Ad-Dukhan

¹Haa, miim.[1]

²Mi wooɗndirii defere ɓanngunde nde !

³Min njippinirii nde e jemma barkinaaɗo, Min siforii won'de jeertinooɓe.

⁴Ko e on (jehma) woni ko seerndetee kala fiyaaku ñeñaaɗo.

⁵Ɗuum ko yamiroore immorde ka amen. Min siforii won'de Nulooɓe.

⁶yurmeende immornde ka Joomi maa. Pellet, ko Kaŋko woni Nanoowo, gannduɗo oon.

⁷Jeyɗo kammuuji ɗiin e leydi ndiin e ko woni kon hakkunde majji, si wonii ko on yananaaɓe.

⁸Deweteeɗo goo alaa, si wanaa Kaŋko. Homo wuurna, Himo wara. Jeyɗo on Jeyi baabiraaɓe mon aramɓe ɓeen.

⁹Ko woni tan, ɓe wonii e sikke, heɓe pija.

¹⁰Habbito ñande kammu ngun ardata e curki feeñuuki,

¹¹suddayki yimɓe ɓen. [Ɓe mbi'anee]: "Ɗuum ko lepte mu'usuuɗe" !

¹²"Joomi amen, huncan min lepte ɗeen. Minen ko men gooŋɗinɓe".

¹³Ko honno ɓe mbaajitorta, ko goongo Nulaaɗo ɓannginɗo ariino ɓe?

¹⁴Refti ɓe nduŋti, ɓe mb'i: "Ko tinndinaaɗo, kaangaaɗo".

¹⁵Awa ko Min ittooɓe lepte ɗen seeɗa; kono pellet, ko on ruttitotooɓe.

¹⁶Ñande Min nanngiroyta bippannde mawnde nden, pellet, ko Min yoɓtoytooɓe.

¹⁷Gooŋɗii Min njarribinoke ado maɓɓe, yimɓe Fir'awna ɓen, Nulaaɗo tedduɗo ari e maɓɓe,

¹⁸won'de: "mbaɗee e juuɗe am, jiyaaɓe Allah ɓeen. Min ko mi Nulaaɗo e mon, koolniiɗo.

¹⁹E won'de wota on townitano Allah, tawde mi addanay on hujja ɓannguɗo.

²⁰Min kadi noon, mi moolorii Jeyɗo kam oon Jeyi on, nde piɗotonmi kaaƴe.

²¹Si on ngooŋɗinaa kam, haray celee kam".

²²O noddi Joomi makko, won'de: "Ɓee ɗoo, ko yimɓe bonɓe".

²³"Yaadir e jiyaaɓe Am ɓen jehma; nganndon ko on sukketeeɓe.

²⁴Ngaccaa maayo ngoon deeƴa [si on lummbii] ɓeya kan, ko konu yooleteengu".

²⁵Ɗuuɗii ko ɓe ngacci e gese e ɓulli,

²⁶e remuruuji e koɗan'de tedduɗe,

²⁷e dokke ɓe ngonnoo e neeminireede.

²⁸Ko wano noon. Hooti Min ndonini ɗi yimɓe woɓɓe.

²⁹Kammu nguun toɓaali ɓe, wonaa leydi ndin, ɓe ngonaani kadi muñanteeɓe.

³⁰Gooŋɗii Min ndaɗndii ɓiɗɓe Israa'iila ɓeen e lepte koyneeje;

³¹immorde e Fir'awna, tawde o laatino townitiiɗo, jiyaaɗo e fantimɓe ɓeen.

³²Gooŋɗii Min cuɓorike ɓe e dow ganndal e hoore winndere ndeen,

³³Min ngokki ɓe Ma'andeeji, ɗi jarrabuyee ɓannguɗo woni e mum.

³⁴Ɓee kan no mbi'a:

³⁵"Ndee wonaani, si wonaa maayde amen aranere nden tan. Min wonatah immintinoyteeɓe.

³⁶Awa artiree baabiraaɓe amen ɓeen, si wonii ko on gooŋɗuɓe".

³⁷Kere ko kamɓe ɓuri moƴƴude kaa ko yimɓe "Tubba'in" ɓeen e ɓeya adinooɓe ɓe? Min kalkuno ɓeen, tawde hari ko ɓe bonɓe.

³⁸Min tagiraali kammuuji ɗin e leydi ndin e ko woni hakkunde majji kon, fijooɓe.

³⁹Min tagiraali ɗin ɗiɗi, si wonaa e goonga. Kono ko ɓuri ɗuuɗude e maɓɓe, ɓe nganndaa.

⁴⁰Pellet, ko Ñalaande Seerndindiro ngon, woni ko ɓe saatinanaa, kamɓe fof.

⁴¹Ñalnde nde giɗo duncanoytaa giɗo [mum] hay hu'unde; ɓe wonaani kadi walloyteeɓe,

⁴²si wonaa mo Allah yurmaa woo. Pellet, ko Kaŋko woni pooluɗo, jurmotooɗo On.

⁴³Pellet, lekki Zaqquumi Kini.

⁴⁴ko ñaametee bakkodinɓe ɓeen.

⁴⁵A sikkay ko taayinaa ; hino fata ka ndeer deedi.

⁴⁶Wano ngulɗam fatirta.

⁴⁷Nanngee mo pooɗiron ka hakkunde dulɓatnge.

⁴⁸refti njuppon ka hoore makko, lepte patinaaɗe ɗeen.

⁴⁹Meeɗu noon ! Asn [sikkunooɗo] ko a poolɗo, tedduɗo.

⁵⁰Awa ko ɗuum woni kon ko cikkitiɗon e mum.

⁵¹Pellet, gooŋɗuɓe ɓren ngonii e weerde koolniinde,

⁵²e ndeer gese e ɓulli,

⁵³heɓe ɓoornoo ko ɗaati e ko tekki, hara hiɓe peewtondiri.

⁵⁴Ko wano noon. Min ndesini ɓe kadi yaacɓe gite.

⁵⁵Hiɓe nodda toon, kala muuyanteeɗi, hara ko ɓe hooliiɓe.

⁵⁶Ɓe meeɗataa toon maayde, si wonaa maayde aranere nden. O daɗnda ɓe lepte Jahiimi ɗeen.

⁵⁷ko dokkal noon, immorde ka Joomi maa. Awa ko ɗuum woni maloore mawnde ndeen.

⁵⁸Ko Min newiniri nde e ɗamngal maaɗa, ko no ɓe mbaajitora.

⁵⁹Habito. Kamɓe ne ko ɓe habbitiiɓe.