Al-Ghashiyah

¹Ese inkuru y’ikizatwikira (abantu ku munsi w’imperuka) yakugezeho?

²Kuri uwo munsi, uburanga bwa bamwe buzaba busuzuguritse,

³(Igihe bari ku isi) babaga bakora bashishikaye (basenga ibindi bitari Allah), (ariko ku mperuka) bazaba bananiwe (kandi bafite ikimwaro).

⁴Bazajya mu muriro utwika (bawuhiremo);

⁵Kandi bazanyweshwa ku isoko (y’amazi) yatuye,

⁶Nta byo kurya bazaba bafite uretse ibyatsi birura kandi bifite amahwa,

⁷(Ibyo byo kurya) ntibizigera bibabyibushya cyangwa ngo bibamare inzara.

⁸Kuri uwo munsi kandi (ubundi) buranga buzaba bukeye;

⁹Bwishimiye ibikorwa byabwo,

¹⁰(Ba nyirabwo bazaba bari) mu Ijuru ry’ikirenga,

¹¹Aho batazumva amanjwe,

¹²Hazaba harimo isoko itemba,

¹³Hazaba harimo ibitanda byigiye hejuru,

¹⁴N’ibikombe biteguwe (neza),

¹⁵N’imisego itondetse ku mirongo (neza),

¹⁶N’amatapi arambuye (biryoheye ijisho).

¹⁷Ese ntibitegereza uko ingamiya zaremwe?

¹⁸N’uburyo ikirere cyahanitswe?

¹⁹N’uburyo imisozi yashimangiwe (mu butaka)?

²⁰N’uburyo isi yarambuwe?

²¹Bityo, (yewe Muhamadi) bibutse kuko mu by’ukuri wowe uri uwibutsa,

²²Ntukabashyireho igitugu.

²³Ariko utera umugongo (urwibutso) akanahakana,

²⁴Allah azamuhanisha ibihano bihambaye.

²⁵Mu by’ukuri iwacu ni ho garukiro ryabo,

²⁶Hanyuma mu by’ukuri ni twe tuzabakorera ibarura.