Ash-Shams

¹Ako (Dios) nanumpa pinaagi sa adlaw ug ang kahayag niini una udto.

²Maingon man sa bulan nga naga-sunod sa adlaw (nagpabanaag sa kahayag sa adlaw).

³Pinaagi sa adlaw, sa diha nga kini nagapahayag sa iyang kahayag,

⁴Ug ( pinaagi sa) kagabion, sa diha nga kini mitabon niini (sa adlaw),

⁵Ug (pinaagi sa) langit ug Kaniya nga Maoy nagbuhat niini,

⁶Ug (pinaagi sa) yuta ug Kaniya nga nagbuklad niini,

⁷Ug (pinaagi sa) kalag, ug Kaniya nga naghingpit kaniya sa hulagway,

⁸Ug Siya nagdasig niini aron masabtan kon unsa ang husto ug sayop alang kaniya,

⁹Siya sa pagkatinuod magmalampuson, siya nga nagaputli sa iyang kaugalingon (gikan sa kadautan),

¹⁰Apan siya nga nagdaut niini kasigurohan nga pagahikawan 'sa maayong'.

¹¹(Ang tribo ni) Thamud nagsalikway (sa Kamatuoran) pinaagi sa ilang paglapas,

¹²Sa diha nga ang labing dautan kanila gipadala ˹aron sa pagpatay sa baye nga kamelyo˺.

¹³Busa ang Mensahero sa Allāh (Salih) miingon kanila: "Kini usa ka baye nga kamelyo nga gilalang sa Allāh, busa pasagdi siya (sa) pag-inom (ug ayaw siya pasakiti)".

¹⁴Apan sila misalikway kaniya, ug mipiang (ug dayon mipatay) kaniya (kamelyo), busa ang ilang Ginoo (Allah) midugmok kanila tungod sa ilang mga sala, ug kini (ang silot) mipatag kanila (ngadto sa yuta o naghimo niini nga tupong ngadto kanilang tanan).

¹⁵Ug Siya (Dios) wala mahadlok sa mga sangpotanan niini[1].