An-Naba

¹Për çfarë e pyesin ata njëri-tjetrin?

²Për Lajmin e madh,

³rreth të cilit ata kanë kundërshtime.

⁴Ani, shpejt do ta marrin vesh!

⁵Sigurisht që shpejt do ta marrin vesh!

⁶A nuk jua kemi bërë Tokën si shtrat

⁷e malet si shtylla?!

⁸Ne ju kemi krijuar në çifte

⁹dhe gjumin jua kemi bërë për prehje.

¹⁰Natën jua kemi bërë mbulesë,

¹¹ndërsa ditën e kemi caktuar për të punuar.

¹²Mbi ju kemi ndërtuar shtatë qiej të fortë

¹³dhe kemi vënë kandil (diell) të shndritshëm!

¹⁴Nga retë Ne ju lëshojmë ujëra të bollshme

¹⁵për rritjen e drithërave, bimëve

¹⁶dhe të kopshteve të dendura.

¹⁷Sigurisht, Dita e Ndarjes vendimtare është caktuar.

¹⁸Atë Ditë do të fryhet në Sur dhe ju do të vini grupe-grupe.

¹⁹Dyert e qiellit do të hapen

²⁰dhe malet do të shtyhen tutje e do të bëhen si mirazh.

²¹Me të vërtetë, Xhehenemi do të bëhet pusi,

²²vendbanim i caktuar për keqbërësit,

²³që aty të mbeten përgjithmonë.

²⁴Aty nuk do të shijojnë as freski, as pije,

²⁵përpos ujit të valuar dhe qelbësirave,

²⁶si shpërblim përkatës (të veprave të tyre).

²⁷Në të vërtetë, ata as që e çonin nëpër mend se do të jepnin llogari

²⁸dhe shpalljet Tona i mohonin prerazi.

²⁹Por Ne çdo gjë e kemi shënuar në një libër.

³⁰Prandaj do t’u themi: “Shijojeni këtë! Ne nuk do t’ju shtojmë gjë tjetër përveçse dënim!”

³¹Vërtet, për punëdrejtët është përgatitur e mira (Xheneti):

³²kopshte dhe vreshta,

³³vajza të reja, të së njëjtës moshë,

³⁴dhe kupa të plota.

³⁵Atje nuk do të dëgjojnë biseda të kota e as gënjeshtra.

³⁶Kështu është shpërblimi nga Zoti yt - dhuratë sipas meritës

³⁷Zoti i qiejve dhe i Tokës dhe i gjithçkaje që gjendet midis tyre, i Gjithëmëshirshmi, të Cilit askush nuk do të mund t’i flasë (nga frika).

³⁸Në ditën, kur Shpirti (Xhebraili) dhe engjëjt do të jenë të rreshtuar, nuk do të flasë askush, përveç atij që do t’i japë leje i Gjithëmëshirshmi e që do të thotë të vërtetën.

³⁹Ajo është Dita e Vërtetë, prandaj kush të dojë, le të kthehet te Zoti i vet (që në këtë jetë).

⁴⁰Me të vërtetë, Ne ju kemi paralajmëruar se është i afërt dënimi, Ditën, kur njeriu do të shohë se ç’kanë bërë duart e tij dhe, kur jobesimtari do të thotë: “Ah, sikur të isha pluhur!”