Al-Infitar

¹Kur qielli të çahet

²dhe yjet të derdhen;

³kur detet të përzihen

⁴dhe varret të rrotullohen,

⁵atëherë çdokush do të mësojë për veprat që ka bërë dhe që ka lënë pa bërë.

⁶O njeri, ç’të mashtroi ty që nuk i besove Zotit tënd bujar,

⁷i Cili të krijoi ty, të dha përmasa të rregullta dhe të harmonizoi

⁸dhe, që të ka mbrujtur në çfarëdo forme që ka dashur?!

⁹Por jo! Ju e quani të gënjeshtërt Gjykimin (pas ringjalljes),

¹⁰ndonëse mbi ju ka rojtarë (që ju vëzhgojnë),

¹¹shënues të nderuar,

¹²që dinë gjithçka që bëni.

¹³Vërtet, punëdrejtët do të jenë në Xhenet,

¹⁴kurse fajtorët, me siguri, do të jenë në Zjarrin flakërues,

¹⁵në të cilin do të digjen në Ditën e Gjykimit,

¹⁶pa mundur t’i shmangen atij.

¹⁷E kush do të ta shpjegojë ty se ç’është Dita e Gjykimit?

¹⁸Edhe njëherë: Kush do të ta shpjegojë ty se ç’është Dita e Gjykimit?

¹⁹Ajo është Dita, kur askush nuk do të ketë fuqi për të bërë gjë për ndonjë tjetër dhe, kur pushteti do të jetë vetëm i Allahut.