Al-Infitar

¹جب آسمان پھٹ جائے گا.[1]

²اور جب ستارے جھڑ جائیں گے.

³اور جب سمندر بہہ نکلیں گے.[1]

⁴اور جب قبریں (شق کر کے) اکھاڑ دی جائیں گی.[1]

⁵(اس وقت) ہر شخص اپنے آگے بھیجے ہوئے اور پیچھے چھوڑے ہوئے (یعنی اگلے پچھلے اعمال) کو معلوم کر لے گا.[1]

⁶اے انسان! تجھے اپنے رب کریم سے کس چیز نے بہکایا.[1]

⁷جس (رب نے) تجھے پیدا کیا،[1] پھر ٹھیک ٹھاک کیا[2]، پھر (درست اور) برابر بنایا.[3]

⁸جس صورت میں چاہا تجھے جوڑ دیا.[1]

⁹ہرگز نہیں بلکہ تم تو جزا وسزا کے دن کو جھٹلاتے ہو.[1]

¹⁰یقیناً تم پر نگہبان عزت والے.

¹¹لکھنے والے مقرر ہیں.

¹²جوکچھ تم کرتے ہو وه جانتے ہیں.[1]

¹³یقیناً نیک لوگ (جنت کے عیش وآرام اور) نعمتوں میں ہوں گے.

¹⁴اور یقیناً بدکار لوگ دوزخ میں ہوں گے.[1]

¹⁵بدلے والے دن اس میں جائیں گے.[1]

¹⁶وه اس سے کبھی غائب نہ ہونے پائیں گے.[1]

¹⁷تجھے کچھ خبر بھی ہے کہ بدلے کا دن کیا ہے.

¹⁸میں پھر (کہتا ہوں کہ) تجھے کیا معلوم کہ جزا (اور سزا) کا دن کیا ہے.[1]

¹⁹(وه ہے) جس دن کوئی شخص کسی شخص کے لئے کسی چیز کا مختار نہ ہوگا، اور (تمام تر) احکام اس روز اللہ کے ہی ہوں گے.[1]