Al-Infitar

¹Idan sama ta tsãge.

²Kuma idan taurãri suka wãtse.

³Kuma idan tẽkuna aka facce su.

⁴Kuma idan kaburbura aka tõne su.

⁵Rai yã san abin da ya gabatar, da abin da yã jinkirtar.

⁶Yã kai mutum! Mẽ ya rũɗe ka game da Ubangijinka, Mai karamci.

⁷Wanda Ya halitta ka sa'an nan ya daidaitã ka, Ya kuma tsakaitã ka.

⁸A cikin kõwace irin sũra Ya so Ya ginã ka a kanta.

⁹A'aha, bã haka ba, kuna ƙaryatãwa game da sakamako!

¹⁰Lalle ne, a kanku, haƙiƙa akwai matsara.

¹¹Mãsu daraja, marubũta.

¹²Sunã sanin abin da kuke aikatãwa.

¹³Lalle ne, mãsu ɗã'ã ga Allah, dãhir, suna cikin ni'ima.

¹⁴Kuma lalle ne, fãjirai, dãhir, sunã cikin Jahĩm.

¹⁵Zã su shigẽ ta a rãnar sakamako.

¹⁶Bã zã su faku daga gare ta ba.

¹⁷Kuma mẽ ya sanar da kai abin da ake cẽ wa ranar sakamako?

¹⁸Sa'an nan, mẽ ya sanar da kai abin da ake cẽ wa rãnar sakamako?

¹⁹Rãnã ce da wani rai ba ya iya mallakar kõme dõmin wani rai al'amari, a rãnar nan, ga Allah (ɗai) yake.