Al-Ghashiyah

¹Midangat ba kanimo ang balita mahitungod sa Makalilisang nga hitabo (sa Pagkabanhaw)?

²Pipila ka mga nawong nga nianang Adlawa mapakaulawan (ang mga nawong sa mga manlilimod),

³Nga hago pag-ayo 'sa kini niini kinabuhi', ug gikapoy uban ang hila-bihan nga kaluya (sa Pikas Kinabuhi),

⁴Sila mosulod sa naga-dilaab nga kalayo,

⁵Ug didto sila paga-paimnon sa usa ka nagbukal nga init nga tubod.

⁶Ug didto wala silay makaon gawas sa usa ka makahilo ug tunokon nga tanum,

⁷Nga dili makaamuma o makatagbaw (kanila) batok sa kagutom.

⁸Ubang mga nawong nianang adlawa magmalipayon (ang mga nawong sa mga magtotoo),

⁹Nalipay pag-ayo sa ilang pagpaningkamot 'alang sa gingharian sa Dios',

¹⁰Sa hataas nga tanaman (Paraiso),

¹¹Didto, dili sila makadungog ug mga pulong nga kawang (o dautan).

¹²Didto adunay nagadagayday nga mga tubod,

¹³Uban sa mga trono nga gipataas,

¹⁴Ug mga kopa nga gibutang andam,

¹⁵Ug mga unlan nga gipanglaray,

¹⁶Ug mga alpombra nga nangabuklad.

¹⁷Nan wala ba nila gitan-aw ang mga kamelyo, kun giunsa sila paglalang?

¹⁸Ug sa langit, kun giunsa kini pagpataas?

¹⁹Ug ang mga kabukiran, kun giunsa sila pagbutang nga malig-on?

²⁰Ug ang yuta, giunsa kini mikaylap?

²¹Busa (padayon sa) pagpahinumdom (kanila), kay ikaw usa lamang ka tigpahinumdom.

²²Wala nimo sa pagpugos kanila 'sa pagtuo';

²³Apan bisan kinsa nga motalikod ug naglimod (sa Kamatuoran),

²⁴Ang Allah mosilot kaniya sa Labing Dako nga pagsakit.

²⁵Sa pagkatinuod nganhi Kanamo (Allah) ang ilang pagbalik,

²⁶Ug unya, sa pagkatinuod nganhi Kanamo (Allāh) mao ang ilang pag-ihap (ug Paghukom).