Al-Qalam

¹Nuun Qalamaafi waan (malaykonni) barreessaniinin kakadha.

²Ati ni'imaa Gooftaa keetiitiin maraataa hin taane.

³Dhugumatti, siif mindaa hin cinnetu jira.

⁴Ati amala (naamusa) guddaa irra jirta.

⁵Fuulduratti arguuf jirta; isaanis arguuf jiru.

⁶Eenyuu keessanitti maraattummaan jirtii (arguuf jirtu).

⁷Gooftaan kee Isatu nama karaa Isaa irraa jallate akkaan beeka; qajeeltotas inni beekaadha.

⁸Kijibsiiftotaaf hin ajajamin.

⁹Odoo ati (ejjannoo kee) laaffiftee [Isaan] laaffisanii jaalatu.

¹⁰Akkaan kakataa salphataa hundaaf hin ajajamin.

¹¹Akkaan hamataa, faradaan akkaan deemaa kan ta'eef (hin ajajamin).

¹²Toltuu kan akkaan dhorgu, daangaa dabraa, dilaawaafis.

¹³Gara jabeessa, sana booda immoo diqaalaa kan ta'eef (hin ajajamin).

¹⁴Waan abbaa qabeenyaafi ilmaanii ta'eef (boonee kafare).

¹⁵Yeroo keeyyattoonni Keenya isa irratti dubbifamtu, "(kun) ogbarruu warra duriiti" jedhe.

¹⁶Funyaan irratti isa mallatteessina.

¹⁷Nuti akkuma abbootii ashaakiltii yeroo isaan bariidhaan ishee funaannachuuf kakatan qormaannetti, isaanis (mushrikoota Makkaas) qormaanneerra.

¹⁸Siinoo hin baasanu (yoo Rabbiin fedhe hin jedhan).

¹⁹Odoo isaan rafanuu, naanna'aan (adabbiin) Rabbii kee biraa ta'e ishee irra naanna'e.

²⁰Akka halkan dukkanaa (cilee) taatee bulte.

²¹Bariidhaan walitti lallaban.

²²"Yoo kan funaannattan taataniif oyruu keessan irratti bariifadhaa" (waliin jedhan).

²³Walitti hasaasaa (gara oyruu) deeman.

²⁴"Har’a hiyyeessi tokkoyyuu isinirratti akka ishee hin seenne" (jechuun hasaasan).

²⁵(Hiyyeeyyii) dhowwuu irratti danda'oo ta'anii bariisifatan.

²⁶Yeroo ishee arganu ni jedhan: "nuti karaa badoodha.

²⁷Inumaayyuu nuti hoongeffamoodha."

²⁸Irra filatamaan isaanii "sila maaliif siinoo hin baafne (yoo Rabbiin fedhe hin jenne) isiniin jedhee hin turree?" jedhe.

²⁹"Gooftaan keenya qulqullaa'e; dhugumatti, nuti miidhaa hojjattoota taaneerra" jedhan.

³⁰Kan wal komatan ta’anii gariin isaanii garii irratti garagale.

³¹Ni jedhan: "yaa badii keenya! Nuti dhugumatti, daangaa dabritoota.

³²Gooftaan keenya kan ishee caaltu bakka nuuf buusuu kajeella. Nuti gara Gooftaa keenyaa kajeeloodha” (jedhan).

³³Adabni (addunyaa) akkanuma; adabbii Aakhiraatu irra guddaadha Odoo kan beekan tahanii (irraa of tiksu turan).

³⁴Dhugumatti, warra Rabbiin sodaataniif Gooftaa isaanii bira Jannata qananiitu jira.

³⁵Sila Nuti muslimoota akka yakkamtootaa ni goonaa?

³⁶Maalumatu isiniif jira? Akkamitti murteessitu!

³⁷Dhugumatti, kitaaba (samii bu'e) kan isa keessaa dubbiftantu isiniif jiraa?

³⁸Kan isa keessa wanti isin filattan jiru (qabduu)?

³⁹Sila kakuulee nurratti taheetu kan Guyyaa Qiyaamaa keessatti bakka ga'aa ta'etu isiniif jira moo ‘wanti isin murteessitan isiniif jira’ jechuun?

⁴⁰Eenyuu isaaniitu sanaaf wabiidhaa isaan gaafadhu.

⁴¹Sila shariikota (kan murtee isaanii dhugoomsu)tu isaaniif tahee? Yoo kan dhugaa dubbatan ta'aniif shariikota isaaniitiin haa dhufanu.

⁴²Guyyaa mogolee irraa saaqamee (munaafiqoonni) gara sujuudaa waamamanii hin dandeenye san [yaadadhu].

⁴³Ijjoonni isaanii sodaattuu taatee xiqqeenyis isaan haguuga. Dhugumatti, isaan odoo fayyaa qabanuu (addunyaa irratti) sujuudatti waamamaa turan.

⁴⁴Anaafi nama haasa'a (Qur'aana) kana sobsiisu walitti nu dhiisi; Nuti suutaan karaa isaan hin beekne irraa isaan qabna.

⁴⁵Yeroon isaaniif kenna. Tooftaan Kiyya cimaadha.

⁴⁶Sila mindaa isaan gaafatteeti kaffaluuf itti ulfaatemoo (maali)?

⁴⁷Sila (iccitii) fagoottu isaan biratti tahee, kan isaan barreessan?

⁴⁸Murtii Gooftaa keetiitiif obsi. Akka saahiba qurxummii hintahin yeroo lallabe inni dallansuun guutame.

⁴⁹Odoo ni'imaan Gooftaa isaa irraa taate isa dhaqqabuu baattee, silaa komatamaa ta'eeti dirree biqiltuu hin qabne irratti darbama ture.

⁵⁰Gooftaan isaa isa filateeti gaggaarii irraa isa godhe.

⁵¹Isaan kafaran ijoowwan isaaniitiin lafaan si dhahuutti dhihaatan. yeroo yaadachiisa dhaga'an "inni maraataa dha" (siin)jedhan.

⁵²Innis aalama hundaaf yaadachiisa malee hin taane.