Al-Balad

¹Ndahiye uyu mujyi (wa Maka),

²Nawe (Ntumwa Muhamadi) utuye uyu mujyi,

³N’umubyeyi (Adamu) n’abo yabyaye,

⁴Mu by’ukuri twaremye umuntu (agomba kunyura) mu ngorane.

⁵Ese akeka ko nta n’umwe wamushobora?

⁶Aravuga ati “Nakoresheje umutungo mwinshi.”

⁷Ese akeka ko nta n’umwe umubona?

⁸Ese ntitwamuhaye amaso abiri,

⁹Ndetse n’ururimi n’iminwa ibiri?

¹⁰Tukanamwereka inzira ebyiri (iy’icyiza n’ikibi)?

¹¹Ariko ntiyigeze ashaka kunyura mu nzira igoranye (iganisha ku byiza n’intsinzi).

¹²Ese ni iki cyakumenyesha iyo nzira igoranye?

¹³(Ni) ukubohora umucakara,

¹⁴Cyangwa gutanga amafunguro ku munsi w’amapfa,

¹⁵(Ayo mafunguro ukayaha) imfubyi mufitanye isano rya bugufi,

¹⁶Cyangwa umukene wambaye ubusa (ubayeho mu kaga).

¹⁷Hanyuma akaba umwe mu bemeramana, bakanagirana inama zo kwihangana ndetse bakanagirana inama zo kugira impuhwe.

¹⁸Abo ni abo mu kuboko kw’iburyo (mu Ijuru).

¹⁹Naho abahakanye amagambo yacu, ni abo mu kuboko kw’ibumoso (mu muriro).

²⁰Bazaba bafungiranye mu muriro (badafite aho binjirira n’aho basohokera).