Ad-Dukhan

¹Ha Mim.[1]

²Ninaapa kwa Kitabu kinachobainisha.

³Hakika Sisi tumekiteremsha katika usiku uliobarikiwa. Hakika Sisi ni Waonyaji.

⁴Katika usiku huu hubainishwa kila jambo la hekima.

⁵Jambo litokalo kwetu. Hakika Sisi ndio wenye kutuma.

⁶Ni rehema itokayo kwa Mola wako Mlezi. Hakika Yeye ni Mwenye kusikia, Mwenye kujua.

⁷Mola Mlezi wa mbingu na ardhi na vilivyo baina yao, ikiwa nyinyi mna yakini.

⁸Hakuna mungu ila Yeye; anahuisha na anafisha- Mola Mlezi wenu na Mola Mlezi wa baba zenu wa mwanzo.

⁹Lakini wao wanacheza katika shaka.

¹⁰Basi ingoje siku ambayo mbingu zitakapoleta moshi ulio dhahiri.

¹¹Utakaowafunika watu. Hii ni adhabu chungu!

¹²Mola wetu Mlezi! Tuondolee adhabu hii. Hakika tutaamini.

¹³Nini faida ya kukumbuka kwao? Na alikwisha wafikia Mtume mwenye kubainisha.

¹⁴Na wao wakamgeuzia uso, na wakasema: 'Huyu amefunzwa, naye ni mwendawazimu.'

¹⁵Hakika sisi tutaiondoa adhabu kidogo, lakini nyinyi kwa yakini mtarejea vile vile!

¹⁶Siku tutakayoyashambulia mashambulio makubwa, bila ya shaka Sisi ni wenye kutesa.

¹⁷Na hakika kabla ya hawa tuliwafanyia mtihani watu wa Firauni, na aliwafikia Mtume Mtukufu.

¹⁸Akasema: 'Nipeni waja wa Mwenyezi Mungu; kwa hakika mimi kwenu ni Mtume Muaminifu.

¹⁹Na msimfanyie kiburi Mwenyezi Mungu; hakika mimi nitakuleteeni uthibitisho ulio wazi.

²⁰Nami najikinga kwa Mola wangu Mlezi na ndiye Mola wenu Mlezi pia, ili msinipige mawe.

²¹Na ikiwa hamniamini, basi jitengeni nami.'

²²Ndipo akamwomba Mola wake Mlezi: 'Hakika watu hawa ni wakosefu.'

²³Mwenyezi Mungu akasema: 'Basi nenda na waja wangu usiku. Kwa yakini mtafuatwa.

²⁴Na iache bahari vivyo hivyo imeachana, hakika wao ni jeshi litakalozamishwa.'

²⁵Mabustani mangapi na chemchemi ngapi waliziacha!

²⁶Na mimea na vyeo vitukufu!

²⁷Na neema walizokuwa wakijistareheshea!

²⁸Ndio hivyo! Na tukawarithisha haya watu wengineo.

²⁹Basi mbingu wala ardhi hazikuwalilia, wala hawakupewa muhula.

³⁰Na bila ya shaka tuliwaokoa Wana wa Israili katika adhabu ya kuwadhalilisha,

³¹Ya Firauni. Hakika yeye alikuwa jeuri katika wenye kupindukia mipaka.

³²Na tuliwakhiari kwa ujuzi wetu kuliko walimwengu wengineo.

³³Na tukawapa katika ishara zenye majaribio yaliyo wazi.

³⁴Hakika hawa wanasema:

³⁵Hapana ila kufa kwetu mara ya kwanza tu, wala sisi hatufufuliwi.

³⁶Basi warudisheni baba zetu, ikiwa nyinyi mnasema kweli.'

³⁷Je, ni wao bora au watu wa Tubbaa' na waliokuwa kabla yao? Tuliwaangamiza. Hakika hao walikuwa wakosefu.

³⁸Na hatukuziumba mbingu na ardhi na vilivyo baina yake kwa mchezo.

³⁹Hatukuviumba hivyo ila kwa Haki, lakini wengi wao hawajui.

⁴⁰Hakika siku ya Uamuzi ni wakati uliowekwa kwa wao wote.

⁴¹Siku ambayo rafiki hatamfaa rafiki yake kwa chochote, wala hawatanusuriwa.

⁴²Isipokuwa yule mbaye Mwenyezi Mungu atamrehemu. Hakika Yeye ndiye Mwenye nguvu, Mwenye kurehemu mno.

⁴³Hakika Mti wa Zaqqum

⁴⁴Ni chakula cha mwenye dhambi.

⁴⁵Kama shaba iliyoyeyushwa, hutokota matumboni.

⁴⁶Kama kutokota kwa maji ya moto.

⁴⁷(Itasemwa): 'Mkamateni na mtupeni katikati ya Jahannamu!

⁴⁸Kisha mmwagieni juu ya kichwa chake adhabu ya maji yanayochemka.'

⁴⁹Onja! Ati wewe ndiye mwenye nguvu, mtukufu!

⁵⁰Hakika haya ndiyo mliyokuwa mkiyatilia shaka.

⁵¹Hakika wacha Mungu watakuwa katika mahali pa amani.

⁵²Katika mabustani na chemchemi.

⁵³Watavaa hariri nyepesi na hariri nzito wakielekeana.

⁵⁴Hivi ndivyo itakavyokuwa, na tutawaoza mahurilaini.

⁵⁵Humo watataka kila aina ya matunda, na wakae kwa amani.

⁵⁶Humo hawataonja mauti ila mauti yale ya kwanza, na (Mwenyezi Mungu) atawalinda kutokana na adhabu ya Jahannamu.

⁵⁷Kuwa ni fadhila zitokazo kwa Mola wako Mlezi. Huko ndiko kufuzu kukubwa.

⁵⁸Basi tumeifanya nyepesi hii Qur-ani kwa ulimi wako, ili wapate kukumbuka.

⁵⁹Ngoja tu, na wao wangoje pia.