Al-Mutaffifin

¹Bone ya tabbata ga mãsu naƙƙasãwa.

²Waɗanda suke idan suka auna daga mutãne suna cika mũdu.

³Kuma idan sun auna musu da zakka[1] ko da sikẽli, suna ragẽwa

⁴Ashe! Waɗancan bã su tabbata cẽwa lalle sũ, ana tãyar da su ba?

⁵Domin yini mai girma.

⁶Yinin da mutãne ke tãshi zuwa ga Ubangijin halitta?

⁷Haƙĩƙa lalle ne littãfin fãjirai dãhir, yana a cikin Sijjĩn.

⁸Kuma, mẽ ya sanar da kai abin da akẽ cẽ wa Sijjĩn?

⁹Wani ittãfi ne rubũtacce.

¹⁰Bone yã tabbata a rãnar nan ga mãsu ƙaryatãwa.

¹¹Waɗanda suke ƙaryatãwa game da rãnar sakamako.

¹²Babũ mai ƙaryatãwa gare shi fãce dukan mai ƙẽtare haddi mai yawan zunubi.

¹³Idan ana karãtun ãyõyinmu, a kansa, sai ya ce: tãtsũniyõyin mutãnen farko ne.

¹⁴A'aha! Bã haka ba, abin da suka kasance suna aikatãwa dai, yã yi tsãtsa a cikin zukãtãnsu.

¹⁵A'aha! Haƙĩƙa, lalle ne sũ daga Ubangijinsu, rãnar nan, waɗanda ake shãmakancẽwa ne.

¹⁶Sa'an nan, lalle ne, sũ mãsu shiga cikin Jahĩm ne.

¹⁷Sa'an nan a ce: "Wannan shi ne abin da kuka kasance kuna ƙaryatãwa game da shi."

¹⁸A'aha! Haƙĩƙa lalle ne littãfin mãsu ɗã'ã yana a cikin Illiyyĩna?

¹⁹Kuma mẽne ne yã sanar da kai abin da ake cẽwa Illiyyũna?

²⁰Wani littãfi ne rubũtacce.

²¹Muƙarrabai[1] suke halarta shi.

²²Lalle ne, mãsu ɗã'ã ga Allah tabbas suna cikin ni'ima.

²³A kan karagu, suna ta kallo.

²⁴Kana sani a cikin fuskõkinsu, akwai kwarjinin ni'ima.

²⁵Ana shãyar da sũ daga wata giya wadda aka yunƙe a kan rufinta.

²⁶¡arshen kurɓinta miski ne. To, a cikin wannan, mãsu gwagwarmaya su yi ta gwagwarmayar nẽma.

²⁷Kuma abin da ake gauraya ta da shi, daga tasnĩm yake.

²⁸(Wato) wani marmaro ne wanda muƙarrabai ke sha daga gare shi.

²⁹Lalle ne, waɗanda suka kãfirta sun kasance (a dũniya) suna yi wa waɗanda suka yi ĩmãni dãriya.

³⁰Kuma idan sun shuɗe su sai su dinga yin zunɗe.

³¹Kuma idan suka jũya zuwa ga iyãlansu, sai su tafi suna kãkãci.

³²Kuma idan sun gan su sai su ce: "Lalle waɗannan ɓatattu ne."

³³Alhãli kuwa, ba a aike su ba dõmin su zama mãsu tsaro a kansu.

³⁴To, yau fa (a Lãhira] waɗanda suka yi ĩmãni, sũ ke yi wa kãfirai dãriya.

³⁵A kan karagu, suna ta kallo.

³⁶Shin an sãka ma kãfirai abin da suka kasance suna aikatawa?[1]