Az-Zukhruf

¹Haa, miim.[1]

²Mi wooɗndirii defere ɓanngunde ndeen !

³Min maɗii nde janngeteende [e ɗemngal] aarabu, mbelajo'o, on kaqqilay.

⁴Pellet, hende woni ka Amen gaa, ka yumma defte, toownde, ñeñaande.

⁵E Min ngacciray njippinangol on jantoore ndeen, ɗuurngal on, fii on ngonii yimɓe fantinɓe?

⁶Ɗuuɗii e Annabaaɓe ɓe Min nuli e adinooɓe ɓeen.

⁷Annabaajo araali e maɓɓe, si wonaa ɓe njalkitay mo.

⁸Min kalki ko ɓuri ɓe saɗtude doole ! Toode mise adinooɓe ɓeen jawtiino.

⁹Ko pellet, si a lamndike ɓe: "Ko hommbo tagi kammuuji ɗin e leydi ndin?" Ɓe mbi'ay: "Ko pooluɗo, gannduɗo on tagi ɗii".

¹⁰Oon mbaɗiranɗo on leydi ndin weertaandi, O waɗani on ɗate e mayri, fii no ɗoworon.

¹¹Oon jippinrɗo toɓo ka kammuu, yeru haaju, Min nguurnitiri ngo leydi maayndi. Ko noon yaltinirteɗon.

¹²On takɗo nooneeji ɗin fow, O waɗirani on e laaɗe ɗen e neemoraaɗi ɗiin, ko mbaɗɗoron,

¹³fii yo on potondir e hoore majji, refti ngannditon neema Joomi mon on, tuma potondirɗon e majji, mb'on on tuma: "Senaare woodanii eeltanɗo min ɗuum On, min ngonaano taaqanaaɓe ɗum.

¹⁴minen noon, ko ka Joomi amen woni ko min nduttotoo".

¹⁵Ɓe mbaɗani mo geɗal e jiyaaɓe Makko ɓeen ! Pellet, on neɗɗaŋke ko jedduɗo ɓannguɗo.

¹⁶Kaa woo O jogiti ɓiɗɓe rewɓe e ko O tagi kon, O heertinani on ɓiɗɓe worɓe ɓeen?

¹⁷Si goɗɗo e maɓɓe wewliniraama ko o waɗirani kon Hinaranke On misal, ye'eso makko ngon niɓɓita metteendi hombo suuɗi.

¹⁸E ko on ne'eteeɗo e cuɗaari, hara kaŋko on ka yeddondiral, wonaa o ɓannginoowo haala?

¹⁹Ɓe mbaɗi Malaa'ikaaɓe tawɓe ɓeen ko jiyaaɓe Joom yurmeende oon, rewɓe ! Kere ɓe seedino tageede ɓeen? Awa fii seedagol maɓɓe ngol winndete, ɓe lamnditoyee.

²⁰Ɓe mbi'iti: "Si Joom yurmeende On haajuno, min ndewataano ɓe". Ɓe alanaa ɗuum hay e ganndal; ɓe ngonaani, si wonaa hiɓe pena.

²¹Kaa ko defftere Min ngaddani ɓe ado ndee ɗoo, hara ko nden woni ko ɓe njogitii?

²²Si ko woni, ɓe mbi'iu: "Minen Min tawu baabiraaɓe amen ɓeen e diina, haray ko e batteeji maɓɓe min peewirta".

²³Ko wano non, Min nulaali jeertinoowo aditaade ma e saare woo, si wonaa hooreeɓe maɓɓe neemiiɓe mbi'ay: "Minen Min tawu baabiraaɓe amen ɓen e diina, ɗum non ko batteeji maɓɓe ɗin men ñermtinta".

²⁴O maaki: "Hay si mi addan on ko ɓuri feewude kon ko tawruɗon baabiraaɓe mon ɓen?" Ɓe mbi'i: "Minen dey, ko min jedduɓe ko nulidaɗon e mum koon".

²⁵Min njottii e maɓɓe. ndaare no battande fennuɓe ɓeen mba'unoo.

²⁶Jaŋto tuma Ibraahiima maakannoo been makko e yimɓe makko ɓeen: "Min on ko mi daɗndiiɗo e kon ko ndewoton,

²⁷si wanaa On takɗo lam, Kaŋko oon, O feewnay kam".

²⁸O waɗi ngool konngol heddotoongol ɓaawo makko, mbelajo'o, ɓe nduttoto.

²⁹Si ko woni, Mi dakmitii ɓee ɗoo e baabiraaɓe maɓɓe ɓeen, haa nde goonga kan ngarnoo e maɓɓe, e Nulaaɗo ɓannguɗo.

³⁰Nde goonga kan arnoo e maɓɓe, ɓe mbi'i: "Ɗuum ko mbilewu, minen ko min njedduɓe ɗuum".

³¹Ɓe mb'iti: "Ko haɗno ndee Alqur'aanaare jippinee e gorko mawɗo ca'e ɗen ɗiɗi?"

³²E ko kamɓe senndata yurmeende Joomi maa ndeen? Awa ko Minen ngoni ko senndi nguureeji maɓɓe ɗiin hakkunde maɓɓe, ka nguurndam aduna. Min ɓamti yoga maɓɓe e hoore ɓeya, darjaaji, fii no yoga maɓɓe jogitora yoga eeltane. Haray ko yurmeende Joomi maa ndeen, ɓuri moƴƴude e ko ko ɓe mooɓata.

³³Si wonaano fii wata yimɓe ɓeen ngon mofte goote, Min mbaɗayno e cuuɗi kala jedduɗo Hinnaranke Oon: kiɓɓe kaalisi e ŋabbirɗe ka ɓe ƴawra;

³⁴(Min mbaɗayno kadi) e cuuɗi maɓɓe ɗiin, dame e ndaɗɗude ka ɓe soɓɓindoo,

³⁵e cuɗaari. Kono ɗuum fow wonaani, si wonaa dakamme nguurndam aduna. Ko La'akara on ka Joomi maa, woni fii gooŋɗinɓe ɓeen.

³⁶Kala ɗuurniiɗo e jaŋtoore Hinaranko On, Min nguurta mo e seytanuuru, hara ko ndun woni ko o coowodata.

³⁷Ɗiin (awaseeji) noon, ko sakkorayɗi ɓe e peewal ngal, haa ka ɓe cikkata hiɓe peewi.

³⁸Haa si o aroyii e Amin, o wi'a: "Ee bone ! hara hakkunde am e maa woɗɗirayno goɗɗal puɗɗirɗe ɗen ɗiɗi woɗɗiri ! A bonii cinndadiiɗo !".

³⁹[Ɗuum] nafataa on hannde - nde tawnoo on tooñii - won'de ko ka lepte kaawtuɗon.

⁴⁰E ko an naninta paaɗuɗo maa feewnaa bunɗo e on wonɗo e ndeer majjere ɓanngunde?

⁴¹Si Min ngar ƴettitude ma, ko Min yoɓottotooɓe e maɓɓe.

⁴²maa hara Men holle ko Min kammbirani ɓeen kon, haray noon ko Min gaynooɓe fii maɓɓe.

⁴³Jogito kon ko wahayinaa e maaɗa. Pellet, hiɗa jokki laawol pocciingol.

⁴⁴Ndee non [Alqur'aanaare], ko nde teddungal maa an e yimɓe maa ɓeen. Aray nde laɓnditeeɗon.

⁴⁵Lamndii e ɓeen Nulaaɓe Amen ɓe Min nulunoo ado maa, si Min mbaɗuno ko wanaa Hinnaranke On, deweteeɗi goo?

⁴⁶Gooŋɗii Min immindinii Muusaa e aayeeje Amen ɗeen, haa e Fir'awna e mbatu mun ngun, o maaki: "Ko mi Nulaaɗo Jeyɗo tagoore".

⁴⁷Nde o addannooɓe aayeeje Amen ɗren, e jaka yoo hiɓe njalaɗi.

⁴⁸Min hollaali ɓe aaya, si wonaa haray on ɓuri adiiɗo mo on mawnude. Min nanngiri ɓe lepte ɗeen, mbelajo'o, ɓe nduttoto.

⁴⁹Ɓe mbi'i: "Ko an yo mbileejo! Torano min Joomi maa, ko O ahodi kon e maaɗa. Pellet, ko min feewooɓe".

⁵⁰Nde Min huncannooɓe lepte ɗeen, e jaka yoo, hiɓe pirta [ahadi].

⁵¹Fir'awna noddi e yimɓe ɓeen, o wi'i: "Ko onon yo yimɓe am, wanaa miin jey laamu Misra? E hino ɗii canɗi no ila e ley kuɓeeji am? E on nji'ataa?

⁵²Kaa mi ɓuraa teddude oo koyɗo mo eɓɓataa laɓɓinnde haala?

⁵³Awa ko hanno jawe kaŋŋe mbrnee e makko? Ma Malaa'ika'en arda e makko, na jokkondiri?"

⁵⁴O ɗaytini yimɓe makko ɓen, ɓe ɗowtii mo. Pellet, ɓeen ɗon laatino yimɓe faasiqiiɓe.

⁵⁵Nde ɓe tikkinnoo Min, Min yottii e maɓɓe; Min njooli ɓe fof.

⁵⁶Min mbaɗi ɓe ardiiɓe e yeru, wonan'de sakkiitiiɓe ɓeen.

⁵⁷Tuma nde geɗal neene Maryama on piyiranoo misal, tawaa yoo, yimɓe maa ɓeen no sooƴira ɗuum.

⁵⁸ɓe mbi'i: "Ko deweteeɗi amen ɗin ɓuri moƴƴude, kaa ko Kaŋko?" Ɓe piyiranaali ma ngal (misal), si wonaa fii wennjugol. Wurin, ko ɓe yimɓe saɗtuɓe mbeñe.

⁵⁹Awa (Iisaa) wonaani, si wanaa jiyaaɗo mo Min neemini e mum, Min mbaɗi mo yeru wonan'de ɓiɗɓe Israa'iila ɓeen.

⁶⁰Si Moen kaajuno, Min waɗtitirayno on Malaa'ika, ko lomtoo ka leydi.

⁶¹Pellet non, ko o anndinorde Darngal. Wota on cikkito fii maggal. Jokkee kam, ko ɗuum woni laawol Pocciingol ngol.

⁶²Wota seytaane falo on ! tawde pellet, ko o gaño mon ɓannguɗo.

⁶³Nde Iisaa ardunoo e ɓannguɗi ɗin, o maaki: "Gooŋɗii mi ardanii on e ñeeñal, e no mi ɓannginirana on yoga e ko luutondirɗon e muuɗum. Haray kulee Allah, ɗoftoɗon mi.

⁶⁴Pellet, ko Alla Woni Joomi am e Joomi mon. Ndewee Mo. Ko ɗuum woni laawol pocciingol ngol".

⁶⁵Feddeeji ɗiin luutondiri hakkunde majji. Bone woodanii ɓen yedduɓe, immorde e lepte ñalaande mu'usuuɗe !

⁶⁶Hara ɓe habbi si wpnaa nde Darngal ngal ardata ɓe e juhal, hara ɓe so'aa anndude?

⁶⁷Welduɓe ɓeen, nden ñalnde, yoga maɓɓe ko ayrooɓe yoga; si wonaa gooŋɗuiɓe ɓeen.

⁶⁸Ko onon yo jiyaaɓe Am ! Kulol alanaa on hannde; wonaa on sunotooɓe kadi.

⁶⁹ɓeen gooŋɗinɓe Aayeeje Amen ɗeen, ɓe ngoni jebbiliiɓe,

⁷⁰naatee ka Aljanna, onon e nannduɓe e mon, hoɗon saɗnee".

⁷¹[Gollooɓe] hino wannginee e maɓɓe, mirannji kaŋŋe e yedduɗe; hino ton kadi: kala ko wonkii muuyetee, gite dakmitoo. Hara le, ko on duumotooɓe toon.

⁷²Ko on ngoni Aljanna mo roniniraɗon, sabu ko ko ngollaynoɗon.

⁷³Hino woodani on toon, muuyanteeɗi ɗuuɗuɗi, ɗi ñaamoton e mum.

⁷⁴Pellet, bonɓe ɓen, ko ka lepte Jahannama ɓe luttoyta,

⁷⁵ɓe koynantaake, tee hara ko ɓe taƴiiɓe toon.

⁷⁶Min tooñaani ɓe few, si ko woni, ko kamɓe woni tooñuɓe ɓeen.

⁷⁷Ɓe nodda: "Ko an yo Maaliku ! Yo Joomi maa gaynu fii amen !" O wi'i: "Pellet, ko on luttooɓe [toon] !"

⁷⁸"Gooŋɗii Min ngaddanii on goonga kan ; kono ɗuuɗuɓe e mon, ko añɓe goonga".

⁷⁹Kaa ɓe eɓɓu fehre ? Doo ko Min fewjooɓe !

⁸⁰Maa hara ɓe cikku Min nanataa gunndooji maɓɓe e sirru maɓɓe? Oo’owoye! Nulaaɓe Amen ɓeen hino maandina takko maɓɓe.

⁸¹Maaku: "Si Hinaranko on no njogitii ɓiɗɗo, ko miin adotonoo rewude oon".

⁸²Senaare woodanii Jeyɗo kammuuji ɗin e leydi ndin, Jeyɗo Arsi kin; laaɓuɗo e kon ko ɓe cifrotta mo.

⁸³Accuɓe ɓe jumpa, ɓe pija haa ɓe hawroya e ñalaande maɓɓe ndeɓe fodaa.

⁸⁴Ko Kaŋko woni On deweteeɗo ka kammu e deweteeɗo ka leydi, ko Kaŋko kadi woni Ñeeño, gannduɗo On.

⁸⁵Barke heewanii on mo woodani ɗum, laamu kammuuji ɗin e leydi ndin e ko woni hakkunde majji. Ko ka makko anndal fii Darngal woni. Ko ka makko kadi ndutteteɗon.

⁸⁶Ɗi ɓe ndewata ɗin ga makko jeyah tefoore, si wonaa seediiɓe goonga ɓeen, hara heɓe nganndi.

⁸⁷Ko pellet, si a lamndike ɓe, ko hommbo woni ko tagi ɓe? Ɓe mbi'ay: "Ko Allah". Ko holno non ɓe njiiliraa?

⁸⁸[Himo anndi kadi] fii ko (Nulaaɗo) oon maakunoo kon: "Ko an yo Joomi, pellet, ɓee ko yimɓe ɓe ngooŋɗintaa".

⁸⁹Yaafo ɓe, maakaa: "Kisal !" Aray ndebe ngannda.