Maryam

¹Kaaf Haa Yaa ayn saad.[1]

²Jaŋto Yurmeende Joomi maaɗa jeyaaɗo makko on Jakariyaa.

³Tuma nde o noddunoo Joom makko noddaannu suuɗiindu.

⁴O maaki: "Jooma, min dey ƴi'e ɗen lo'ii e am hoore nden ranwi puri, mi laataaki non ɗawaaɗo ka toragol ma Jooma.

⁵Min dey mi hulii lomtotooɓe ɓen ɓaawo am, cuddiiɗo am on laatike dimaro okkam immorde ka maaɗa ɓiɗɗo.

⁶O rona kam, o rona kadi e ɓeynguure Yaaquuba nde waɗaa mo Joomi weltoraaɗo.

⁷Eeyma Jakariyaa Minen Min mbeltinirii ma suka innde makko ko Yahyaa Min mbɗanaani mo ko adii tokoraajo.

⁸O maaki: "Jooma ko honno laatoranta kam suka sonnaajo am on laatike dimaro min kadi mi yottike e nayewu yooruɗo tere?"

⁹[Maleka on] wi'i: "Ko nii Joomi maaɗa Daaliri: Ɗum no neewii e Am gooɗii Mi Tagiino ma ko adii, hari a laataaki huunde".

¹⁰O maaki: "Jooma waɗanam ma'ande". O Daali: "ma'ande maaɗa nden ko wota a wowlidu e yimɓe ɓen jemmaaji tati potondirɗi".

¹¹O yalti hakkunde yimɓe makko ɓen immorde ka ganngunal o joopii fa'ande e maɓɓe, ɗum woni subunhinee bimmbi e kiikiiɗe.

¹²Eeyma Yahyaa nanngir deftere nden doole, min n ngokki mo ñeeñal ko o suka.

¹³E Yurmeende immorde ka amen ko o laaɓuɗo o laatike kuloowo [Alla].

¹⁴Ko o ɗigganɗo jipnaaɓe mo ɓen o wonaani ndunndarankeejo gaaƴiiɗo.

¹⁵Kisal e makko ñande o jibinaa e ñande o maayata e Ñande o immintintee ko o guuruɗo.

¹⁶Jaŋto ka deftere Mariyama tuma nde o woɗɗitinoo immorde e yimɓe makko ɓen [o yaari] e nokkuure funnaangeyaŋkoore.

¹⁷O jogitii ga maɓɓe wirngallo, min Nuli e makko Ruuhu amen o nanndintinanii mo e ɓanndiŋke fotondirɗo.

¹⁸O maaki: min mi moolorii jurmoteeɗo On immorde e maaɗa si tawii a laatike ko a kulɗo [Alla].

¹⁹O wi'i: "Pellet, min ko mi Nulaaɗo Joomi maaɗa fii yo mi okke suka laaɓɗo.

²⁰O wi'i: "Ko hono laatoranta kam suka hara ɓanndiŋke memaani kam mi laataaki kadi jeenoowo(pijoowo)".

²¹O wi'i: "ko nii Joomi maaɗa Daaliri: "Ɗuum no newii e am e fii yo min mbaɗ mo ma'ande fii yimɓe ɓen e Yurmeende immornde e amen ɗum laatike fiyaake Ñaawaaɗo".

²²O roondii mo, o pottidodi e makko e nokkuure woɗɗitiinde.

²³Ŋata(qatwere) on fiɗi mo e jullere tamarohi, o wi'i: "Ee hara noon mi maayno ko adii ɗum mi laatoo hu'unde yejjitaande".

²⁴O noddi mo immorde e ley makki, [o wi'i] wota a suno gooŋɗii Joomi maaɗa waɗii ley maaɗa caatngol.

²⁵Yeƴu(dimmbu) fa'ade e maaɗa jullere tamarohi kin nde liɓa e ma,aɗa ɓennduɗe teɓeteeɗe.

²⁶Ñaam yaraa ɓuɓɓinaa gite, si a yi'ii goɗɗo immorde e ɓanndiŋke wi'u: "Miin dey mi takkanii Hinnorante(jurmotooɗo korka mi wowlidata e neɗɗaŋke hannde".

²⁷O radi e makko ka yimɓe makko, homo tammbii mo ɓe wi'i: "Ko an yo Mariyama gooŋɗii a addii hu'unde hawnii nde".

²⁸Eyma banndiraawo Haaruuna baaba maa laatanooki neɗɗo bonɗo neene maaɗa kadi laataaki jinoowo.

²⁹[Mariyama] joopii e makko, ɓe mbi'i:"Ko hono min njewtirta e on sanfaajo gonɗo e woofordu(liir) gondo e tiiggu".

³⁰[Iisaa] maaki: "Miin dey ko mi jiyaaɗo Alla o okkii kam deftere nden o waɗii kam annabaajo".

³¹O waɗi kam Barkinaaɗo nokku kala ka mi woni, o wasiyii kam Juulde nden e Jakka on fodde miɗo wuuri.

³²Ko mi ɗigganɗo yumma am, o waɗaani kam ndunndarankeejo malkisaaɗo.

³³Kisal on wonii e am ñande mi jibinaa e ñande mi maayata e ñande mi immintintee ko mi guuruɗo.

³⁴On ko Iisaa geɗal Mariyama Daalol Goongawol ngol heɓe cikkitoo fii mu'um.

³⁵Haananaa Alla nde o jogitotoo ɓiɗɗo senaare e wonanii mo, si O ñaawii fiyaake o daalanay mo tan: "Won" o wona.

³⁶Pellet, ko Alla Woni Joomi am e Joomi mon, mdewee o. Ko ɗum woni Laawol poocciingol".

³⁷Pelle ɗe luutondiri hakkunde majji, bone wonanii ɓen yedduɓe ceedagol ñalaande mawnde.

³⁸Kaawee ko nanirta yi'ira wa maɓɓe Ñande ɓe aroyta e amen, kono tooñooɓe ɓen hannde heɓe e ndeer majjere ɓanngunde.

³⁹Kulɓinir ɓe ñande Nimse, tuma nde fiyaake on ñaawaa hara kamɓe hiɓe e ndeer welsindaare hara ɓe gooŋɗinaa.

⁴⁰Minen min ndonat lesdi ndi e ɓen wonɓe e dow mayri, ko ka amen ɓe nduttetee.

⁴¹Jaŋto ka deftere Ibraahiima, pellet, kaŋko o laatino Goonguɗo annabaajo.

⁴²Tuma nde o maakannoo bem makko: "eeyma baaba ko holɗum ndewantaa ɗum ko nanataa yi'ataa hara duncantaa ma hay e hu'unde?

⁴³Eeyma baaba min dey gooɗii arii am immorde e Ganndal kon ko araani e maaɗa, jokkam mi fewne e Laawol po'occiingol.

⁴⁴Eeyma baaba, wota a rew Seytaane, pellet, Seytaane laatike jedduɗo jurmotooɗo.

⁴⁵Eeyma baaba, min dey miɗo huli wota meeme Lepte immorde ka jurmotooɗo laatanoɗaa Seytaane giɗo.

⁴⁶[Baaba makko] wi'i: "Enee, an a añ deweteeɗi am ɗin nee Ibraahiima, pellet, si a accaani mi fiɗete selam dummunne [juutuɗo].

⁴⁷[Ibraahiima] maaki: "Kisal e maaɗa aray mi inminanomaa ka Joomi am, pellet, Koŋko O Laatike Newaniiɗo kam.

⁴⁸Mi martoo(deestoo) on e kon ko ndewoton ga Alla, mi toroo Joomi am no gasa mi wonataa tampirɗo toragol Joomi am.

⁴⁹Tuma nde o martinoo(deestinoo) ɓe e ko ɓe ndewata kon gaAlla, min n ngokki mo Ishaaqa e Yaaquuba kala [gooto e maɓɓe] Men waɗi [mo] Annabaajo.

⁵⁰Min ngokki ɓe immorde e Yurmeende amen, min mbaɗani ɓe mantoore toownde.

⁵¹Jaŋto ka deftere Muusaa, pellet, kaŋko o laatinoke laɓɓinɗo o laatinoke kadi Nulaaɗo Annabiijo.

⁵²Min noddi mo ka senŋgo ñaamo [fello] Tuuri Min ɓattini mo gunndeteeɗo.

⁵³Min ngokki mo immorde e Yurmeende amen musiɗɗo makko on Haaruuna Annabiijo.

⁵⁴Jaŋto ka defftere Ismaa'iila, pellet, kaŋko o laatinoke gooŋɗuɗo fodoore o laatinoke kadi Nulaaɗo Annabiijo.

⁵⁵O laatino himo yamira yimɓe makko ɓen Juulde e askal on, o laatino kadi beltoraaɗo ka Joomi makko.

⁵⁶Jaŋto ka deftere Idriisa, pellet, kaŋko o laatino goonguɗo Annabiijo.

⁵⁷Men ɓamti mo e nokkuure Toownde.

⁵⁸Ko ɓeen ngoni ɓeen, ɓe Alla Neemini e dow mu'en immorde e Annabaaɓe ka geɗal ɓebibbe Aadama e ɓen ɓe Men mbaɗɗinnoo wond'ude e Nuuhu e geɗalɓe Ibraahiima e Israa'iila e ɓen ɓe Min peewni min n cuɓii si janngaama e dow maɓɓe aayeeje Hinnorante ɓe fukko koɓe sujjooɓe e wullooɓe.

⁵⁹Lomtii ɓaawo maɓɓe lomtotooɓe, ɓe njeeebi Juulde nden ɓe njokki welamuuji ɗin aray ɓe kawroya e bone.

⁶⁰Si wonaa on tuubuɗo o gooŋɗini o golli ko moƴƴi, ɓen ɗon ɓe naatat Aljanna on ɓe tooñiroy- taake hay e huunde.

⁶¹Aljannaaji Adan ɗin ɗi jurmotooɗo o Fodi jeyaaɓe makko ɓen e birnagal, pellet Kaŋko, Fodoore Makko nden laatike ko aroore.

⁶²Ɓe nanataa ndeer ton rayrayti si wonaa kisal no woodani ɓe arsike maɓɓe on nder ton bimmbi e kiikiiɗe.

⁶³Oon Aljanna mo Men ndoninta immorde e jeyaaɓe amen ɓen, on laatiiɗo kulol [Alla].

⁶⁴Min njippotaako si wonaa e Yamaruyee Joomi maaɗa, no woodani mo ko woni kon hedde yeeso amen e ko woni kon ɓaawo amen e ko woni kon hakkunde ɗum, Joomi maaɗa laataaki yejjitoowo.

⁶⁵Jooma kammuuli ɗin e lesdi ndin e ko woni kon hakkunde majji, rew mo monñitor dewal makko. Taw si haɗa anndani mo tokoraajo?

⁶⁶Neɗɗaŋke on no wi'a: "Eyoo, e jaka si mi maai aroyay ka mi yaltinee tawa ko mi guurɗo?"

⁶⁷Enee, neɗɗaŋke on annditaani Menen Men Tagiino mo ko adii, hari o wonaali hay e hu'unde.

⁶⁸Mi woondirii Joomi maaɗa min mooɓat ɓe sanne e Seytanuuji ɗin, refti min ngadda ɓe sara Jahannama ko ɓe jiccii ɓe.

⁶⁹Refti min n ɗo'ofa immorde e kala fedde ko hommbo e maɓɓe ɓurnoo saɗtude dartagol e dow jurmotooɗo e o.

⁷⁰Refti ko minen nganndi ɓeen ɓurɓe haan'dude e sumugol e magge.

⁷¹Alaa hay e gooto e mo'on si wanaa o joloyat e magge, ɗum laatike e dow Joomi maaɗa ko ñaawaɗum Teeŋtinaa.

⁷²Refti min ndaɗna ɓen hulunooɓe [Alla] min n ɗala tooñooɓe ɓen ko ɓe jicciiɓe ndeer ton.

⁷³Si janngaama e taweede maɓɓe aayeeje amen Ɓannguɗe ɗe yedduɓe ɓe mb'a gom- ɗimɓe ɓen: "Ko honnde e feddeeji ɗi ɗiɗi ɓuri moƴƴude darnde ɓuri moƴƴude kadi batu".

⁷⁴Heewii ko min kalki ado maɓɓe immorde e gire tawi ko kamɓe ɓuri fotude mirannji suudu e mba'adi.

⁷⁵Maaku: "On laatiiɗo e ndeer majjere nde yo jurmotooɗo fortan mo fontudee, haa si ɓe yi'ii ko ɓe fodaa kon, si tawii ko lepte ɗen maa si ko Darngal ngal, aray ɓe annda on m bonuɗo nukkuure e ɓurɗo lo'ude konu".

⁷⁶Alla no ɓeydana ɓen feewɓe Peewal, Moƴƴi heddotooɗi ɗin ɓuri moƴƴude mbarjaari ka Joomi maaɗa ɓuri moƴƴude kadi ruttorde.

⁷⁷Enee, a yi'ii on jedduɗo aayeeje amen ɗe, o wi'i: "Maatun mi okkee jawdi e ɓiɗɗo".

⁷⁸Enee o ƴelliti e ko wirnii kon, kaa jogiti ka jurmotooɗo e Aadi?

⁷⁹Wonaa non, aray Min mbinnda ko o wi'ata kon min ɓeydana mo immorde e Lepte ɗen ɓeydude.

⁸⁰Min ndonna mo e ko o wi'ata ko, o ara e Amen ko o weddiiɗo(gooto).

⁸¹Ɓe njogitii ga Alla deweteeɗi fii yo ɗi laatano ɓe semmbe.

⁸²Wonaa non, maɓe njeddu dewugolɓe ngol, ɓe laatanoo ɓe añɓe.

⁸³Enee a yiaani minen min Nulii Seytanuuji e dow yedduɓe ɓen hiɗi ƴuuna ɓe ƴuunudee.

⁸⁴Wata a hawjan ɓe, pellat, limonayɓebe kala limugol.

⁸⁵Ñande Min mooɓoyta hulooɓe [Alla] ɓe ka jurmotooɗo Teddinaaɓe.

⁸⁶Men cogga bonɓe ɓe haa ka Jahannama ko ɓe jolooɓe.

⁸⁷Ɓe maraa tefoore nden si wonaa on jogitiiɗo ka jurmotooɗo Aadi.

⁸⁸Ɓe mbi'i: "jurmotooɗo jogitike ɓiɗɗo".

⁸⁹Gooŋɗii on mgaddii hu'unde pankarɗii nde.

⁹⁰Kammuuli ɗin no do'a(ɗesa) se'ekaade immorde e ɗuum leydi ndin feera pelle ɗe nduuya fii unagol.

⁹¹fii ɓe noddanii jurmotooɗo ɓiɗɗo.

⁹²Haananaa jurmotooɗo de o jogitotoo ɓiɗɗo.

⁹³Alaa ko woni e kammuuli e leydi si wanaa o aray e jurmotooɗo hombo woni jeyaaɗo.

⁹⁴Gooɗii o moftii ɓe o limii ɓe kadi e limugol.

⁹⁵[Gooto] Kala e maɓɓe aray Mo Ñande Darngako o woddiiɗo(teeldɗo).

⁹⁶Pellet, ɓeen gooɗinɓe ngolli ko moƴƴi ko aray ka jurmotooɗo waɗanaɓe Giggol.

⁹⁷Anndu ko min n newiniri nde ka ɗenngal maaɗa; ko fii yo a weltinir nde hulooɓe [Alla] ɓen njertiniraa nde yimɓe saɗtuɓe weeñre.

⁹⁸Heewii ko min kalki ado maɓɓe e gire taw si hiɗa so'a e maɓɓe immorde e goɗɗo, maa haɗa nana ɓe hito?