An-Nazi'at

¹Për ata (engjëj) që marrin me forcë,[389]

²për ata që marrin butësisht,[390]

³për ata që notojnë në hapësirë,

⁴për ata që nxitojnë,[391]

⁵dhe për ata që i rregullojnë punët![392]

⁶Ditën kur do të dridhet gjithçka nga ushtima (që lajmëron Kiametin),

⁷e cila do ta ndiqet nga një e dytë,

⁸disa zemra do të jenë të mbushura me tmerr

⁹e shikimet e tyre do të bien përdhe.

¹⁰Ata thonë: “Vallë, vërtet do të rikthehemi në jetë?!

¹¹A thua, edhe kur të bëhemi eshtra të thërrmuara?!”

¹²Dhe thonë: “Po qe kështu, atëherë ky kthim do të jetë humbje (për ne)!”

¹³Por, ajo do të jetë veç një fryrje e vetme (e Surit)

¹⁴dhe ata përnjëherësh do të brofin (të ringjallur).

¹⁵A e ke dëgjuar (o Muhamed) historinë e Musait?

¹⁶Zoti i tij e thirri në luginën e shenjtë të Tuvas dhe i tha:

¹⁷“Shko te Faraoni, se ai, me të vërtetë, ka kaluar çdo kufi;

¹⁸dhe thuaji: “A do ta pastrosh veten,

¹⁹dhe të të udhëzoj te Zoti yt, që t’i frikësohesh?”

²⁰Musai ia tregoi mrekullinë më të madhe,

²¹por ai (Faraoni) e mohoi dhe e kundërshtoi.

²²Pastaj i ktheu shpinën, duke u përpjekur (kundër së vërtetës)

²³dhe tuboi njerëzit e u deklaroi:

²⁴“Unë jam zoti juaj më i lartë!”

²⁵Prandaj Allahu e goditi atë me dënim në jetën tjetër dhe në këtë jetë.

²⁶Kjo është këshillë për ata që i frikësohen Allahut.

²⁷Cili është më i vështirë: krijimi i juaj apo i qiellit, të cilin Ai e ndërtoi,

²⁸ia ngriti lart kupën dhe e përsosi.

²⁹Netët i bëri të errëta, kurse ditët të ndritshme.

³⁰Pastaj e shtriu rrafsh Tokën,

³¹dhe, nga ajo nxori ujërat dhe bëri kullotat,

³²kurse malet i bëri të patundshme,

³³që t’i gëzoni ju dhe bagëtitë tuaja.

³⁴Kur të arrijë gjëma më e madhe,

³⁵atë Ditë njeriu do të kujtojë gjithçka që ka bërë

³⁶dhe Zjarri flakërues do t’i tregohet çdokujt që sheh.

³⁷Atëherë, ai që ka shkelur gjithçka

³⁸dhe ka parapëlqyer jetën e kësaj bote,

³⁹sigurisht që do të ketë për strehë Xhehenemin.

⁴⁰Kurse ai që i është frikësuar madhërisë së Zotit të tij dhe e ka frenuar veten nga dëshirat,

⁴¹pa dyshim që do të ketë për strehë Xhenetin.

⁴²Të pyesin ty për Orën (e Kiametit) se kur do të ndodhë.

⁴³Çfarë rëndësie ka për ty që ta përmendësh atë?

⁴⁴Tek Zoti yt është fundi i (dijenisë rreth) saj.

⁴⁵Ti je vetëm paralajmërues i atyre që i frikësohen asaj.

⁴⁶Ditën kur do ta shohin atë, (njerëzve) do t’u duket se kanë qëndruar (në Tokë) veç një mbrëmje apo një mëngjes.