Al-A'la

¹Singiza izina rya Nyagasani wawe, Uwikirenga,

²We waremye akanatunganya (buri kintu),

³Akanakigenera (gahunda yacyo yose), hanyuma akayikiyoboramo,

⁴Ni na We umeza ubwatsi mu nzuri,

⁵Hanyuma akabwumisha bugahindura ibara.

⁶Rwose (yewe Muhamadi) tuzakwigisha (gusoma Qur’an), bityo ntuzayibagirwa,

⁷Keretse ibyo Allah azashaka (ko wibagirwa). Mu by’ukuri azi ibigaragara n’ibitagaragara.

⁸Tuzanakorohereza inzira yo gukora ibyiza.

⁹Bityo, ibutsa (abantu) igihe urwibutso rwabagirira akamaro,

¹⁰Mu by’ukuri hazibuka wa wundi utinya (Allah),

¹¹Ariko inkozi y’ibibi izarugendera kure (urwibutso),

¹²(Uwo) ni we uzajya mu muriro uhambaye (akawuhiramo),

¹³Aho atazapfa (ngo aruhuke) cyangwa ngo agiriremo ubuzima (bwiza).

¹⁴Mu by’ukuri wa wundi wiyejeje (akirinda ibyaha) yamaze kubona intsinzi

¹⁵Akanasingiza izina rya Nyagasani we ndetse akanakora iswala.

¹⁶Ariko mwe mwikundira ubuzima bwo kuri iyi si,

¹⁷Nyamara ubwo ku mperuka ari bwo bwiza kurushaho ndetse buzanahoraho.

¹⁸Mu by’ukuri ibi (mubwirwa) biri mu byanditswe byo hambere,

¹⁹Inyandiko (zahishuriwe) Ibrahim na Musa.