Qaf

¹Qaaf.[1] Ninaapa kwa Qur-ani tukufu!

²Bali wanastaajabu kwamba amewafikia mwonyaji kutoka miongoni mwao, na wakasema makafiri: 'Hili ni jambo la ajabu!

³Ati tukifa na tukawa udongo...? Kurejea huko kuko mbali!'

⁴Hakika Sisi tunajua kiasi cha kila kinachopunguzwa na ardhi kutokana nao. Na kwetu kipo Kitabu kinachohifadhi vyema yote.

⁵Lakini waliikanusha Haki ilipowajia; kwa hivyo wamo katika mambo ya mchanganyiko.

⁶Je, hawaangalii mbingu zilizo juu yao! Vipi tulivyozijenga, na tukazipamba. Wala hazina nyufa.

⁷Na ardhi tumeitandaza na tukaiwekea milima, na tukaiotesha mimea mizuri ya kila namna.

⁸Yawe haya ni kifumbua macho na ukumbusho kwa kila mja mwenye kurejea (kwa Mwenyezi Mungu).

⁹Na tumeteremsha kutoka mbinguni maji yaliyobarikiwa, na kwa hayo tukaotesha mabustani na nafaka za kuvunwa.

¹⁰Na mitende mirefu yenye makole yaliyozaa kwa wingi.

¹¹Ili iwe ni riziki kwa waja wangu. Na tukaifufua kwa maji nchi iliyokuwa imekufa. Kama hivyo ndivyo utakavyokuwa ufufuaji.

¹²Kabla yao walikadhibisha kaumu ya Nuhu na wakazi wa Rassi na Thamudi.

¹³Na A'di na Firauni na kaumu ya Luti.

¹⁴Na wakazi wa Machakani, na watu wa Tubbaa'. Wote hao waliwakanusha Mitume, kwa hivyo onyo likathibitika juu yao.

¹⁵Kwani tulichoka kwa kuumba mara ya kwanza? Bali wao wamo katika shaka tu juu ya umbo jipya.

¹⁶Na hakika tulimuumba mtu, nasi tunayajua yanayomtia wasiwasi katika nafsi yake. Na Sisi tuko karibu naye kuliko mshipa wa shingoni mwake.

¹⁷Wanapopokea wapokeaji wawili, wanaokaa kuliani na kushotoni.

¹⁸Hatamki neno ila karibu yake yupo mwangalizi tayari.

¹⁹Na uchungu wa kutoka roho utamjia kwa haki. Hayo ndiyo uliyokuwa ukiyakimbia.

²⁰Na litapulizwa baragumu. Hiyo ndiyo Siku ya Miadi.

²¹Na kila nafsi itakuja na pamoja nayo mchungaji na shahidi.

²²(Aambiwe): 'Kwa hakika ulikuwa umeghafilika mbali na haya. Basi leo tumekuondolea pazia lako, na kwa hivyo kuona kwako leo ni kukali mno.'

²³Na mwenzake atasema: 'Huyu niliye naye mimi keshatayarishwa.

²⁴Mtupeni katika Jahanamu kila kafiri mkubwa mkaidi.

²⁵Akatazaye mno heri, arukaye mipaka, mwenye kutia shaka.

²⁶Aliyeweka mungu mwingine pamoja na Mwenyezi Mungu. Basi mtupeni katika adhabu kali.'

²⁷Mwenzake aseme: 'Ewe Mola wetu Mlezi! Sikumpoteza mimi, bali yeye mwenyewe alikuwa katika upotovu wa mbali.'

²⁸(Mwenyezi Mungu) aseme: 'Msigombane mbele yangu. Tayari niliwaletea mbele onyo langu.

²⁹Mbele yangu haibadilishwi kauli, wala Mimi siwadhulumu waja wangu.

³⁰Siku tutakapoiambia Jahanamu: 'Je, umejaa?' Nayo itasema: 'Je, kuna ziada?'

³¹Na Bustani ya mbinguni italetwa karibu mno kwa ajili ya wacha Mungu, haitakuwa mbali.

³²Haya ndiyo mnayoahidiwa kwa kila mwenye kurejea mno kwa Mwenyezi Mungu na akajilinda vyema.

³³Mwenye kumwogopa mno Mwingi wa rehema hali kuwa hamwoni, na akaja kwa moyo uliotubia.

³⁴(Ataambiwa) ingieni humo kwa salama. Hiyo ndiyo siku ya kudumu daima dawamu.

³⁵Humo watapata wakitakacho, na kwetu yako ya ziada.

³⁶Na kaumu ngapi tuliziangamiza kabla yao, waliokuwa na nguvu zaidi kuliko hawa! Nao walitanga tanga katika nchi nyingi. Je, walipata pa kukimbilia?

³⁷Hakika katika hayo upo ukumbusho kwa mwenye moyo au akatega sikio naye yupo anashuhudia.

³⁸Na bila ya shaka Sisi tumeziumba mbingu na ardhi na vilivyo baina yake katika siku sita; na wala hayakutugusa machovu yoyote.[1]

³⁹Basi vumilia kwa hayo wasemayo, na mtakase kwa kumsifu Mola wako Mlezi kabla ya kuchomoza jua na kabla ya kuchwa.

⁴⁰Na katika usiku pia mtakase, na baada ya kusujudu.

⁴¹Na sikiliza siku atakaponadi mwenye kunadi kutoka mahali karibu.

⁴²Siku watakaposikia ukelele wa haki. Hiyo ndiyo siku ya kufufuka.

⁴³Hakika Sisi tunahuisha na tunafisha, na kwetu Sisi ndio marejeo.

⁴⁴Siku itapowapasukia ardhi mbio mbio! Mkusanyo huo kwetu ni mwepesi.

⁴⁵Sisi tunajua kabisa wayasemayo. Wala wewe si mwenye kuwatawalia kwa ujabari. Basi mkumbushe kwa Qur-ani anayeliogopa onyo.