai,

³⁵nga e ëma dhe nga i ati,

³⁶nga e shoqja dhe nga fëmijët e vet.

³⁷Atë Ditë, secili prej tyre do të ketë aq shqetësim për veten, sa do t’i mjaftojë.

³⁸Atë Ditë do të ketë fytyra rrëzëllore,

³⁹të qeshura e të gëzuara.

⁴⁰Atë Ditë do të ketë (edhe) fytyra të pluhurosura,

⁴¹që do t’i mbulojë errësira.

⁴²Këta janë jobesimtarët, gjynahqarët.