Ash-Shams

¹Ndahiye izuba n’urumuri rwaryo,

²N’ukwezi igihe kurikurikiye,

³N’amanywa igihe agaragaje urumuri (rw’izuba),

⁴N’ijoro igihe riritwikiriye,

⁵N’ikirere ndetse n’Uwagihanze,

⁶N’isi n’Uwayirambuye,

⁷Na roho n’uwayitunganyije;

⁸Hanyuma akayigaragariza ikibi n’icyiza,

⁹Mu by’ukuri uweza roho ye (akubaha Allah kandi agakora ibikorwa byiza) yaratsinze,

¹⁰Kandi rwose uwatereranye roho ye ari mu gihombo,

¹¹Abantu ba Thamudu bahinyuye (Intumwa yabo) kubera kwigomeka,

¹²Ubwo ubarusha ububi yahagurukanaga ibakwe (akajya kwica ingamiya y’imbyeyi),

¹³Nuko Intumwa ya Allah (Swaleh) irababwira iti “Muramenye! Iyo ni ingamiya ya Allah (ntimuyigirire nabi), kandi ntimuyibuze gushoka!”

¹⁴Ariko baramuhinyuye (ya ngamiya) barayica. Nuko Nyagasani wabo arabarimbura ku bw’icyaha cyabo, ndetse bose abarimbura mu buryo bureshya (baba abakuru n’abato, abakire n’abakene, ndetse n’abakomeye n’abaciriritse).

¹⁵Kandi (Allah) ntatinya ingaruka zabyo.