Az-Zukhruf

¹Ha Mim.[1]

²Ninaapa kwa Kitabu kinachobainisha.

³Hakika Sisi tumeifanya Qur-ani kwa Kiarabu ili mfahamu.

⁴Na hakika hiyo imo katika Asili ya Maandiko yaliyoko kwetu, ni tukufu na yenye hekima.

⁵Je, tuache kuwakumbusha kabisa kwa kuwa nyinyi ni watu mliopita mipaka kwa ukafiri?

⁶Na Manabii wangapi tuliwatuma kwa watu wa zamani!

⁷Na hawajii Nabii yeyote ila walikuwa wakimkejeli.

⁸Na tuliwaangamiza waliokuwa na nguvu kushinda wao. Na mfano wa watu wa zamani umekwisha pita.

⁹Na ukiwauliza: 'Nani aliyeziumba mbingu na ardhi?' Bila ya shaka watasema: 'Kaziumba Mwenye nguvu, ajuaye zaidi.'

¹⁰Ambaye amewafanyieni ardhi kama tandiko, na akawafanyieni ndani yake njia mpate kuongoka.

¹¹Na ambaye ndiye aliyeteremsha kutoka mbinguni maji kwa kiasi, na kwa hayo tukaifufua nchi iliyokufa. Na namna hivi ndivyo mtakavyotolewa.

¹²Na ambaye ndiye aliyeumba katika kila kitu jike na dume, na akawafanyieni merikebu na wanyama mnaowapanda.

¹³Ili mkae vizuri migongoni mwao, kisha mkumbuke neema za Mola wenu Mlezi mnapokaa sawa sawa juu yao, na mseme: 'Ametakasika aliyemfanya huyu atutumikie, na tusingeliweza kufanya haya wenyewe.'

¹⁴Na hakika sisi tutarudi kwa Mola wetu Mlezi.

¹⁵Na wanamfanyia katika waja wake fungu. Kwa hakika mwanadamu ni mtovu wa fadhila aliye dhahiri.

¹⁶Au amejichukulia watoto wanawake katika vile alivyoviumba, na akakuteulieni nyinyi watoto wanaume?

¹⁷Na anapobashiriwa mmoja wao kwa yale aliyompigia mfano Mwenyezi Mungu, uso wake husawijika na hujaa hasira.

¹⁸Ati aliyelelewa katika mapambo na katika mabishano hawezi kusema kwa bayana?

¹⁹Na wakawafanya Malaika, ambao ni waja wa Mwingi wa Rehema, ni wanawake! Kwani wameshuhudia kuumbwa kwao? Ushahidi wao utaandikwa na wao watahojiwa!

²⁰Nao husema: 'Angelipenda Mwingi wa Rehema tusingeliwaabudu sisi.' Hawana ujuzi wowote wa hayo! Hawana ila kusema uongo tu!

²¹Kwani tuliwapa Kitabu kabla ya hiki, na ikawa wao wanakishikilia hicho.

²²Bali wanasema: 'Hakika sisi tuliwakuta baba zetu wanashika dini mahsusi, basi na sisi tunafuata nyayo zao.'

²³Na kadhaalika hatukumtuma mwonyaji kwenye mji wowote ila watu wake waliodeka kwa starehe walisema: 'Hakika sisi tuliwakuta baba zetu wanashika dini mahsusi, na sisi tunafuata nyayo zao.'

²⁴Akasema (Mwonyaji): 'Hata nikiwaletea yenye uwongofu bora kuliko mliowakuta nao baba zenu?' Wakasema: 'Sisi tunayakataa tu hayo mliyotumwa nayo.'

²⁵Kwa hivyo, tukawalipizia. Basi angalia ulikuwaje mwisho wa waliokadhibisha!

²⁶Na pale Ibrahim alipomwambia baba yake na kaumu yake: 'Hakika mimi ninajitenga mbali na hayo mnayoyaabudu.'

²⁷Isipokuwa yule aliyeniumba, kwani Yeye ataniongoa.'

²⁸Na akalifanya hili liwe neno lenye kubaki katika vizazi vyake ili warejee.

²⁹Bali tuliwastarehesha hawa na baba zao mpaka ikawafikia Haki na Mtume aliyebainisha.

³⁰Na ilipowafikia Haki wakasema: 'Huu ni uchawi, na sisi hakika tunaukataa.'

³¹Na walisema: 'Kwa nini Qur-ani hii haikuteremshwa kwa mtu mkubwa katika miji miwili hii?'

³²Kwani wao ndio wanaogawa rehema za Mola wako Mlezi? Sisi tumewagawanyia baina yao maisha yao katika uhai wa duniani, na tukawanyanyua baadhi yao juu ya wengine kwa daraja nyingi; kwa hivyo baadhi yao wanawafanya wengineo wawatumikie. Na rehema za Mwenyezi Mungu ni bora kuliko hayo wanayoyakusanya.

³³Na lau isingekuwa watu watakuwa kundi moja, tungeliwajaalia wanaomkufuru Rahmani nyumba zao kuwa na dari ya fedha, na ngazi zao pia wanazopandia

³⁴Na milango ya nyumba zao na vitanda wanavyoegemea juu yake.

³⁵Na mapambo. Lakini hayo si chochote ila ni starehe ya maisha ya dunia tu, na Akhera iliyoko kwa Mola wako Mlezi ni ya wenye kumcha Mungu.

³⁶Anayeyafanyia upofu maneno ya Rahmani tunamwekea Shetani kuwa ndiye rafiki yake.

³⁷Na hakika wao wanawazuilia Njia na wenyewe wanadhani kuwa wameongoka.

³⁸Hata atakapotujia atasema: 'Laiti ungelikuweko baina yangu na wewe kama umbali baina ya mashariki na magharibi. Rafiki mwovu mno wewe!'

³⁹Na kwa kuwa mlidhulumu, haitakufaeni kitu leo kwamba nyinyi mnashirikiana katika adhabu.

⁴⁰Je, unaweza kuwasikilizisha viziwi, au unaweza kuwaongoa vipofu na waliomo katika upotovu ulio wazi?

⁴¹Na hata tukikuondoa, Sisi tutalipiza kisasi chetu kwao.

⁴²Au tutakuonyesha tuliyowaahidi. Nasi bila ya shaka tuna uweza juu yao.

⁴³Basi wewe yashike yaliyofunuliwa kwako. Hakika wewe uko kwenye Njia iliyonyooka.

⁴⁴Na hakika haya ni ukumbusho kwako na kwa kaumu yako. Na mtakuja ulizwa.

⁴⁵Na waulize Mitume wetu tuliowatuma kabla yako: 'Je, tulifanya miungu mingine iabudiwe badala ya Rahmani?'

⁴⁶Na bila ya shaka tulimtuma Musa kwa Ishara zetu aende kwa Firauni na waheshimiwa wake, na akasema: 'Hakika mimi ni Mtume wa Mola Mlezi wa walimwengu wote!'

⁴⁷Lakini alipowajia na Ishara zetu, wakaingia kuzicheka.

⁴⁸Na hatukuwaonyesha Ishara yoyote ila hiyo ilikuwa kubwa zaidi kuliko nyingineye. Na tukawakamata kwa adhabu ili warejee.

⁴⁹Na wakasema: 'Ewe mchawi! Tuombee kwa Mola wako Mlezi kwa ile ahadi aliyokuahidi; hakika sisi tutakuwa wenye kuongoka.'

⁵⁰Basi tulipowaondolea adhabu hiyo, mara wakaingia kuvunja ahadi.

⁵¹Na Firauni alitangaza kwa watu wake akisema: 'Enyi watu wangu! Kwani mimi si ninao huu ufalme wa Misri, na hii mito inapita chini yangu. Je, hamwoni?

⁵²Au mimi si bora kuliko huyu aliye mnyonge, wala hawezi kusema waziwazi?

⁵³Basi mbona hakuvikwa vikuku vya dhahabu au hawakuja Malaika pamoja naye wakamwandama?'

⁵⁴Basi aliwachezea watu wake na wakamtii. Kwa hakika hao walikuwa watu wapotovu.

⁵⁵Walipotukasirisha, tuliwapatiliza tukawazamisha wote!

⁵⁶Kisha tukawafanya kuwa watangulizi na mfano kwa wa baadaye.

⁵⁷Na alipopigiwa mfano Mwana wa Mariamu, watu wako waliupigia ukelele.

⁵⁸Wakasema: 'Miungu yetu kwani si bora kuliko huyu?' Hawakukupigia mfano huo ila kwa ubishi tu. Bali hao ni watu wagomvi!

⁵⁹Hakuwa yeye (Isa) ila ni Mtumwa tuliyemneemesha na tukamfanya ni mfano kwa Wana wa Israili.

⁶⁰Na tungelipenda, tungeliwafanyia miongoni mwenu Malaika katika ardhi wakifuatana.

⁶¹Na kwa hakika yeye ni alama ya Saa ya Kiyama. Basi usiitilie shaka, na nifuateni. Hii ndiyo Njia Iliyonyooka.

⁶²Wala asiwazuilie Shetani. Hakika yeye ni adui yenu wa dhahiri.

⁶³Na alipokuja Isa na ushahidi ulio wazi, alisema: 'Nimewajia na hekima na ili niwaeleze baadhi ya yale mliyokhitalifiana. Basi mcheni Mwenyezi Mungu, na mnitii mimi.

⁶⁴Kwa hakika Mwenyezi Mungu ni Mola wangu Mlezi, na ni Mola wenu Mlezi. Basi muabuduni Yeye tu. Hii ndiyo Njia Iliyonyooka.'

⁶⁵Lakini makundi kwa makundi yao yalikhitalifiana wao kwa wao. Ole wao waliodhulumu kwa adhabu ya siku chungu.

⁶⁶Je, nini wanangojea ila Saa iwajie kwa ghafla na wala wao hawatambui?

⁶⁷Siku hiyo marafiki watakuwa ni maadui wao kwa wao, isipokuwa wacha Mungu.

⁶⁸Enyi waja wangu! Hamtakuwa na khofu siku hiyo, wala hamtahuzunika.

⁶⁹Ambao waliziamini Ishara zangu na walikuwa Waislamu.

⁷⁰Ingieni Bustanini, nyinyi na wake zenu; mtafurahishwa humo.

⁷¹Watakuwa wanapitishiwa sahani za dhahabu na vikombe, na vitakuwemo ambavyo nafsi zinavipenda na macho yanavifurahia, na nyinyi mtakaa humo milele.

⁷²Na hiyo ni Bustani ya mbinguni mliyorithishwa kwa mliyokuwa mkiyafanya.

⁷³Mnayo humo matunda mengi mtakayoyala.

⁷⁴Kwa hakika wakosefu watakaa katika adhabu ya Jahannamu.

⁷⁵Hawatapumzishwa nayo, na humo watakata tamaa.

⁷⁶Wala Sisi hatukuwadhulumu, bali wao ndio waliokuwa madhalimu.

⁷⁷Nao watapiga kelele waseme: 'Ewe Malik! Na atufishe Mola wako Mlezi!' Naye aseme: 'Hakika nyinyi mtakaa humo humo!'

⁷⁸Kwa yakini tulikuleteeni Haki, lakini wengi katika nyinyi mlikuwa mnaichukia Haki.

⁷⁹Au waliweza kupitisha amri yao? Bali ni Sisi ndio tunaopitisha.

⁸⁰Au wanadhani kwamba hatusikii siri zao na minong'ono yao? Wapi! Na wajumbe wetu wapo karibu nao, wanayaandika.

⁸¹Sema: 'Ingelikuwa Rahmani (Mwingi wa Rehema) ana mwana, basi mimi ningelikuwa wa kwanza kumuabudu.'

⁸²Ametakasika Mola Mlezi wa mbingu na ardhi, Mola Mlezi wa A'rshi, na hayo wanayomsifia.

⁸³Basi waache wapige porojo wakicheza mpaka wakutwe na hiyo siku yao waliyoahidiwa.

⁸⁴Na Yeye ndiye Mungu mbinguni, na ndiye Mungu katika ardhi. Naye ndiye Mwenye hekima, Mwenye kujua mno.

⁸⁵Na ametukuka Mwenye ufalme wa mbingu na ardhi na vilivyo kati yake. Na uko kwake ujuzi wa Saa ya Kiyama, na kwake Yeye mtarudishwa.

⁸⁶Wala hao mnaowaomba badala yake Yeye hawana uweza wa kumwombea mtu, isipokuwa anayeshuhudia kwa haki, na wao wanajua.

⁸⁷Na ukiwauliza ni nani aliyewaumba. Bila ya shaka watasema ni Mwenyezi Mungu! Basi ni wapi wanakogeuziwa?

⁸⁸Na usemi wake (Mtume) ni: ʻEwe Mola wangu Mlezi! Hakika hawa ni watu wasioamini.'

⁸⁹Basi wasamehe, na uwaambie maneno ya salama. Watakujajua.