Ali 'Imran

¹Alif, Laam, Miim.[1]

²Alla: reweteeɗo woo alaa si wanaa Kaŋko. Ko o wuurɗo, ñiiɓuɗo.

³O Jippinirii deftere nden dow maaɗa e goonga, goonginnde ko adii nde o Jippini Tawreeta e Linnjiila.

⁴Ko adii, fii fewnugol yimɓe ɓen, o Jippini AlQur'aana. Pellet yedduɓe aayeeje Alla ɗen, hino woodani ɓe leɓte saɗtuɗe. Alla ko fooluɗo, Joom njoɓtiigu.

⁵Pellet, Alla, huunde suuɗotaako mo ka leydi wanaa ka kammu.

⁶Ko kaŋko woni mba'dinoowo on ka renngaaji no o muuyiri. Reweteeɗo woo alaa si wanaa kaŋko, fooluɗo, ñeeñuɗo.

⁷Ko Kaŋko Woni Jippinɗo Deftere nden e maaɗa, no e mayre aayeeje ɓaŋnguɗe; ko kanje woni neene deftere nden, e goɗɗe goo nannduɗe. Ammaa ɓen ɓe ooñaare woni e nder ɓerɗe mun, hiɓe jokka ko nanndi kon e majje ɗaɓɓugol fitina e ɗaɓugol firtugol ɗe. Anndataa firo majje si wanaa Alla. Tutiiɓe ɓen e ganndal no wi'a: "Men gomɗinii nde, kala mun ko immorde ka Joomi amen". Waajitotaako si wanaa joomiraaɓe haqqillaaji ɓen.

⁸joomi amen, wata ooñu ɓerɗe amen ɗen ɓaawo nde fewnu-ɗaa men, yeɗu men yurmeende immorde ka maaɗa.Pellet ko aan woni dokko.

⁹Joomi amen, pellet ko a mooɓoyoowo yimɓe ɓen ñalnde nde sikke alaa he mun pellet Alla luutintaa fodoore nden.

¹⁰Pellet ɓen yedduɓe, jawle maɓɓe e ɓiɗɓe maɓɓe duncaŋtaaɓe leɓte Alla ɗen hay huunde. Ko ɓen woni carmale yiite ngen.

¹¹Wano mbowdi yimɓe Fir'awna e ɓen adinooɓe ɓee. Ɓe fennii aayeeje amen ɗen, Alla nanngitiri ɓe bakkatuuji maɓɓe ɗin. Alla ko saɗtuɗo leɓte.

¹²Maakan ɓen yedduɓe: "on fooloyte mooɓoye-ɗon ka jahannama". Nge bonii ndaɗɗudi.

¹³Goongɗii laatanike on aaya e ɗin feddeejji ɗiɗi fottuɗi fii haɓugol: fedde goo no haɓa e laawol Alla, wonnde goo ko yeddunde, hiɓe yi'iraɓe yeru maɓɓe laawɓi ɗiɗi giiɗe gite. Alla no Semmbinira balla makko ngal o mo o muuyi. Pellet, no e ɗum waaju wonannde joomiraaɓe haqqillaaji.

¹⁴Yimɓe ɓen cuɗinanaama yiɗugol tuuyooji: immorde he rewɓe e ɓiɗɓe worɓe, e jawle tuginidiraaɗe, immorde e kaŋŋe e kaalise, e pucci ŋarɗiɗaaɗi, e neemoraaɗi, e remuru. Ɗum ɗon, ko dakamme nguurdam aduna. Alla, no ka makko moƴƴuɗum ruttorde.

¹⁵Maaku: "E yo mi humpitu on ko ɓuri moƴƴude e ɗum mon?". No woodani ɓen huluɓe ka Joomi maɓɓe, aljannaaji, no ila senngo ley majji, caalli: ko ɓe luttooɓe ton, wondude e sonnaaɓe laɓɓinaaɓe, e yerluyee immorde ka Alla. Alla ko Reŋtuɗo jeyaaɓe ɓen.

¹⁶Ɓen wi'ooɓe: "Joomi amen, menen men goongɗinii, yaafa men junubaaji amen, daɗndaa men leɓte yiite".

¹⁷Muññiiɓe ɓen e goonguɓe ɓen e ɗoftiiɓe ɓen e wiŋtooɓe e nafkoobe ɓen e insinotooɓe ɓen ka weetndogaaji.

¹⁸Alla Seedike wonde reweteeɗo alaa si wanaa kaŋko, Malaa'ika en kadi, e joomiraaɓe ganndal ɓen, ko o daraniiɗo nunɗal. reweteeɗo alaa si wanaa Kaŋko, on fooluɗo ñeeñuɗo.

¹⁹Pellet diine oo to Alla, ko lislaamu o. Okkaaɓe Defte ɓen lurraali si wonaa caggal de ganndal ngal ari ema66e; ko bewre hakkunde maɓɓe. Kala jedduɗo aayeeje Alla ɗen, pellet Alla ko jaawuɗo hasboore.

²⁰Si ɓe njeddandiri e ma, wii: "Mi jebbilanii yeeso am ngo e Alla min e 6een jokku6e e am ". Wii ɓen okkaaɓe Defte e humam binne en 6e: " E on njebbilima?" Si ɓe njebbilima, goongo ɓe 6eewii, si ɓe ndunitiima, enee, ko fawi maa ko yottin de. Alla ko jioowo jeyaaɓe ɓe.

²¹Pellet, ɓen yeddooɓe aayeeje Alla ɗee, heɓe mbara Annabaaɓe ɓe ko aldaa e goonga, ɓe mbara ɓeen yamirooɓe nunɗal, welitinir ɓe lepte muusɗe.

²²Ko ɓen woni ɓe golleeji mun boni ɓen ka aduna e ka laakara, ɓe alaa wallooɓe.

²³E a yi'aali okkaaɓe geɗal e deftere nden, hiɓe noddee e deftere Alla nden fii no nde ñaawira hakkunde maɓɓe, refti fedde he maɓɓe ko ruŋtiiɓe tawi ko ɓe ɗuurniiɓe?!

²⁴Waɗi noon ɓe wi'ii: "Yiite ngen meemataa men si wanaa ñalɗi limtaaɗi". hoomtiiɓe he diina maɓɓe kan, huunde nde ɓe fefindotonoo.

²⁵E ko hol no si men mooɓoyii ɓe e Ñalaande nde sikke alaa e mu'un, woŋkii kala hunanee ko ki faggitii kon? Tawi ɓe tooñetaake.

²⁶Maaku: "Yaa Aan Laamɗo Jeyɗo laamu, hiɗa okka laamu on mo muuyu-ɗaa, Hiɗa ɓoora laamu on mo Muuyu-ɗaa, hiɗa teddina on mo muuyu-ɗaa, hiɗa hoyna on mo muuyu-ɗaa. Moƴƴere nden ko e junngo maaɗa woni, pellet, aan e huunde kala, ko a kattanɗo:

²⁷Haɗa Naatna jehma on ndeer ñalawma he, Haɗa Naatna ñalawma o ndeer jehma he. Haɗa Yaltina ko wuuri immorde e ko maayi, yaltinaa ko maayi immorde e ko wuuri. Haɗa Arsikina on mbo Muuyɗaa ko aldaa e limoore.

²⁸Wata juul6e 6e njogitor heeferɓe ɓe yiɗaaɓe ɓe ngacca gomɗimɓe ɓe. Kalo mbo waɗii ɗuum, o laataaki jeyaaɗo e diine Alla he hay e huunde, si wanaa nde kulaton e maɓɓe bone. Alla homba on Reentina Hoore-Mun. Ko faade to Alla woni ruttorde nden.

²⁹Wii:Si on cuuɗii ko woni e ɓerɗe mon maa si on peññali ɗum,Alla homba ɗum anndi,Hombo Anndi ko woni ka kammuuli e ko woni e leydi Alla ko kattan-ɗo kala huunde.

³⁰Ñande kala woŋkii tawata ko ki gollun ko e moƴƴere hino ɓannaa, e huunde ko ki golle e bone, ki yeloo sinno wonayno hakkunde makki e majje dumunne woɗɗuɗo. Alla no Reeentina on Hoore Mun. Alla ko jurmotooɗo jeyaaɓe ɓe.

³¹31wii si onngonii hoɗon njidi Alla, cukke e am, Alla yiɗa on yaafo mon bakkatuuji mon, Alla ko kafroowo jurmotooɗo.

³²Wii: "Ɗoftee Alla e Nulaaɗo on", si ɓe huccitii to, pellet, Alla yiɗaa yedduɓe ɓen.

³³Pellet, Alla Suɓiima Aadama e Nuuhu e yimɓe Ibraahiima ɓeen e yimɓe Imraana ɓee e hoore tagoore hee:

³⁴Jurriiya=genyol yoga e maɓɓe iwii e yoga. Alla ko Nanoowo gannduɗo.

³⁵Tumo de debbo Imraana on wi'noo: "Joomi am, min mi takkanii Ma ko woni ko nder reedu am, ko rimɗinaa ɗum, jaɓanam, pellet, An woni Nanoowo gannduɗo".

³⁶Nde o jibinnoo mo o wi'i: "Min mi jibinii mo ko o deyel", ko Alla ɓuri Anndude ko O jibini, gorko laataaki wano debbo. "Min mi innii mo Maryama, min mi moolii mbo e Maaɗa e 6esngu makko o immorde seytaane diiwaaɗo diddaaɗo o".

³⁷Joomi makko Jaɓiani mbo jaɓannde moƴƴere,O Neiri mo needi moƴƴundi,O Halfini mo Jakariya.Tuma kala Jakariya naati e nokku makko e Mihraab,o tawda mo e arsike,o wi'a:Hey, Mariyam hol no heɓirɗaa ɗum?O jaaboo:Ɗum ko ta Alla iwri.Pellet,no Arsika on O Muuyi ko aldaa e limoore.

³⁸Ko ton Jakariraa'u noddi Jooma mun o maaki: "Joomi am, Yeɗam immorde ka Maaɗa, jurriiya laaɓuɗo, pellet, An ko A Nanoowo noddaandu".

³⁹Maleykaji en noddi mo hawri homo darii hombo juula to ganngunal, won de: "Alla No WewliniramaYahyaa, goonginɗo Konngol iwrungol ka Alla: koohoojo, e reenaaɗo [e tuuyo], e Annabaajo jeyaaɗo e moƴƴuɓe"

⁴⁰O wii: "Joomam, hol no ɓiɗɗo laatorantoomi, gomɗii mi nawyii, debbo am on ko dimaro?" O wii: "Ko wano noon Alla Waɗirta ko O Muuyi [waɗde]".

⁴¹O wii: "Joomi, Waɗanam maande". O wii: "Maande maa nde, ko nde a haaldotaa e yimɓe ɓe ɓalɗe tati si wonaa e joopagol. Jaŋtoɗaa Joom maaɗa ko heewi: subbunhino-ɗaa kiiki e bimmbi".

⁴²Tuma nde Maleykaaji en mbinoo: "Hey Maryama, pellet Alla Suɓimaa ma, O Laɓɓinii ma [O Suɓii]maa e dow rewɓe winndere he".

⁴³Hey Maryam, toƴƴinano Joomi maa, sujjaa ndukƴƴidaa e rukƴƴooɓe ɓen.

⁴⁴Ɗum ɗoo, ko jeyaaɗum e kumpite birniiɗe, Meɗen Wahayina ɗe e maaɗa. A tawanooka e maɓɓe nde ɓe weddotonoo kuɗi maɓɓe ɗin: ko hommbo e maɓɓe ne'ata Maryama; a tawanooka e maɓɓe kadi nde ɓe wennjaynoo.

⁴⁵Nde Maleykaaji en mbi'noo: "Hey Maryama, Alla no Wewlinirmaa Konngol immorde e Maako: Innde makko, ko meema-sella, Iisaa geɗal Maryama, koohoojo aduna e laakara, jeyaaɗa e ɓaɗtinaaɓe [ka Alla]."

⁴⁶Hombo yeewtida e yimɓe ɓe ka woofordu=tiggu e ka sagatalaaku, ko o jeyaaɗo e moƴƴuɓe ɓen.

⁴⁷O wi'i: "Joom am, hol no ɓiɗɗo laatoraŋta am, ɓanndiŋke meemaani kam?". O Daali: "Ko wano non. Alla no Taga ko O Muuyi. Si O Ñaawii fiyaake, O Daalanay mo [tun]: "Laato! o laatoo".

⁴⁸Hombo Anndina mo Deftere nde e Ñeeñal ngal e Tawreeta e Linnjiila.

⁴⁹E Nulaaɗo faade e ɓiɓɓe Israa'iila en, wonnde: "Gomɗii mi addanii on maande immorde ka Joomi mon. Wonnde miɗo tagana on immorde e loopal ko wa'i wa sonndu, mi wutta e muuɗum woŋtira sonndu e Duŋayee Alla. Mi wumtina bunɗo, mi sellina baadaaɗo, mi wuurnitira maayɓe e duŋayee Alla. Mi humpita on ko ñaamoton e ko maroton ka cuuɗi mon. Pellet, hino e ɗum, maande wonanannde on si on laatike gomɗimɓe,

⁵⁰e goonginɗo ko woni yeeso am immorde e Tawreeta, e no mi daknanana on yoga e ko harmannoo on, mi addanii on maande immorde ka Joom mon. kulee Alla ɗoftoɗon kam.

⁵¹Pellet, ko Alla Woni Joomi am e Joomi mon, ndewee Mo. Ko ɗum woni laawol focciingol".

⁵²Tuma nde Iisaa so'unoo keeferaaku ngu e maɓɓe, o wii: "Ko hommbo wallata kam e [diina] Alla [kan]?". Hawaaruyaŋko en wi'i: "Menen ko men wallooɓe [e diina] Alla [kan], men gomɗinii Alla, seedo won de ko men jebbiiliiɓe".

⁵³Joomi amen, min gomɗinii ko nJipinɗaa Kon, men jokkii Nulaaɗo on, Winndu amen e seediiɓe ɓen.

⁵⁴Ɓe pewji Alla Kadi Fewji. Ko Alla ɓuri moƴƴude e fewjooɓe ɓe.

⁵⁵Tuma Alla winoo: "Hey Iisaa, Min ko mi Hunnoowo ma e Ɓamtoowo ma faade ta Am, e Laɓɓinoowo ma immorde e ɓen yedduɓe, e Waɗa ɓen jokkuɓe ma e dow ɓeen yedduɓe haa Ñande Darngal. Refti ko faade ka Am woni ruttorde mon, Mi Ñaawa hakkunde mon ko luutondirayno-ɗon e muuɗum.

⁵⁶Ammaa ɓen yedduɓe, Mi Lepta ɓe ɗon lepte muuuɗe ka aduna e ka laakara, alanaaɓe faabotooɓe.

⁵⁷Ammaa ɓen gomɗimɓe ɓe golli golle-moƴƴe, O timminanay ɓe njo6di maɓɓe ndin. Alla Yiɗaa tooñooɓe ɓen".

⁵⁸Ɗuum ɗo, Miɗen Janngana maa ɗum, immorde e Aayeeje e Jaŋtoore Ñeeñɗunde.

⁵⁹Pellet, sifa Iisaa ka Alla, ko sifa Aadama; O Tagii mo immorde e leydi, refti O Daalani mo: "Laato!" o laatii.

⁶⁰Goonga kan ko ko immori ko Joomi maa, wata a laatodo e ɓen sikkitiiɓe.

⁶¹Kala wennjuɗo ma fii makko ɓaawo kon ko ar e maa e ganndal, maaku: "Aree nodden ɓiɗɓe amen e ɓiɗɓe mo'on, e rewɓe amen e rewɓe mo'on, e ko'e amen e ko'e mo'on, refti ñaagoɗen mbaɗen kuddi Alla ndin e hoore fenooɓe ɓen".

⁶²Pellet ɗum ɗoo, ko ɗum woni fillayee goonga. Alaa deweteeɗo si wanaa Alla, pellet, Alla ko Kaŋko Woni Fooluɗo Ñeeñuɗo.

⁶³Si ɓe huccitii, pellet Alla ko gannduɗo bonnooɓe ɓen.

⁶⁴Maaku: "Hey yimɓe Defte, aree faade e konngol fotatngol hakkunde amen e mo'on : won de en ndewataa si wanaa Alla, en kafidataa Mo e huunde, wata yoga e me'en jogito yoga joomiraaɓe ko woori Alla". Si ɓe huccitii, wi'ee: "Seeditee won de menen ko men jebbiliiɓe".

⁶⁵Ee hey mon yimɓe deftete, ko mbeeñdaton e geɗe Ibraahiima, Tawreeta e Linnjiila njppinaaka si wonaa ɓaawo makko : e on kaqqiltaa!.

⁶⁶Hey ko onon ɓee, on wennjii kon ko ganndal woodani on e mu'un, ko wennjaŋton ko danndal alanaa on e mu'un? Alla no Anndi onon on nganndaa.

⁶⁷Ibraahiima laatanooki Alyahuuyaŋke wonaana kadi Annasaaraajo, si ko woni, o laatinoke ooñiiɗo [e kala diina] jebbilaniiɗo [Diina Lislaamu], o laatanooki jeyaaɗo e shirkooɓe ɓen.

⁶⁸Pellet, ko ɓuri haadude e Ibraahiima e yimɓe ɓen : ko ɓen jokkuɓe mo, e oo Annabiijo, e ɓen gomɗimɓe. Alla ko Giɗo gomɗimɓe ɓen.

⁶⁹Fedde goo e yimɓe Defte ɓen njidi nde ɓe majjina on, ɓe majjiŋtaa si wanaa ko'e maɓɓe ɗen ɓe so'aa anndude.

⁷⁰Hey mon yimɓe Defte, e ko njeddaŋton Aayeeje Alla Ɗen tara onon ko on seediiɓe?

⁷¹Hey mon yimɓe Defte, e ko jillaŋton goonga kan e meh-re nden hoɗon cuuɗa goonga kan tara onon hoɗon ganndi?

⁷²Fedde goo jeyaande e yimɓe Defte ɓen wi'i: "Gomɗinee ko jippinaa kon e ɓen gomɗimɓe ka arannde ñallal, yeddon ka sakkitoode mayre, bela jo'o, ɓe ruttoo.

⁷³Wato on gomɗin si wonaa on jokkuɗo diina mon kan". Maaku: "Pellet, ko Peewal Alla ngal woni Peewal". [Ko kulil fii ] wata goɗɗo goo okke yeu ko okkaɗon kon maa ɓe wennjiroya on ɗum ko Joomi mon. Maaku: "Pellet ɓural ngal ko e Junngo Alla woni, Homo weeɗa ngal on Mo O Muuyi". Alla ko jaacɗo [ɓural] Annduɗo.

⁷⁴Hombo Hertinana Yurmeende Makko nde on mo o muuyi. Alla ko Jom ɓuural Mawngal.

⁷⁵No e yimɓe Defte ɓen, on mo kalfiŋtaa jawdi wonayndi KINTAAR, on jonnite ndi; hino e maɓɓe kadi, on mo kalfiŋtaa "diinaaru", on jonnitataa ma ndu si wanaa a darani mo daŋkaranni-ɗaa. Ɗum non, ko tawde kamɓe ɓe wi'i: "Laatanaaki men e humammbinneeɓe ɓen laawol"; hiɓe taƴa penaale huma e Alla hara kamɓe heɓe nganndi.

⁷⁶Aa'a, kala kuu6nuɗo ahadi mu'un o huli, pellet, Alla no Yiɗi hulooɓe Mo ɓen.

⁷⁷Ɓen wostoratɓe ahadi Alla ndin e goondooje maɓɓe coggeloy pamɗukoy, ɓen ɗon, geɓal alanaa ɓe ka laakara, Alla yeewtidataa e maɓɓe, O Ndaaroytaa ɓe Ñande Darngal, O Laɓɓiŋtaa ɓe, no woodani ɓe lepte muusuɗe.

⁷⁸No e maɓɓe fedde : hiɓe ooñira ɗemɗe maɓɓe ɗen e Deftere nden no sikkiron ɗum ko jeyaaɗum e Deftere nden, ɗum le jeyaaka e Deftere nden; hiɓe wi'a : "Ɗum ko ko iwri ka Alla", ɗum le wanaa ka Alla iwri; hiɓe takka penaale hoore Alla hara kamɓe hiɓe ngnndi.

⁷⁹Laatanaaki ɓanndiŋke nde Alla Okkata mo Deftere e fahmu e Annabaaku, refti o wi'ana yimɓe ɓen: "Laatee jeyaaɓe am ko woori Alla", si ko woni: "Laatoree tutiiɓe-e-gannde-diina, ko laatinoɗon hiɗon janngina Deftere nden e ko laatiɗon hiɗon jannga"

⁸⁰Wanaa nde o yamirta on jogitorgol Maleykaaji en e Annabaaɓe ɓen reweteeɓe. E o yamiray on keeferaaku ɓaawo nde wonɗon julɓe?!

⁸¹Tuma nde Alla ƴettunoo ahadi e Annabaaɓe ɓen : "Si Mi Addanii on Deftere e fahmu, refti Nulaaɗo ari e mo'on goonginɗo kon ko jogiɗon, ma on gomɗin mo wallitoɗon mo". O Daali: "E on qirritike ɗum, on ƴettii e hoore mun ahadi?". Ɓe wi'i: "Men qirritike". O Daali: "Seeditee, Miɗo wondi e mo'on ka seeditiiɓe".

⁸²On huccituɗo ɓaawo ɗum, ko ɓen woni yalu6e e dowitaare ɓen.

⁸³E ko woori Diina Alla kan ɓe ɗaɓɓata? Hino woodani mo jebbilaare ɓeen won ɓe ka kammuuli e ka leydi, ɗoftaare maa waawneede, ko fa`ade ka Makko ɓe nduttotoo.

⁸⁴Maaku: "Men gomɗinii Alla e ko jippinaa dow amen e ko jippinaa dow Ibrahiima e Isma'iila e Ishaaqa e Yaaquuba e Taaniraaɓe ɓen e ko Muusaa e Iisaa okkaa e Annabaaɓe ɓen immorde ka Joomi maɓɓe. Men serndataa hakkunde gooto e maɓɓe, Menen wonan de Mo ko men jebbiliiɓe".

⁸⁵Kala ɗaɓɓuɗo ko woori Lislaamu on Diina, o jaɓaŋtaake ɗum, on ɗon ka laakara, ko o jeyaaɗo e pertuɓe ɓen.

⁸⁶Hol no Alla Fewnirta yimɓe yedduɓe ɓaawo gomɗinal maɓɓe ɓe seedii won de Nulaaɗo on ko goonga, ɓanngannduyeeji ɗin arii ɓe? Alla Fewnataa yimɓe tooñooɓe ɓen.

⁸⁷Ɓen ɗon, joɓdi maɓɓe ndin, ko no fawii ɓe kuddi Alla ndin e Maleykaaji en e yimɓe ɓen ɓe denndaangal.

⁸⁸Ko ɓe luttooɓe e magge. Ɓe hayfinaŋtaake lepte ɗen, ɓe wonaali nee6nanteeɓe.

⁸⁹Si wonaa ɓeen tuubuɓe ɓaawo ɗuum ɓe moƴƴini. Pellet, Alla ko jaafotooɗo jurmotooɗo.

⁹⁰Pellet, ɓeen yedduɓe ɓaawo gooŋɗinal maɓɓe, refti ɓe ɓeydorii keeferaaku, tuubugol maɓɓe jaɓetaake; ko ɓeen ɗon noni majjuɓe ɓeen.

⁹¹Pellet, ɓen yedduɓe ɓe maayi ko ɓe heererɓe, gooto e maɓɓe jaɓaŋtaake, leydi ndin tew kaŋŋe; hay si o sootorii ɗum. Ɓen ɗon, no woodani ɓe lepte muusuɗe, ɓe alaa wallooɓe.

⁹²On keɓataa moƴƴere nden haa wiŋtoɗon e ko ɓuruɗon yiɗude kon. Kala woo ko wiŋtiɗon, pellet Alla no Anndi ɗum

⁹³Kalo ñamri laatino koko daganii ɓiɗɓe Israa'iila en, si wonaa ko Israa'iila harminanno hoore-mun ko adii Tawreeta Jippaade. Maaku: "ngaddee Tawreetaare nden jnanngon nde, si on laatiima gooŋguɓe".

⁹⁴Kala pekindiiɗo fenaande [dammbi] e Alla ɓaawo ɗum, ko ɓen ɗon woni tooñooɓe ɓen.

⁹⁵Maaku: "Alla gooŋɗii. Njokke diina Ibraahiima kan; ooñiika [gaa diinaaji mehre], o laatanooki jeyaaɗo e ɓen sirkooɓe.

⁹⁶Pellet, aranndu e Suudu waɗanaandu yimɓe ɓen, ko ndun wondu Bakkata; barkinaandu e peewal wonan de Winndere nden.

⁹⁷Ino e mayru kaawisaaji ɓannguɗe : darorde Ibraahiima nden. Kala naatuɗo e mayru, o laatoo kooliiɗo. No woodani Alla e dow yimɓe ɓen hajjugol ka Suudu [hormaandu], wona nde on hattanɗo e mayru laawol. Kala on yedduɗo, pellet, Alla ko Yonndiniiɗo e winndere nden.

⁹⁸Maaku: "Hey mon yimɓe Defte, e ko njeddanton Aayeeje Alla ɗiin, Alla ko ceediiɗo ko ngolloton kon?".

⁹⁹Maaku: "Hey mon yimɓe Defte, ko falotoɗon e laawol Alla ngol, on gomɗinɗo Hoɗon ɗaɓɓana ngol ooñanɗe tara ko on seediiɓe! Alla wonaali Welsindiiɗo e ko ngolloton kon".

¹⁰⁰Hey mon gooŋɗinɓe, si on ɗoftike fedde e ɓen okkaaɓe defte, ɓe nduttay on heeferɓe ɓaawo gooŋɗinal mon.

¹⁰¹E ko honno njeddirton nde tawnoo Aayeeje Alla ɗen no janngeede e dow mooɗon, Nulaaɗo Makko on kadi no hakkunde mo'on? Kala on mooliiɗo e Alla, gomɗii o fewnaama e laawol foccii ngol.

¹⁰²Hey mon gomɗimɓe, kuliree Alla no O Haaniri hulireede, wata on maayu dey, si wanaa hara ko on jebbiliiɓe.

¹⁰³Jogitee ɓoggol Alla ngol on denndaangal, wata on certu. Jaŋtoɗon dokkeAlla on e dow mooɗon nde laatinoɗon ayruɓe, O Woowindiri hakkunde ɓerɗe mon ɗen woŋtirɗon e dokke Makko koo on musiɗɓe; on laatioke e tonndu ngayka yiite, O Daɗndi on e magge. ko wano nii Alla Ɓannginiraŋta on Aayeeje Makko ɗen, bela jo'o, on feeway.

¹⁰⁴Yo laato e mooɗon mofte : noddooje e moƴƴere, yamirooɓe ko moƴƴi haɗooɓe ko añinii. Ko ɓen ɗon ngoni malaaɓe ɓen.

¹⁰⁵Wata on laato hona ɓen sertuɓe lurri ɓaawo nde laaɓtuɗiɗin ari e maɓɓe. Ɓen ɗon, no woodani ɓe lepte muusuɗe.

¹⁰⁶Ñande jeece rawnata geece goo ɓawla. Si ko ɓen ɓe jeece mu'un ɓawli : "e on yeddu ɓaawo gomɗinal mon? Meeɗiree lepte ɗen sabu ko laatinoɗon hiɗon njedda".

¹⁰⁷Si tawii ko ɓeen ɓe jeece mun ndanwni, ɓe ngonii e ndeer Yurmeende Alla, kamɓe ko ɓe saasooɓe toon.

¹⁰⁸Ɗee ɗoo, ko Aayeeje Alla, Miɗen Janngira ɗe e dow maaɗa e goonga. Alla wonaani muuyoowo tooñde e winndere he.

¹⁰⁹Ko Alla Woodani kala ko woni deer kammuuji e leydi, ko faade ka Alla woni ruttorde fiyakuuji ɗin.

¹¹⁰On laatike leñol ɓurngol moƴƴude yaltinanaangol yimɓe ɓen:hiɗon njamiraa ko moƴƴi haɗon ko kaɗo, koh bonii hoɗon goŋɗini AllaSi yimɓe Defte ɓen gooŋɗinno,ɗum laatotono moƴƴere wonannde ɓe.No e maɓɓe goŋɗinɓe, kono ko ɓuri ɗuuɗude ko e maɓɓe ko yaluɓeɗoftaare

¹¹¹Ɓe lorrirtaa on si wanaa lorra [ɗemɗe]. Si ɓe kaɓiimaɓii on , maaɓe nduŋtu ɓaawoo maɓɓea refti, ho ɓe mballetaake.

¹¹²Koyeera faŋtike ɓe nokku kala ka ɓe tawaa, si wanaa ɓe ƴettu ahadi ka Alla e ka yimɓe ɓen. Ɓe hootidi e tikkere immorde ka Alla ɓe huuɓiŋtiniraa baasal : ɗum non, ko tawde ɓe laatinoke hiɓe yedda Aayeeje Alla ɗen, ɓe wara Annabaaɓe ɓen ko aldaa e goonga. Ɗum non, ko sabu ko ɓe njeddi kon, ɓe laatii jaggitooɓe.

¹¹³Ɓe ngona fotatɓe. No e yimɓe defte ɓeen fedde feewunde : heɓe njannga Aayeeje Alla ɗe saangaaji jemma, heɓe cujja.

¹¹⁴Hiɓe ngooŊɗina Alla e Ñannde Sakkitiinde nden, hiɓe njamira ko moƴƴi kaɗa ko bonii, hiɓe yaccoo e moƴƴereeje. Ɓen ko jeyaaɓe e moƴƴuɓe ɓen.

¹¹⁵Huunde fof ko ɓe mbaɗi e moƴƴere, ɓe njeddantaake ɗum. Alla ko gannduɗo hulooɓe ɓen.

¹¹⁶Pellet, ɓen yedduɓe, jawɗeele maɓɓe e ɓiɓɓe maɓɓe dunncantaa- ɓe lepte Alla ɗen hay huunde. Ko ɓen ɗon woni yimɓe yiite ɓen : kamɓe ko ɓe luttooɓe ton.

¹¹⁷Sifa ko ɓe nafqata kon e ɗam nguurndam aduna; no wa'i wa henndu, no e mayru ɓuuɓol, ndu hawri e coñal yimɓe tooñooɓe, ndu halka mba[ngesa]. Alla Tooñaani ɓe, si ko woni, ko ko'e maɓɓe ɓe tooñi.

¹¹⁸Hey mon yo goŋɗinɓe, wata on jogito weldiiɓe ko woori on : ɓe raɓɓikintaako on e fii bonnugol on. Ɓe yelike nde tampoton. Gooŋɗii ngañgu ngun feeñirii ka kunndule maɓɓe, ko ko ɓerɗe maɓɓe ɗen cuuɗi kon ɓuri mawnude.Goŋɗii Men Ɓannginanii on Aayeeje ɗen, si on laatike haqqilooɓe.

¹¹⁹Onon ɓee, hiɗon yiɗi ɓe kamɓe ɓe yiɗaa on. Hiɗon goŋɗini Deftere nden fow, si ɓe hawrii e mo'on, ɓe wi'a: "Men gooŋɗinii", si ɓe weddike, ɓe ŋatana on kolli immorde e tikkere. Maaku: "Maayee e tikkere mon", pellet, Alla ko Annduɗo ko woni e ɓerɗe.

¹²⁰Si moƴƴere heɓii on, metta ɓe, si bone kadi heɓii on, ɓe mbeltora ɗum. Si on muññike on gomɗii, pewje maɓɓe ɗen lorrataa on hay huunde. Pellet, Alla ko Huuɓitiiɗo golle maɓɓe.

¹²¹Tuma nde dawnoɗaa ka ɓeynguure maaɗa, haɗa werna gooŋɗuɓeɓe tommborɗe hare. Alla ko Nanoowo gannduɗo.

¹²²Tuma nde feddeeji ɗiɗi e mo'on himmu no, nde cooyato, ko Alla non woni Giɗo maɓɓe. Ko Alla woni ko goŋɗimɓe ɓen haani hoolorde.

¹²³Gooŋɗii Alla Wallii on ñande Badri, tawi ko on hoyɓe. Kulee Alla, belajo'o on yettay [Mo].

¹²⁴Nde maakanaynoɗaa gooŋɗinɓe ɓen: "Enee, yonaŋtaa on nde Joomi mo'on ɓeydanta on Malaa'ikaaɓe guluuje tato jippinaaɓe?".

¹²⁵Pellet, si on muññike on gomɗii, e arday on hawjere maɓɓe, ɗum ɗoo, Joomi mo'on no Ɓeydira on guluuje jowi Malaa'ika maandinaaɓe.

¹²⁶Alla Waɗiraani ɗum si wanaa wewlere wonannde on, e no ɓerɗe mon ɗen ɗeeƴira ɗum. Ballal iwrataa si wanaa ka Alla, On pooluɗo, Ñeeñuɗo.

¹²⁷Ko fii yo O tayƴu fedde e ɓen yedduɓe maa O Wirta ɓe, ɓe nduttoo ko ɓe sooyuɓe.

¹²⁸Laatanaaki ma e fiyaake on hay e huunde : maa O Jaɓan ɓe tuubuubuyee, maa O Lepto ɓe, pellet, kamɓe ko ɓe tooñooɓe.

¹²⁹Ko Alla Woodani kala ko woni ka kammuuli e ka leydi. Himo Haforana on mo O Muuyi, O Lepta on mo O Muuyi. Alla ko Haforoowo Yurmeteeɗo.

¹³⁰Hey mon yo goŋɗimɓe, wata on ñaamu ribaa, cowalle sowaaɗe. Kulee Alla, belajo'o, on malete.

¹³¹kulee ngen yiite maranaange ɓen heeferɓe.

¹³²Ɗoftee Alla e Nulaaɗo on, belajo'o, on njurmete.

¹³³Yaccee faade e haforanal immorde ka Joomi mo'on e Aljanna, yaajeendi Makko ndin no fota [e yaajeendi] kammuuli ɗin e leydi ndin, o maranaama ɓen gomɗuɓe.

¹³⁴Ɓen nafqooɓe ka neweende e ka saɗteende neweende, e ɓen suuɗooɓe tikkere, e ɓen yaafotooɓe yimɓe ɓen. Alla no Yiɗi moƴƴinooɓe ɓen.

¹³⁵e ɓen tawɓe si ɓe mbaɗii panŋkare maa ɓe tooñii ko'e maɓɓe, ɓe nganndita Alla ɓe insinanoo jbakkatuuji maɓɓe ɗin . E ko hommbo haforata si wanaa Alla? Hara ɓe deppitaaki e ko ɓe mbaɗi kon, tawa hiɓe nganndi.

¹³⁶Ɓen ɗon, njoɓdi maɓɓe ndin ko yaafuyee immorde ka Joomi maɓɓe, e Aljannaaji : no ila e ley majji, caatli, duumotooɓe ton. Moƴƴii mbarjaari gollooɓe ɓen.

¹³⁷Gomɗii yawtii ado mon ɗate. Njahee ka leydi ndaaron hol no battane fennunooɓe ɓen laatornoo .!

¹³⁸Ɗum ɗoo, ko Ɓanngannduyee wonannde yimɓe ɓen, e peewal e waaju wonannde gooŋɗuɓe ɓen.

¹³⁹Wata on lo'ino, wata on cuno, ko onon woni toowuɓe ɓen, si on laatike gooŋɗuɓe.

¹⁴⁰Si barme heɓii on, goŋɗii barme sugu mun heɓii yimɓe ɓen. Ɗii ñalɗi, Meɗen Yiltindira ɗi hakkunde yimɓe ɓen, e fii no Alla Anndira gooŋɗinɓe ɓen, O Jogitoo e mooɗon seedatooɓe. Alla Yiɗaa tooñooɓe ɓen.

¹⁴¹e fii yo Alla Laɓɓin ɓen gooŋɗinɓe O Halka heeferɓe ɓen.

¹⁴²Kaa on cikku on naatay Aljanna hara Alla Anndaali ɓen tiɗniiɓe e mooɗon O Annda muññiiɓe ɓen?

¹⁴³Gooŋɗii on laatike hiɗon yeloo maayde nden ado on hawrude e mayre, gooŋɗii on yi'ii nde hiɗon ndaara.

¹⁴⁴Muhammadu wonaani si wanaa Nulaaɗo : gooŋɗii feƴƴii ko adii mo Nulaaɓe. E si o faatike maa o waraama, on waylitoto e baɗte [keeferaaku] mo'on ? Kala waylitiiɗo e baɗte mu'un, o lorrirtaa Alla hay e huunde, arma Alla Yoɓita ɓen jaarnooɓe [Mo].

¹⁴⁵Laatanaaki woŋki nde ki maayata si wanaa e duŋayee Alla. Ko winndaaɗum [waɗanaa] lajal. Mo faandike njoɓdi aduna, Men Okkay mo e mayri, mo faandi kadi njoɓdi laakara, Men Okkay mo e mayri, ma Men njoɓ jaarnooɓe ɓen.

¹⁴⁶Heewii e Annabaaɓe ɓe haɓi wondude e maɓɓe jamaaji ɗuuɗuɗi, ɓe lo'inanooki sabu ko heɓi ɓe kon e laawol Alla, ɓe lo'aano ɓe jaasiŋkinaaki. Alla no Yiɗi muññotooɓe ɓen.

¹⁴⁷Konngol maɓɓe laataaki si wanaa wi'ugol: "Joomi amen, haforan men bakkatuuji amen e fantingol amen nder fiyaake amen, tabiŋtinaa teppe amen, wallaa men e dow yimɓe heeferɓe ɓen".

¹⁴⁸Alla Okki ɓe mbarjaari aduna ndin e moƴƴere mbarjaari laakara. Alla no Yiɗi moƴƴinooɓe ɓen.

¹⁴⁹Hey mon yo goŋɗimɓe, si on ɗoftike ɓen heeferɓe, ɓe ruttay on e batte [kaaferaaku] mon, waylitoɗon ko on hayruɓe(pertube).

¹⁵⁰Si ko woni, ko Alla woni Giɗo mon, ko Kaŋko woni ɓurɗo moƴƴuɗo e wallooɓe ɓe.

¹⁵¹Arma Men mberoo kulol e nder ɓerɗe ɓen heeferɓe, sabu ko ɓe kafidi Alla e kon ko O Jippinanaali hujja. Jaaƴnde maɓɓe ko ka yiite, bonii jaaƴnde ɓen tooñooɓe.

¹⁵²Goŋɗii Alla Goonginanii on Fodoore Makko nden tuma nde waraynoɗon ɓe e Duŋayee Makko, haa nde cooyɗon lurruɗon e fiyaake ɗen, yedduɗon ɓaawo o hollii on ko yiɗuɗon. No e mon ɓen faalaaɓe aduna, no e mon kadi ɓen faalaaɓe laakara. Hooti O Yiili on e maɓɓe fii yo O Ndaarndo on. Goŋɗii O Yaafanike on. Alla ko Jom Ɓural e dow goŋɗimɓe ɓen.

¹⁵³Tuma nde dogaynoɗon on yeƴƴitaako hay e gooto, Nulaaɗo on no noddira on ɓaawo mon. Suno e hoore suno heɓi on fii wata on cuno e kon ko laawii on wanaa e kon ko heɓi on. Alla ko kumpitiiɗo e ko. Ngolloton ko

¹⁵⁴Refti O Jippini e mo'on ɓaawo annde nden, hoolaare : ŋoŋre, hende sudda fedde e mo'on ; fedde goo, pittaali maɓɓe no aanini ɓe, hiɓe sikka Alla ko wanaa goonga ; sikke yimɓe majjere, heɓe mbia: "mbele no woodani men e fiyaake ɗen goɗɗum ?" Maaku: "Pellet, fiyaake ɗen fof ko Alla woodani". Hiɓe cuuɗa e pittaali maɓɓe ɗin ko ɓe feññinantaa ma, hiɓe mbi'a: "Si tawno no woodannoo men e fiyaake ɗen goɗɗum, men mbaretanooke ɗoo". Maaku: "Hay si tawno on ngonno ka cuuɗi mon, feeñayno ɓeen ɓe Alla Winndi e dow mun maayde ka lelorɗe maɓɓe", e fii yo O Laɓɓin ko woni ɓerɗe mon. Alla ko Annduɗo ko woni e ɓerɗe.

¹⁵⁵Pellet, ɓen doknooɓe e mo'on ñande koneeli ɗin ɗiɗi fottunoo, anndu pellet, ko seytaane fergitiɓe sabu yoga e ko ɓe faggitii. Gooŋɗii Alla Yaafike ɓe. Pellet, Alla ko Yaafotooɗo Muñoowo.

¹⁵⁶Hey mon yo goŋɗinɓe, wata on wa'u wa ɓen heeferɓe ɓe wi'ani siɗɓe maɓɓe ɓen : "Si ɓe njehii ka leydi, maa ɓe laatike haɓooɓe, si ɓe laatino ka amen goo, ɓe waretanooke", ko fii yo Alla Waɗir ɗum ɗon nimse ka ɓerɗe mo'on, Alla ko jioowo ko golloton kon.

¹⁵⁷Hay si on mbara e fii laawol Alla maa on maayii, ko yaafuyee immorde ka Alla e yurmeende ɓuri moƴƴude ko ɓe mooɓata.

¹⁵⁸Si on maayii maa on mbraama, pellet, ko ka Alla mooɓeteɗon.

¹⁵⁹Ko sabu yurmeende imoorde ka Alla newaniɗaa ɓe. Si laatino saɗtuɗo tikka ɓerndeejo, ɓe lancotono ɓe iwa takko maa. Yaafo ɓe imsinanoɗaa ɓe, diisinoɗaa ɓe e fiyaake ɗen. Si a fellitii, fawo e Alla. Pellet, Alla no Yiɗi fawotooɓe ɓen [e Makko].

¹⁶⁰Si Alla Wallii on pooloowo on alaa., si O Hoynii on ko hommbo wallata on ɓaawo Makko? Ko e Alla woni ko goŋɗimɓe ɓen haani fawaade.

¹⁶¹Laatanaaki Annabaajo woo nde o jamfotoo. Kala jamfiiɗo o addoyay ko o jamfii kon Ñande Darngal.Hooti woŋkii kala yoɓee njoɓdi ko ki faggitii, kamɓe ɓe tooñetaake.

¹⁶²E ko on jokkuɗo welayee Alla on wa'ata wa on duttodiiɗo e tikkere immornde ka Alla kadi jaaƴnde makko nden ko jahannama? nge bonii ruttorde.

¹⁶³Kamɓe ko ɓe darjaaji ka Alla, Alla ko ji*oowo ko ɓe ngollata kon.

¹⁶⁴Goŋɗii Alla Moƴƴike e goŋɗinɓe ɓen, tuma nde O Imminnoo e maɓɓe Nulaaɗo jeyaaɗo e maɓɓe, himo janngana ɓe Aayeeje Makko, himo laɓɓina ɓe, himo anndina ɓe Deftere nden e Ñeeñal ngal, hay si ɓe woniino adii nder majjere ɓanngunde.

¹⁶⁵E nde musiiba heɓunoo on, goŋɗii on heɓiino yeru mun ɗiɗi, wi'uɗon: "No ɗum woniri?!" Maaku: "Ɗum ko immorde e pittaali mo'on". Pellet, Alla ko kaɗtanɗo kala huunde.

¹⁶⁶Ko heɓi on kon ñande dente ɗen ɗiɗe fottunoo, ko e Duŋayee(sakkitoore) Alla, e fii no Alla Anndira goŋɗinɓe ɓen.

¹⁶⁷e no O Anndira ɓen naafiqiiɓe, ɓe wi'anaa: "ngaree kaɓeɗon fii laawol Alla ngol maa duñon". Ɓe wi'i: "Si meɗen ganndunoo hare men jokkay on". Kamɓe nden ñande heen, ko keeferaaku ngun ɓurnoo ɓaɗtaade e dii goŋɗinal ngal : hiɓe wowlira kunnduɗe maɓɓe ko alaa e ɓerɗe maɓɓe. Ko Alla Ɓuri Anndude ko ɓe soomi.

¹⁶⁸Ɓeen wi'anɓe musiɗɓe maɓɓe, ɓe njooɗii: "Si tawno ɓe ɗoftino men, ɓe mbaretanooke". Makku: "Pottinee maayde nden e pittaali mo'on si on laatike gooŋɗuɓe!".

¹⁶⁹Wata a sikku ɓen waraaɓe fii laawol Alla ngol ko maayuɓe, ko woni: ko wuuruɓe ka Joomi maɓɓe hiɓe arsikinee,

¹⁷⁰hiɓe mbeltori ko Alla Okki ɓe kon e Ɓural Makko, hiɓe mbeltina ɓen [siɗɓe] maɓɓe ɓe ɓe hawraani e mu'un ɓaawo maɓɓe, wonnde kulol alanaa ɓe, wanaa kamɓe woni ko sunoytoo.

¹⁷¹Hiɓe mbeltora( weltoro) dokke immo rde ka Alla e ɓural. E wonnde pellet, Alla yeebataako njoɓdi goŋɗinɓe ɓen.

¹⁷²Ɓen nootiiɓe Alla e Nulaaɗo on ɓaawo nde barmeere nden heɓi ɓe. Hino woodani ɓen moƴƴinɓe e maɓɓe ɓe kulii Alla, njoɓdi mawndi.

¹⁷³Ɓen ɓe yimɓe ɓen wi'annoo: "Pellet yimɓe ɓen mooɓanike on, kuleeɓe". Ɗum ɓeydi ɓe goŋɗinal, ɓe wi': "Alla yonii men, O moƴƴii yonndinoraaɗo".

¹⁷⁴Ɓe ruttodi e dokke immorde ka Alla e ɓural, bone hewtaali ɓe, ɓe jokki yarluyee Alla on. Alla ko Jom-ɓural mawngal.

¹⁷⁵Nganndee pellet, ɗum mo'on ko seytaane : himo hulɓinira ɗum weldiiɓe makko ɓen. Wata on kul ɓe, kulee Lam, si on laatike goŋɗimɓe.

¹⁷⁶Wata sunine ɓen yaccotooɓe e keeferaaku, pellet, ɓen lorrataa Alla hay huunde. Alla Yiɗi ko nde o waa-sata Waɗannde geɗal ka laakara. No woodani ɓe lepte mawɗe.

¹⁷⁷Pellet, ɓen sottitoriiɓe keeferaaku ngun goŋɗinal, ɓe lorrataa Alla hay huunde. Hino woodani ɓe lepte muusuɗe.

¹⁷⁸Wota ɓeen yedduɓe cikku won de ko Min Neeɓnirani ɓe kon ko moƴƴere pittaali ɗin. Anndu pellet, ko Min Neeɓirani ɓe ko no ɓe ɓeydora bakkaat. Hino woodani ɓe lepte hkynayɗe.

¹⁷⁹Laatanaaki Alla nde O Accata goŋɗimɓe ɓen e hoore ko wonɗon e mun kon haa O Senndindira soɓuɗo e laaɓuɗo. Laatanaaki Alla kadi nde O Ƴelliŋta on e ko wirnii kon, si ko woni, Alla no Suɓora e Nulaaɓe Makko ɓen on mo O Muuyi. nGooŋɗinee Alla e Nulaaɓe Makko ɓen, si on goŋɗinii on goŋɗii, hino woodani on njoɓdi mawndi.

¹⁸⁰Wata ɓen wuddirooɓe ko Alla Okki ɓe kon e Ɓural Makko sikku ɗum ko moƴƴere wonannde ɓe. Si ko woni, ɗum ko bone wonannde ɓe. Arma ɓe ŋannanoye ko ɓe wuddiri kon Ñande Darngal. Ko Alla woodani ndonndi kammuuli ɗin e leydi ndin. Alla ko Humpitiiɗo ko golloton.

¹⁸¹Gooŋɗii Allaahu on Nanii konngol ɓen wi'uɓe: "Alla ko baasɗo menen ko men alɗuɓe!". Arma Men winnda ko ɓe wowli kon e wargol ɓe ngol Annabaaɓe ɓen ko aldaa e goonga, Men Daala: "Meeɗee lepte sunna-royta"

¹⁸²Ɗuym waɗirii sabu ko juuɗe mon ɗen ngardini kon. E won de pellet, Alla Wonaani tooñoowo jeyaaɓe ɓen.

¹⁸³Ɓen wi'uɓe: "Alla Ahodii e amen wota men goŋɗin Nulaaɗo woo haa on addana men ɓaɗtorɗum, yiite no ñaama ɗum". Maaku: "Goŋɗii Nulaaɓe goo ado am addaniino on ɓanngannduyeeji e kon ko wi'uɗon, e ko waranɗon ɓen si on laatike goognuɓe?".

¹⁸⁴Si ɓe njeddii ma, gooŋɗii Nulaaɓe goo ado maa pennanooma, ɓe ngadduno e Ɓanngannduyeeji (peeñɗi) Ɗeri e Deftere jalbuunde.

¹⁸⁵Kala woŋkii meeɗay maayde. Pellet, ko on hunnaŋteeɓe njoɓdiiji mon ɗin Ñande Darngal. Kala on pottinaaɗo e yiite ngen o naadaa Aljanna, goŋɗii o malaama. Nguurda aduna ɗam wonaani si wanaa dakammehun hodaykun.

¹⁸⁶Ma on njarribore jawɗeele mon ɗen e pittaali mon ɗin, ma on nanir ɓen okkaaɓe Defte ɓen ado mooɗo e ɓen sirkuɓe lorra ɗuɗuka. Si on muññike on goŋɗii, pellet, nganndee ɗum, ko jeyaaɗum e pellite fiyakuuji.

¹⁸⁷Jaŋtii tuma nde Alla Ƴettunoo Ahadi e okkaaɓe Deftere ɓen : "Ma on ɓannginannde yimɓe hara on cuuɗaani nde". Ɓe mbernii ndi ɓaawo maɓɓe ɓe sodtitori ndi coggel pamarel! Bonii ko ɓe soɗtitori!

¹⁸⁸Wata sikke ɓen weltorayɓe huunde nde ɓe okkaa, hiɓe yiɗi nde ɓe yettirtee ko ɓe mbaɗaani, wata sikku ɓen ko daɗayɓe lepte ɗen. Hino woodani ɓe lepte muusuɗe.

¹⁸⁹Ko Alla Woodani Laamu kammuuli ɗin e leydi ndin. Alla ko kattanɗo kala huunde.

¹⁹⁰Pellet, no e tagugol kammuuli ɗin e leydi ndin e luutondirgol jemma e ñalawma ngol, ko Aayeeje wonannde ɓen haqqilooɓe.

¹⁹¹Ɓen annditooɓe Alla ka ɓe darii e ka ɓe jooɗii e ka ɓe lelori becce maɓɓe, hiɓe miijitoo fii takgol kammuuli ɗin e leydi ndin : "Joomi amen, A Tagiraani ɗum meere, senayee woodanii Ma, Ɗaɗndu men lepte yiite".

¹⁹²Joomo amen, pellet, An, Mo Naaduɗaa yiite, goŋɗii A Hoynii mo. Alanaa tooñooɓe ɓen wallooɓe.

¹⁹³Joomi amen, menen men nanii noddoowo no nodda e goŋɗinal wonnde : "Goŋɗinee Joomi mon", men gomɗini. Joomi amen, Haforan men junuubi amen, Motanaa men boneeji amen, mbarda men e ɗigguɓe ɓen.

¹⁹⁴Joomi amen, Okku men ko poduɗaa men kon e dow Nulaaɓe Maa ɓen, wata A Hoynu men Ñande Darngal. Pellet, An A Lunndotaako fodoore.

¹⁹⁵Joomi maɓɓe Jaabinani ɓe : Min Mi Yeebataa golle golloowo e mooɗon, woni gorko maa debbo, yoga e mooɗon iwde e yoga. Ɓen ferɓe yaltinaa ka galleeji mun,ɓe lorraa e Laawol Am ngol, ɓe kaɓaa ɓe mbaraa, ko pellet Min hafratɓe bonɗi maɓɓe ɗin, e ko pellet Mi Naatnay ɓe Aljanna ɗi caatli no ila e mun, ɗum ko njoɓdi immorde ka Alla, No ka Alla njoɓdi moƴƴundi.

¹⁹⁶Wata hode yiltondirgol ɓen heeferɓe ka leydi .

¹⁹⁷dakammeyon pamaroy, hooti jaaƴnde maɓɓe nden ko jahannama, nge bonii ndaɗɗo!

¹⁹⁸Kono ɓen huluɓe Joomi maɓɓe, hino woodani ɓe Aljannaaji, hino ila ley majji caatli; ko ɓe duumotooɓe nder majji, ɗum ko jipporde immorde ka Alla. Ko woni ka Alla ɓuri moƴƴani ɗigguɓe ɓen.

¹⁹⁹Pellet, no e yimɓe Defte ɓen, on goŋɗinɗo Alla e ko Jippinaa e mon kon, e ko Jippinaa e maɓɓe kon ; yaŋkinanii ɓe Alla, ɓe waɗtitirtaa Aayeeje Alla ɗen coggeloy pamaroy. Ɓen, hino woodani ɓe njoɓdi maɓɓe ndin ka Joomi maɓɓe. Pellet, Alla ko Yaawuɗo ñaawoore.

²⁰⁰Ko onon yo goŋɗinɓe, muññee, fooliron muñal, tuuntondɗon, kulon Alla, belajo'o on maloyete.