Al-Qamar

¹Napalapit ang Huling Sandali at nabiyak[1] ang buwan [sa dalawa].

²Kung makakikita sila [na mga tagatangging sumampalataya] ng isang himala ay aayaw sila at magsasabi sila: “Isang panggagaway na nagpapatuloy.”

³Nagpasinungaling sila [sa Qur’ān] at sumunod sila sa mga pithaya nila. Bawat bagay ay mananahan.

⁴Talaga ngang dumating sa kanila mula sa mga balita [ng mga kalipunan] ang may pantaboy [sa kawalang-pananampalataya].

⁵[Ang Qur’ān ay] isang masidhing karunungan, ngunit hindi nagpapakinabang [sa kanila] ang mga babala.

⁶Kaya tumalikod ka sa kanila [hanggang] sa araw na mananawagan ang [anghel na] tagapanawagan tungo sa isang bagay na kakila-kilabot.

⁷Habang mga nagtataimtim ang mga paningin nila, lalabas sila mula sa mga pinaglibingan na para bang sila ay mga balang na kumakalat,

⁸na mga kumakaripas patungo sa tagatawag. Magsasabi ang mga tagatangging sumampalataya na ito ay isang araw na mahirap.

⁹Nagpasinungaling bago nila ang mga kababayan ni Noe sapagkat nagpasinungaling sila sa lingkod Namin [na si Noe] at nagsabi silang baliw [siya] at ipinagtabuyan siya.

¹⁰Kaya dumalangin siya sa Panginoon niya: “Tunay na ako ay nadaig kaya mag-adya Ka.”

¹¹Kaya nagbukas Kami ng mga pinto ng langit na may tubig na bumubuhos.

¹²Nagpabulwak Kami sa lupa ng mga bukal, saka nagtagpo ang tubig [ng langit at lupa] ayon sa isang utos na itinakda.

¹³Nagdala Kami sa kanya sa [daong na] may mga tabla at mga pako.

¹⁴Naglalayag ito sa [pagsusubaybay ng] mga mata Namin bilang ganti para sa dating tinanggihang sampalatayanan.

¹⁵Talaga ngang nag-iwan Kami nito bilang tanda, kaya may tagapag-alaala kaya?

¹⁶Kaya papaano naging [matindi] ang pagdurusang dulot Ko at ang mga babala Ko?

¹⁷Talaga ngang nagpadali Kami sa Qur’ān para sa pag-aalaala, kaya may tagapag-alaala kaya?

¹⁸Nagpasinungaling ang [liping] `Ād [sa propeta nilang si Hūd], kaya papaano naging [matindi] ang pagdurusang dulot Ko at ang mga babala Ko?

¹⁹Tunay na Kami ay nagsugo sa kanila ng isang hanging pagkalamig-lamig sa isang araw ng isang kasawiang-palad na nagpatuloy.

²⁰Humuhugot ito sa mga tao na para bang sila ay mga tuod ng mga punong datiles na nasungkal.

²¹Kaya papaano naging ang pagdurusang dulot Ko at ang mga babala Ko?

²²Talaga ngang nagpadali Kami sa Qur’ān para sa pag-aalaala [at pag-unawa], kaya may tagapag-alaala kaya?

²³Nagpasinungaling ang [liping] Thamūd sa mga babala.

²⁴Kaya nagsabi sila: “[Kay Ṣaliḥ na] taong nag-iisa kabilang sa amin ba susunod kami? Tunay na kami, samakatuwid, ay talagang nasa isang pagkaligaw at isang pagkaulol.

²⁵Iniukol ba ang paalaala sa kanya sa gitna namin? Bagkus siya ay isang palasinungaling na walang-galang.”

²⁶Makaaalam sila bukas kung sino ang palasinungaling na hambog.

²⁷Tunay na Kami ay magsusugo ng dumalagang kamelyo bilang tukso para sa kanila, kaya mag-antabay ka sa kanila at magtiyaga ka.

²⁸Magbalita ka sa kanila na ang tubig ay binabahagi sa pagitan nila; bawat pag-inom ay halinhinan.

²⁹Ngunit nanawagan sila sa kasamahan nila, kaya kinuha nito [ang tabak] at kinatay nito.

³⁰Kaya papaano naging [matindi] ang pagdurusang dulot Ko at ang mga babala Ko?

³¹Tunay na Kami ay nagsugo sa kanila ng hiyaw na nag-iisa kaya sila ay naging gaya ng mga tuyot na sanga [na tinanggihan ng] ng nagkukural.

³²Talaga ngang nagpadali Kami sa Qur’ān para sa pag-aalaala [at pag-unawa], kaya may tagapag-alaala kaya?

³³Nagpasinungaling ang mga kababayan ni Lot sa mga babala.

³⁴Tunay na Kami ay nagsugo sa kanila ng mga bato [na sumalanta sa kanila] maliban sa mag-anak ni Lot; nagligtas Kami sa kanila sa huling bahagi ng gabi

³⁵bilang pagpapala mula sa ganang Amin. Gayon Kami gumaganti sa sinumang nagpasalamat.

³⁶Talaga ngang nagbabala siya sa kanila ng pagsunggab Namin ngunit nagtaltalan sila hinggil sa mga babala.

³⁷Talaga ngang humiling sila sa kanya [na manghalay] sa panauhin niya kaya pumawi Kami sa mga mata nila, [na nagsasabi:] “Kaya lumasap kayo ng pagdurusang dulot Ko at mga babala Ko.”

³⁸Talaga ngang may sumapit sa kanila sa umaga na isang pagdurusang nananahan.

³⁹Kaya lumasap kayo ng pagdurusang dulot Ko at mga babala Ko.

⁴⁰Talaga ngang nagpadali Kami sa Qur’ān para sa pag-aalaala, kaya may tagapag-alaala kaya?

⁴¹Talaga ngang dumating sa mga alagad ni Paraon ang mga babala.

⁴²Nagpasinungaling sila sa mga tanda Namin sa kabuuan ng mga ito kaya dumaklot Kami sa kanila ng pagdaklot ng isang Makapangyarihan, isang Tagakaya.

⁴³Ang mga tagatangging sumampalataya ninyo ba ay higit na mabuti kaysa sa mga [nalipol na kalipunang] iyon o mayroon kayong kawalang-kaugnayan sa [pagdurusang nasaad sa] mga kasulatan?

⁴⁴O nagsasabi sila: “Kami ay katipunang nananaig?”

⁴⁵Matatalo ang pagkakabuklod at magbabaling sila ng mga likod [nila].

⁴⁶Bagkus ang Huling Sandali ay ang tipanan nila at ang Huling Sandali ay higit na masaklap at higit na mapait.

⁴⁷Tunay na ang mga salarin ay nasa isang pagkaligaw [sa Mundo] at isang pagdurusa [sa Kabilang-buhay].

⁴⁸Sa araw na kakaladkarin sila sa Apoy sa [pagkasubsob ng] mga mukha nila, [sasabihin sa kanila]: “Lumasap kayo ng saling ng [impiyernong] Init!”

⁴⁹Tunay na Kami sa bawat bagay ay lumikha ayon sa isang takda.

⁵⁰Walang iba ang utos Namin kundi nag-iisa gaya ng kisap ng paningin.

⁵¹Talaga ngang nagpahamak Kami ng mga kakampi ninyo, kaya may tagapag-alaala kaya?

⁵²Bawat bagay na ginawa nila ay nasa mga kasulatan.

⁵³Bawat maliit at malaki ay nakatitik.

⁵⁴Tunay na ang mga tagapangilag magkasala ay nasa mga hardin at mga ilog,

⁵⁵sa upuan ng katapatan sa piling [ni Allāh ang] Haring Tagakaya.