An-Nazi'at

¹Ndahiye abamalayika bashikanuza (roho z’abahakanyi) n’ubukana buhambaye,

²N’abamalayika bakuramo (roho z’abemeramana) bitonze,

³N’abamalayika bogoga ikirere bihuta (batwaye izo roho),

⁴N’abamalayika bihutana (ubutumwa babuzaniye Intumwa za Allah ku isi).

⁵N’abamalayika bashyira mu bikorwa ibyo bategetswe.

⁶Umunsi (impanda ya mbere izavuzwa), maze isi n’imisozi bigatigita bikabije (buri kiremwa kigapfa),

⁷(Umutingito wa mbere) uzakurikirwa n’undi mutingito (maze buri kiremwa kizuke),

⁸Uwo munsi imitima (ya bamwe) izaba ifite ubwoba n’agahinda,

⁹Ndetse n’indoro yabo izaba yaciye bugufi (isuzuguritse).

¹⁰Bazavuga bati “Ese mu by’ukuri tuzasubizwa mu buzima (bwacu bwo ku isi) twahozemo?”

¹¹“Ese n’iyo twaba twabaye amagufa ashangutse?”

¹²Bazavuga bati “Uko kugaruka kwacu (ku isi twifuza) kwaba ari igihombo!”

¹³Mu by’ukuri hazabaho indi mpanda izavuzwa rimwe gusa.

¹⁴Icyo gihe bazisanga imusozi (bongeye kuba bazima nyuma yo gupfa).

¹⁵Ese inkuru ya Musa yakugezeho?

¹⁶Ubwo Nyagasani we yamuhamagaraga ari mu kibaya gitagatifu cya Tuwa (agira ati),

¹⁷“Jya kwa Farawo kuko rwose yigometse.”

¹⁸Umubwire uti “Ese ushobora kwiyeza (ukareka icyaha cy’ubuhakanyi, ukaba umwemeramana)?”

¹⁹“Nkakuyobora kwa Nyagasani wawe kugira ngo umutinye?”

²⁰Nuko (Musa) amwereka igitangaza gihambaye.

²¹Ariko (Farawo) yarahinyuye aranigomeka;

²²Maze atera umugongo akataza (ashishikariza abantu be kudakurikira Musa).

²³Nuko akoranya (abantu be), avuga mu ijwi riranguruye,

²⁴Agira ati “Ni njye nyagasani wanyu w’ikirenga.”

²⁵Bityo Allah amuhana by’intangarugero kubera icyaha cya nyuma (yakoze) n’icya mbere.[1]

²⁶Mu by’ukuri muri ibyo harimo isomo kuri buri wese utinya Allah.

²⁷Ese (yemwe bantu) iremwa ryanyu ni ryo rikomeye, cyangwa ikirere (Allah) yubatse (ni cyo gikomeye)?

²⁸Yazamuye igisenge cyacyo, maze aragitunganya.

²⁹Ijoro ryacyo arigira umwijima, amanywa yacyo arayakesha.

³⁰Nyuma y’ibyo arambura isi,

³¹Ayisohoramo amazi yayo n’inzuri zayo,

³²Anashimangira imisozi,

³³Kugira ngo bibagirire akamaro, mwe n’amatungo yanyu.

³⁴Ariko igihe icyago gihambaye (umunsi w’imperuka) kizaza,

³⁵Umunsi umuntu azibuka ibyo yashyizemo umuhate,

³⁶Umuriro wa Jahanamu ukagaragarizwa (buri wese) ureba.

³⁷Ubwo wa wundi wigometse,

³⁸Agahitamo ubuzima bwo kuri iyi si (agakurikira ibibi aterwa n’irari rye),

³⁹Mu by’ukuri umuriro wa Jahanamu uzaba ubuturo (bwe).

⁴⁰Ariko wa wundi watinye kuzahagarara imbere ya Nyagasani we, akanabuza umutima we kurarikira ibibi,

⁴¹Mu by’ukuri, ubusitani (Ijuru) buzaba ubuturo (bwe).

⁴²(Abahakanyi) barakubaza (yewe Muhamadi) ku bijyanye n’igihe imperuka izabera

⁴³Nta bumenyi ufite bwo kugira icyo uyivugaho,

⁴⁴Ubumenyi bwayo bwihariye Nyagasani wawe.

⁴⁵Ahubwo wowe (Muhamadi) nta kindi uri cyo uretse kuba uri umuburizi w’abatinya (umunsi w’imperuka).

⁴⁶Umunsi bazawubona, bazamera nk’aho babaye ku isi ikigoroba kimwe cyangwa igitondo kimwe.