At-Takwir

¹Idan rãna aka shafe haskenta

²Kuma idan taurãri suka gurɓãce (wani ya shiga a cikin wani).

³Kuma idan duwãtsu aka tafiyar da su.

⁴Kuma idan rãƙuma mãsu cikunna[1] aka sakẽ su wãwai, bã ga kõwa ba.

⁵Kuma idan dabbõbin dãji aka tattara su.

⁶Kuma idan tẽkuna aka mayar da su wuta.

⁷Kuma idan rãyuka aka haɗa[1] su da jikunkunansu.

⁸Kuma idan wadda aka turbuɗe[1] ta da rai aka tambaye ta.

⁹"Sabõda wane laifi ne aka kashe ta?"

¹⁰Idan takardun ayyuka aka wãtsa su (ga mãsu su).

¹¹Kuma idan sama aka fẽɗe ta.

¹²Kuma idan Jahĩm aka hũra ta

¹³Kuma idan Aljanna aka kusantar da ita.

¹⁴Rai ya san abin da ya halartar (a rãnar nan).

¹⁵To, ba sai Na yi rantsuwa da taurãri matafã[1] ba.

¹⁶Mãsu gudu suna ɓũya.

¹⁷Da dare idan ya bãyar da bãya.

¹⁸Da sãfiya idan ta yi lumfashi.

¹⁹Lalle ne shi (Alƙur'ãni) haƙƙan, maganar wani manzon (Allah) ne mai girma ga Allah.

²⁰Mai ƙarfi, mai daraja a wurin Mai Al'arshi.

²¹Wanda ake yi wa ɗã'a (wato shugaban malã'iku) ne a can, amintacce.

²²Kuma abokinku ba mahaukaci ba ne.

²³Kuma lalle ne, yã gan shi[1] a cikin sararin sama mabayyani.

²⁴Kuma shi, ga gaibi[1] bã mai rowa ba ne.

²⁵Kuma shi (Alƙur'ani) bã maganar shaiɗani, wanda aka la'ana, ba ce.

²⁶Shin, a inã zã ku tafi?

²⁷Lalle ne shi (Alƙur'ãni), bã kõme ba ne fãce gargaɗi ga talikai.

²⁸Ga wanda ya so, daga cikinku, ya shiryu.

²⁹Kuma bã zã ku so ba sai idan Allah Ubangijin halitta Yã yarda.