Al-A'la

¹Dayga ug Himayaa ang Ngalan nga imong Ginoo (Allāh), ang Labing Taas,

²Nga mao ang nagbuhat (sa tanang butang), ug unya miumol niini (sa kahingpit).

³Nga maoy nagtino ug naggiya,

⁴Nga maoy nag-paturok ug nagpagula sa sibsibanan,

⁵Unya naghimo niini nga malaya sama sa abog.

⁶Kami maghimo kanimo (Oh Muhammad) nga magalitok (sa Qur'an), aron nga ikaw dili makalimot,

⁷Gawas sa unsay gibuot sa Allah, sa pagkatinuod Siya nasayud kun unsa ang dayag, ug unsa ang tinago.

⁸Kami maghimo niini nga sayon ​​alang kanimo, (sa pagsunod) sa sayon ​​nga Dalan (sa Islam).

⁹Busa padayun sa pagpahinumdum, basta ang pagpahinumdom mapuslanon.

¹⁰Siya nga anaa sa kahadloki sa Allāh mahinumdom niini,

¹¹Apan ang labing alaot maglikay niini,

¹²kinsa paga-sunugon sa labing dako nga kalayo.

¹³Ug didto siya dili na mamatay ni mabuhi.

¹⁴Siya sa pagkatinuod makabaton ug malungtarong kalipay kinsa nagaputli sa iyang kaugalingon (gikan sa kadautan),

¹⁵Ug magdayeg sa Ngalan sa iyang Ginoo - Allāh - ug nag-ampo.

¹⁶Apan gipalabi ninyo 'mga manlilimod' ang kinabuhi niining kalibutana,

¹⁷Samtang ang Pikas Kinabuhi maoy labing maayo ug mas malungtaron.

¹⁸Sa pagkatinuod, kini anaa sa nahaunang mga 'Balaan' nga Kasulatan,

¹⁹Ang mga Kasulatan ni Abraham ug ni Moises.